Read SEBR SÕNGO, 1998 Zoob 12 Bible Online

Zoob 12 - SEBR SÕNGO, 1998 bible

Zoob 12

¹A Zoob reega goama n yeele:

²Sɩda yãmb gomda wa wulwaalbdã, bãngr zulung na n naag-y lame n menem moogo.

³Ad-y mam me tara yam wa yãmba, y ka yɩɩd-m ne baa fɩ. Y sẽn lʋɩɩs bũmb niyns taoorã, mam me tõe n waa ne bãmba.

⁴Maam la y zo-rãmb laad n tuumnẽ. B laada maam tɩ m ket n teesda Wẽnd n kelemdẽ, n kelemdẽ tɩ b yaool n ka le leokd wa pĩnd ye. Nin-tɩrg la nin-sõngo la bɛɛb laado.

⁵F meng sã n ka namsde f nong n sãbsa sẽn tar-b toog la naongã.

⁶Bi-beesa yaool n gãee b zakẽ ne laafi. Sẽn boond b Wẽnd tɩ b wa tɩ b sog maoora, zĩime tɩ bũmb ka yɛɛsd-b ye; b ka teeg wẽnd a to tɩ ka b yãoog pãng ye.

⁷Modg n sok rũmsã tɩ f na paam leokre, sok yĩngr luiili wã tɩ b na zãms-fo.

⁸Gom ne tẽngã t'a na kõ-f bãngre, sok mogra zĩm tɩ b na zãms-f wʋsgo.

⁹Sɩda, bãmb sʋka ãnna n ket n zɩ tɩ sẽn maan fãa yaa Wẽnnaam nug tʋʋmde?

¹⁰Bõn-vɩɩl fãa vɩɩm bee bãmb nugẽ, bãmb pãng n tongd Adem biig fãa yõore.

¹¹Neb maana b sɩɩlga: «Gomd nooma tʋbre, wala rɩɩb sẽn noom dasendaka.

¹²Gom minim yaa nin-kẽem bũmbu, zug sẽn pelg n tar yɛl welgre yam.»

¹³Bãngr zulung la Wẽnd ning b rɩtgo, tɩ pãng kẽnd b goabga, bãmb n so saglg la yɛla-welgre.

¹⁴Wẽnd sẽn sãamẽ, manegd ka ye; b sẽn pag roogẽ, pak tɩ yi soab ka ye.

¹⁵B tõdg b saaga, kũuni, fãa zĩi ne ware; b bas tɩ saaga ni, tẽnga fãa na n teema nenga.

¹⁶Pãng la minem soab la bãmba, n lekd sẽn menesda la sẽn menema.

¹⁷Sẽn mi a saglg lebga zʋbsa, tɩ gãeemd zomb tẽnga soaalba.

¹⁸Bãmb n deegd dĩm dãmba naam, bãmb wĩir n loe b sɛɛg tɩ b tat n dabd yembdo.

¹⁹Maan-kʋʋdba piita b neooda wã b taoore, Sẽn da pa tẽed b tekra teema zãnga.

²⁰A-mi-goam rãmb yaa sɩɩ, tɩ nin-kẽems yẽesem lebg kʋʋsem.

²¹Bãmb sẽoosda na-komse, la b loota pãn-tõog rãmba sɛɛs sẽbdse.

²²Bʋg-tẽng rãmb likã, bãmb n menesd-a, la b wata ne vẽenem lik sẽn kẽ pãf zĩig ningã.

²³Bãmb n tõe n zẽk buudu n le lɛɛg n fabg-a tẽnga. B kɩtdame tɩ buud a ye yalge n pid tẽnga, n le maan b yam n wʋk-a n kẽng pa-weere.

²⁴B sobda tẽng soaalba yam tɩ b saad likẽ n ka le mi sor ye,

²⁵tɩ b babend likẽ, vẽenem sẽn kaẽ, la Wẽnd menesda b yam wa ned sẽn tɩg rãam.