Read SEBR SÕNGO, 1998 Zoob 17 Bible Online

Zoob 17 - SEBR SÕNGO, 1998 bible

Zoob 17

¹M vʋʋsma tulgame, m wĩndga lʋɩtame, m yao-tuudba zoe n wa sɩngame.

²Neb n zoe n wa yaand maam, b wẽnema kɩtame tɩ m bao gõeem n konge.

³Wẽnde, bɩ yãmb lʋɩ taoore, n yɩ m Fãagda. Ãnda n na n kẽ m tãpẽ sã n ka yãmba?

⁴M zo-rãmba ka le mi b sẽn maand ye. Da bas-y tɩ b tẽ tɩ bãmb n maan daood ye.

⁵B ra wẽneg wa b sẽn togsd kibarẽ tɩ ned n bool a zo-rãmb n kõ-b rɩɩbo, t'a kamb yaool n gũ b rẽn n ka yãend bũmb ye.

⁶M lebga bɛɛb laado. M yʋʋr ka pʋt tɩ ned ka yɛɛs ye.

⁷Mam nina mumda ne pɛta, tɩ m yĩnga wils pãng sɛ zãnga.

⁸Nin-tɩrg yãeta woto t'a pɛleng yɩke, sũ-tɩrg soab puugda a sũur ne nin-wẽnga.

⁹Pʋ-peelem soab kell n tall a vɩɩm sõngo; la nug sẽn ka mi-a wẽng fãa kell n maan daoodo.

¹⁰Aya, bɩ y fãa wa tedg tɩ d gese! M kõn yãend ned sẽn mi gũusg yãmb sʋk ye.

¹¹Mam wakat zoe n loogame, m sẽn da baood wa fãa-fãa wã me tũ n yɩkame.

¹²B yeetame tɩ yʋng la wĩntoogo, wĩndg sã n wa lʋɩtẽ b gomdame tɩ sõor n pukdi.

¹³Bõe la m ket n zĩ n saagdẽ? Bʋg-tẽng la m zĩiga. Yaa likẽ la m tʋɩ m gãaga.

¹⁴M boonda yaooga tɩ m ba n boond mogda tɩ m ma bɩ m tão.

¹⁵M sẽn da gãe n saagdẽ wã kẽe yɛ? Ãnda nif n le ne-a?

¹⁶A na n lisa bug-tẽnga, al tẽngr tẽngre. Yaa tom-pʋlempʋkẽ la d fãa na n lagem n gãande.