Read SEBR SÕNGO, 1998 Zoob 15 Bible Online

Zoob 15 - SEBR SÕNGO, 1998 bible

Zoob 15

¹A Elifaz, Tema raoã, goama ne a Zoob:

²Gom vɩɩd ka be yẽesem ye, yẽesem soab goam ka faad wa fo rẽnna ye.

³Gom faad na wa ne bʋʋm? Gom pererr ka zaalem sɩda?

⁴F wat n gom n kõo Wẽnd bɛɛba bʋʋm b ka wat n le ne fo tẽeba sẽn sog bũmb ning ye.

⁵Yɛl yooda f sẽn maana n pirsd foom tɩ f gome, la lebga f gom bal n wilg tɩ f mii goama.

⁶La fo meng noorã n ningd-f taale, ka maam ye; fo zelemd bala n paagld-f bʋʋdo.

⁷Dẽ yĩnga fo la a Adem, n deng fãa n wa moog laa? Fo renga kunkubã fãa n wa dũni laa?

⁸Fo zĩnd n kelga Wẽnd yẽsgo n tẽed tɩ foo bal la mita?

⁹Fo mii bõe tɩ tõnd zɩ? Yel-bʋg võor la fo wʋmda tɩ wẽnd yell sãamga?

¹⁰Ad neb kẽer n be tõnd sʋka n tar bãngre, ad neb sẽn kʋʋle n yɩɩd fo ba menga n be ka.

¹¹Tõnd sẽn maasd-f sũur ne Wẽnd saglsã n ka noom-foo? Tõnd sẽn bʋk d sũuri n gomd ne fooma n ka ta f yam?

¹²Bõe tɩ fo bas f sũur tɩ fõta, bõe tɩ f kamsdẽ, tɩ d wa kẽ f tãpẽ?

¹³Bõe tɩ f wuk ne Wẽnde, n zĩ ne sũ-toogo, bõe tɩ f goama ya pererr n ka sɛtẽ?

¹⁴Ninsaal sõmblem be-la a yɛ? Pag biig tũuda yɛ n yɩ nin-tɩrga?

¹⁵Ne b sõsd-n-taasa menga, Wẽnnaam pʋg ka peel ye, bãmb nifẽ yĩngri dãmba meng ket n ka sõma ye.

¹⁶ [12†] Tɩ b ka gomd ninsaal, bõn-zʋklgo la zʋg yoog soaba, sẽn dɩk wẽnem tɩ lebg a koom t'a yũuda.

¹⁷Kelg ka tɩ m wilg-fu. Mam dat n togs-f-la m nif sẽn yãende.

¹⁸M dat n togs-f-la kʋdem dãmba sẽn wilg n pa solge b sẽn wilg tɩ yaa b ba rãmb nengẽ la b zãms yã,

¹⁹tɩ yaa Wẽnd sẽn kõ b rãmb tẽnga pipi wã, yaa bãmb dãmb nengẽ la b paam yã, dẽ tɩ sãan ba a ye nan ka wa naag bãmb ye, yaa wakat kãng la b wʋm yã.

²⁰Ade, nin-wẽng vɩɩm yaa namsg wakat buud fãa, ba Wẽnd sã n pʋlem-a-la yõ-woko,

²¹a na n wʋma kaasgo a zak pʋgẽ. A sẽn pa tẽed wakat ningã, laafi wakato la a bɛ na n yik zabre ne-a.

²²A pa tẽed t'a na yi a likẽ wã ye, t'a zoe n nee sʋʋg sẽn luund a zugu.

²³A saad n na n baoo rɩɩbo, la yɛ la a na n teese? A mii bũmb ning sẽn gũud-a: a kũuma raare.

²⁴Rigb la yɩɩre na n yɛɛs-a lame, toog la pɛt sũu taab a zug wala dĩm sẽn kaoog a tãpo.

²⁵La rẽ yaa a sẽn sak n tees Wẽnnaam nug gilgu; yaa a sẽn zẽk a zug ne Wẽnd-Pãng-Soabã.

²⁶A ra sɩd fõrd n kẽed-b lame, n yet t'a boba a kut gãondo.

²⁷La rẽ yaa a sẽn nobe t'a nenga pɩnd ne kaam, t'a lʋga fãa yɛdge.

²⁸A tɩ yãee tẽng b sẽn wã t'a kẽ n yãmbe; a ra kẽeda ro-põaasa, sẽn besd n dʋʋgdẽ.

²⁹A ka na n legb rakãagr ye, a paoong fãa sɛta bõra. A maasem kõn bui tẽng yɛs ye.

³⁰A kõn zãag ne lik abada. A wẽnegda wa tɩɩga, bugum n na n kʋɩɩs a vã-miinim, tɩ sobg fãra a puudu.

³¹A ra teeg a zãmba ye t'a na n tudga a menga, tɩ zãmb n na n yao zãmbo.

³²Dẽ fãa na n waame tɩ wakat nan ka ta ye, la a vãoog buug kõn le tob ye.

³³Wala bugsuntungu, a kamba na n sʋʋga kãse, wala oliviye tɩɩga, a puuda na n sʋʋga zãnga.

³⁴Sɩd sɩda nin-wẽng buud yaa bu-kɩɩnga, Nin-yoog zaka, bugum n dit-a zãng buga.

³⁵Sẽn tʋta wẽnem pʋga, dogda yel-beed biiga. A biigã n na n lɛɛg n kʋ-a.