Read SEBR SÕNGO, 1998 Zoob 14 Bible Online

Zoob 14 - SEBR SÕNGO, 1998 bible

Zoob 14

¹Pag biig vɩɩm yaa koɛɛga, tɩ pɛt baas n wʋmd-a.

²Ninsaala, yaa puugu, a wekdame n wẽneg n lʋɩ, fãa loogda wa maasem, n ka yɛs n kaoosdẽ ye.

³La yaa bõn-yaalg a woto la y puk y nif n getẽ; maam la yãmb tar n wat bʋʋd y taoore?

⁴La ãnna n tõe n yiis neer wẽng pʋgẽ? Ned ba a ye.

⁵Yãmb zoe n sõda ninsaal daare, n yals a kiisa fãa sõore, t'a kell n sɩd ka tõe n yõsge daar ning y sẽn sõd n kõ-a ye.

⁶Bi y wẽnemd y neng n loog la y bas-a. Bas-y ninsaal t'a pemse; t'a vʋʋs wa tʋʋm-tʋmda, a vʋʋsg daare.

⁷Sã n ya tɩɩga, a tara a saagre, kɛɛgd-a lame t'a le lɛɛg n tobe, n tobd n ka yɛɛdẽ ye.

⁸A yẽgna ye n paam n kʋʋl b bokẽ; ba a sɛɛga sã n sɩng kʋɩɩbo,

⁹a sã n le paam tɩ koom madg-a, a le tara tobr bala, a le tobda vãad wa tɩ polle.

¹⁰Ninsaal sã n ki, a loogame. Ninsaal sã n ki a rigda yɛ?

¹¹Mogra koom wat n yõbgame, kooma wat n fẽbga kʋɩlgẽ, n le wa pid n daale.

¹²Ninsaal ka kiid n le tõog n yik a gãagẽ ye; a kõn lebg a nugu, a kõn nek a gãgẽ n tãag sa-gãongã sẽn wat n pilg n looge.

¹³Kato! M paamẽ lame tɩ y solg-m bokẽ tɩ m sor be n gũud y sũura sigbu, tɩ y wa yãk daare n le wa tẽeg m yelle.

¹⁴La ay! Ninsaal sã n ki ka sɛ wɛɛ? M tɛk la m tʋm m tʋʋma, tɩ ned a to wa led m zĩigẽ.

¹⁵Tõe tɩ y toog le wa zĩnd ne y sẽn naane, la ad-y sẽn bool-m daar ning fãa, m na n sakame.

¹⁶Dũnna yãmb sõta m nao-yakma, Tõe tɩ beoog bɩ y ra le gũus m beegr ye

¹⁷Y tõe n baoo waooga waoog sẽn ya taoko n solg m kongrã, y na tõog n sɩd maan wa y ka yãe bũmbu?

¹⁸M neeme tɩ tãng meng baasdame n sirgi, tɩ pĩig meng bilim n serg a zĩigẽ,

¹⁹koom meng wat n baas n pedsa kuga, tɩ sa-koom kãagd tãndo, n tuud bogdo, woto me la ninsaal wat n miki t'a sẽn gãe n tẽed bũmb ningã, a tẽeba wat n menema zãnga.

²⁰Yãmb wat n koms-a lame t'a looge, y wat n menesa a neerma n dig-a n kẽes weoogo.

²¹B yõdg n pẽgd a kamba, a kõn bãng ye, b yõdg n sãbsd a kamba, a zɩ ye.

²²A sẽn yãet toog ningã n namsd-a, a sẽn yãbd yaa a meng bala.