Read SEBR SÕNGO, 1998 Zoob 27 Bible Online

Zoob 27 - SEBR SÕNGO, 1998 bible

Zoob 27

¹A Zoob kell n yõka goama n yeele:

²Ne Naaba-Wẽnd sẽn mong maam bʋʋma, ne Wẽnd-Pãng-Soaba b sẽn kɩte tɩ m vɩɩma lebg miisg tag-tagã,

³mam sã n ket n vʋʋsd ne yõore, Wẽnd vʋʋsem sã n ket n kẽed m yõ-bogdẽ,

⁴m wẽend tɩ m noor kõn togs sẽn tõe tudg m to ye, tɩ zirẽ-beed kõn yɩ m gomd ye.

⁵Bɩ yell pak-ma, m sã n ka pids m sẽn kãabã! Al n wa tãag m kũum, m na kell n tall m pʋ-peelem.

⁶M gãda m pʋ-peelma la m kõn bas-a abada, m sẽn ges m vɩɩma, yãnd ka tar-m ye.

⁷Bɩ m bɛyã deeg nin-wẽns dolbo, tɩ m zabd-n-taaga ra põs kʋʋdba sɩbgr ye.

⁸Yãmb meng n gomd woto: «Toog-sẽn-ka be-a-ne-Wẽnda soab saagda bõe, Wẽnd sã n deeg a vɩɩm?

⁹B na n wʋma a kɛlengã yel-beeda sã n wa tiig n lʋɩ a zugu bɩ?

¹⁰Maan zood ne Wẽnda sã n da yɩẽ la noogo ne-a, a na yõkẽ b sɛɛg wakat buud fãa.»

¹¹M wilg-y lame n puk Wẽnd tõogã, sẽn be Wẽnd-Pãng-Soaba sũurẽ, m ka na n solg-y bũmb ye.

¹²Wala yãmb meng sẽn ne wã, m zo-rãmba, bõe tɩ y goama fãa ya gom faado?

¹³Ad Wẽnd sẽn segl nin-wẽng yĩnga, ad pʋɩɩr ning a sẽn deegd Pãng Soaba nengẽ:

¹⁴«A kamb sõor sẽn ya a soab fãa, sʋʋg n kʋʋd-ba, a yagens na n konga rɩɩbo.

¹⁵Sẽn põs-b kom la sʋʋga, bã-longdem n loogd ne-ba, la a pʋg-kõap kõn yãb-a ye.

¹⁶A samd wanzurf wa bĩisri, n samd futa wa yagd sẽn samd a yagdo,

¹⁷yaa nin-sõng n wat yeelg futã. Sã n ya wanzurfã, sẽn ka mi a zãmbo n soogd-a.

¹⁸A roogã, yaa nadga la a me n kõ a menga, yaa pʋʋg roog la a tɩ n kõ a menga. Ka tar pãng ye.

¹⁹A kẽeda a gãagẽ ne ligdi la a kõn yik a gãagẽ ye. A puk a nini a kõn yãend fɩ.

²⁰Rabeem la yɛɛsgo n fãood-a wa kʋɩlg ko-ralem. Yʋng a ye, sɩlmande n loogd ne-a.

²¹Yaang sob-tʋʋlga n zẽkd-a n looge, yaang sobg n võogd-a a zĩigẽ.

²²Yẽ bal la ned kam fãa kʋɩɩs a sũur n tãoodẽ, t'a baood n na n põs tãoodba pɛɛm.

²³A bɛɛba kɩdemda a lʋɩɩse, a zaka rãmb meng n lɛɛg n kis-a lame.»