Read SEBR SÕNGO, 1998 Zoob 19 Bible Online

Zoob 19 - SEBR SÕNGO, 1998 bible

Zoob 19

¹A Zoob le reega goama n yeele:

²Da-bʋre la yãmb na n yaa n bas m namsgo la y bas-m taal ningri ne y goama?

³Yãmb sẽn tʋʋs maam woto ka be sõor ye, y sẽn tar maam n yaanẽ wã yãnd ka tar yã?

⁴Ba sã n ya sɩd tɩ m tudgame, m tudugra pakẽ la maam bala.

⁵Y sã n dat n lʋɩɩs y mens taoore la y lebs m poorẽ, y sã n zabd-m bũmb sẽn ningd m yãnd poorẽ,

⁶bãng-y tɩ yaa Wẽnd n maan-m pãnga, Wẽnd n tilg-m ne b zulunga.

⁷M sã n kelem tɩ yaa pãn-tõog la Wẽnd maan-ma, kɩɩsd ka ye. M bool bʋʋd me, bʋ-kaood ka ye.

⁸B gɩdga m sor tɩ m da loog ye, lik la b kẽes m soy wã zutu.

⁹B wobga m ziira fãa, n fõk m naam pugl n bas-ma.

¹⁰B sãama m yell zĩig fãa n bas-m ne kũum bala; b võoga m saagre wala tɩɩga.

¹¹B sũurã puuga ne maam tɩ b get maam wala b bɛyã.

¹²B tãb-biisã sũu taab n wa, b tuka b sore n tãag maam n gũbg m zaka n sege.

¹³Wẽnd zãaga m saam-biisa ne maam, tɩ m sõsd-n-taasã gind-m wa sãana.

¹⁴M yags ne m tũud-n-taas wɩlgame, m gãa-soaben-dãmb yĩma m yelle.

¹⁵Mam lebga sãana m zak neb la m kom-pugli taoore, n legb ned b sẽn zɩ n yãende.

¹⁶M boola m dakõore, la a ka sak ye, la m meng m toor n yaool n yet t'a wa.

¹⁷M noora vʋʋsma yaanda m paga sũuri, m lebga waoosa m kamb yĩnga.

¹⁸Kom-bõonesa meng pursda maam, mam sã n yɛsẽ b tara m wɩdga.

¹⁹M zĩnd-n-taasa fãa lebga beem ne maam, ba m zo-rãmba wẽneg n kis-m lame.

²⁰M kõaba yii n dʋra yɩnga, m no-gãonga vɛɛgame n bas m yẽna yɩnga.

²¹M zo-rãmba, kũm-y-ma, zoe-y m nimbãanega, tɩ yaa Wẽnd nug n maan-m woto.

²²Bõe yĩnga la y na n togs Wẽnd n zab ne maam? M yĩnga la y rɩt n pa tɩgd bɩ bõe?

²³M sẽn nongẽ yaa b gʋlsẽ m goama n gʋls-b ne kɩtga kugr zugu!

²⁴N gʋls-b pĩig zugu n lɛɛg n gãneg namdo, tɩ ra yẽes lɛlɛ.

²⁵Mam miime tɩ m fãagda vɩ ne yõore, b na n tik n yika tẽn-peelma zug, yaoolem daarã.

²⁶M yĩn-gãongã sã n wa tõose yaa ne m nin la m na n ges Wẽnde.

²⁷Yaa maam n na n tall b nenga gesgo, mam menga! M nif sẽn na n teeg a soabã kõn yɩ sãan m yĩng ye; la m sũura tʋll-b-la wa fãa-fãa.

²⁸Y sã n yeele: «Namsg bʋg la d na n namsa t'a gom tɩ d paam n kẽes-a bʋʋdo?»

²⁹Wakat kãng bɩ y mens maan sʋʋga rabeem, tɩ Wẽnd sɩbgda beem kʋdg ne sʋʋga, la rẽ me n wilgd-y tɩ Wẽnd bʋʋd na n kaoome.