Read SEBR SÕNGO, 1998 Zoob 21 Bible Online

Zoob 21 - SEBR SÕNGO, 1998 bible

Zoob 21

¹A Zoob gomame n yeele:

²Kelg yã, kelg-y mam goama, sak-y woto tɩ y na maas m sũuri.

³Yaas-y tɩ m togs y koɛɛg a yembr bala, m sã n gom n sɛ, y na yaool n yaal-ma.

⁴M sẽn zabdã, yaa ne ned bɩ? Dẽ yĩnga, bõe la m na n maan yãgbo?

⁵Wẽnemd-y n ges-ma, y pɛleng na yɩke, la y na mobg y noore.

⁶Mam menga sã n mi n tagse, m yɛɛsdame, m yĩnga fãa rigdame.

⁷Bõe yĩng tɩ nin-wẽnsã ket n vɩ ne yõore? Yaa waa b sã n kʋʋnẽ la b pãnga paasda.

⁸Bãmb yagensa paamda pãng b nifẽ, b kamb sõor paasdame tɩ b zĩi n sõta.

⁹Bãmb zags gãee ne laafi tɩ rabeem ka ye, Naaba-Wẽnd sãbsga gind-b lame.

¹⁰B lols tara rogem pãnga tɩ b nag-yãans rogd wa bʋʋse.

¹¹B basda b kom-bõonese tɩ b zoet n kɩdemd wa pe-bi, tɩ b kamb yɩgd n tiisd n saood b saooga.

¹²B wẽeda gãngãado la b kʋnde, n peebd b wɩɩse, n kɩdemd sũ-noogo.

¹³Bãmb daar loogdame tɩ b ket n zĩ ne sũ-noogo, la b na n wa siga bʋg-tẽnga ne laafi.

¹⁴Bãmb n yaool n da yeel Wẽnde: «Zãag-y ne tõndo! Y soya tũudem ka noom tõnd ye.

¹⁵Wẽnd-Pãng-Soaba yaa ãnda tɩ tõnd na n wõgemd b taoore, d pʋʋsd-b lame n dok yõod bʋgo?»

¹⁶Gese, ne b sẽn basd Wẽnd kɛɛngã, b sũur baas n pida ne sũ-noogo.

¹⁷Ka naoor wʋsg la nin-wẽensa fitil kiida tɩ yel-beed lʋɩt b zugu, tɩ Wẽnd sũur puugd ne b ye.

¹⁸Bãng-y tɩ kãab wẽng n be b zugu: «B yɩ wa moogo sobg sẽn dɩkde, la ka-fɩɩb sɩlmand sẽn tʋke!»

¹⁹B maana yelbũndi tɩ biig reegda a ba sɩbgre. La ba wã sã n deegdẽ a rẽnd ka são?

²⁰B kɩt t'a yãend a meng wãabo, t'a lemb Wẽnd-Pãng-Soaba sũ-puur dãam!

²¹A raara sã n wa ta t'a looge, a toog be ne a yira sẽn na n yõdg n lebg a soaba?

²²Ãnda n tar yam n na n peng Wẽnde, n na n peng sẽn daaga zɩɩm fãa bʋ-kaooda?

²³Yõa soab loogda a bi-bɩɩlemẽ, ne sũ-noog la laafi,

²⁴t'a lʋg zɩs ne kaam, t'a kõab pid ne sɩɩlem.

²⁵Kũum wa n mika yõa soab ne sũ-toogo, a waa n mika ned sẽn zɩ n lemb sũ-noogo.

²⁶Bãmb b yiib fãa naaga taab tomẽ, la b mogda sẽn dɩt-ba zem taaba ne toolem.

²⁷Ade, mam mii yãmb sũur tagsgo, m mii y sẽn bilgd m poorẽ.

²⁸Y sokda woto: «Dakãagra yir lebga wãna? Fãadba sẽn da nok roog ninga bɛɛ?»

²⁹Sok-y so-toagdbã, wʋm-y b goama võore!

³⁰Tẽn-kũum daare nin-wẽng põsdame, Wẽnd sũ-fõora raare, b baooda zĩig n solg-a.

³¹Ãn n na n sak n wilg-a a kongre, ãnd n lebsd-a a tʋʋm kɛga yaoodo?

³²B yãagd-a-la yaadẽ, b gũuda a yaoogo t'a ra sirg ye.

³³Tẽnga na n maaga a yĩnga, neba fãa n na n yãag-a a gãagẽ, la yãagdba sak n yii wʋsgo. B ka tõe n sõd n sɛ ye.

³⁴Woto wã, f leokra maanda wãn n maag sũuri? Y goama pʋs n wʋga ne bõe sã n ka zirẽ-beedo?