Read SEBR SÕNGO, 1998 Zoob 31 Bible Online

Zoob 31 - SEBR SÕNGO, 1998 bible

Zoob 31

¹Mam da kaoola ne m nini, tɩ m kõn ges pa-kul ye.

²Kaẽ boto, bõe la m na n gũẽ Pãng-Soaba-Wẽnd sẽn bee yĩngra nengẽ?

³Wala y sẽn gomd n yetẽ tɩ pɛt bala la nin-wẽng segda, la zu-beed bal la b tʋk n kẽnda,

⁴Wẽnd ne tɩ mam nengẽ wã ka boto ye. Naaba-Wẽnd mi m vɩɩma sẽn yaa a soaba, b tara m buka, b sõta m nao-yakma fãa.

⁵M ka rɩk zirẽ-beed sor ye! M naoor ka tall-m ne yãgbo n tees zãmb zĩigẽ ye.

⁶Bɩ b meng wa bʋ m bʋʋdo bãmb meng na reeg tɩ m pida ne pʋ-peelem.

⁷Mam sã n bas so-tɩrga n bʋt moogo, m nif sã n belg-m lame tɩ m sũur baood wẽnga, rẽgd sã n dẽgma m nusã,

⁸bɩ Wẽnd kɩt tɩ m sẽn bʋd m pʋʋgẽ yɩ ned a to rɩɩbo, la b võ m sẽn sela fãa gilli!

⁹M sũura sã n tʋlga paga, al tɩ m tɩ yals m yak zak noor n gũ-a,

¹⁰bɩ mam meng paga kẽ neere n wer ned a to yĩnga, tɩ rapa a taaba pʋg-a.

¹¹M maan dẽ, m tʋmẽ la kegre wakat kãnga, n togẽ tɩ paalg-m bʋʋdo.

¹²M naan n widgẽ bugum t'a rɩ-m zãnga, ali n loog n dɩ m paoonga gilli.

¹³Mam sã n maana no-koeemde ne m dakõapa n tol n mong bi-ribla bɩ bi-pugla b sẽn da tog n paame,

¹⁴Wẽnd bʋʋda raare, m maanda wãna? Bãmb sã n sokd võore, m leokdame tɩ bõe?

¹⁵Sẽn naana maam m ma pʋgẽ wã, n naan bãmb me. Yaa Wẽnd a ye tãa n yag tõnd d ma pʋgẽ.

¹⁶Daar bɩ y tagse tɩ naong rãmb kos-m-la bũmbu tɩ m zãgse, tɩ pʋg-kõor gũ-la m sõngre t'a nin wa yiigi;

¹⁷tɩ m dɩ m dɩɩb m yembre, n ka yãk n kõ kɩɩb bil ye.

¹⁸La ayoo! Al m yãadmẽ, kɩɩb bila bɩɩ m zakẽ wala a ba sɛɛgẽ. Al m yãadmẽ m yɩɩ pʋg-kõor so-sõng wilgda.

¹⁹Daar bɩ y tagse tɩ m yãee naong soab t'a ka tar fuugu, la nimbãan-neda t'a ka tar fu-goabga,

²⁰tɩ mam ka modg t'a pʋʋs m barka, a sɛɛg sẽn paam fuug yĩnga, fuug sẽn wʋg ne pe-kõbdo n tõe n yiis waoodo.

²¹Daar bɩ y tagse tɩ m teesa m nug-bil kɩɩb bil, bʋʋd zĩigẽ, m mi tɩ bʋʋdb a taaba na n maana wa maam, bada!

²²Sã n ya boto, bɩ Wẽnd fãsg m kangã m bãokẽ, bɩ m nug sũk m kãntɩɩgẽ.

²³M digda rabeem wʋsg ne Wẽnd sɩbgre; m maanda wãn n yaas b ziira taoore.

²⁴M sã n da teeg sãnema, m sã n yeel sãnem yullã: «Foo la m fãa-fãa,»

²⁵m sã n da ningẽ m sũ-noog m arzɛk sẽn waooga pʋgẽ, arzɛk ninga mam sẽn tʋm n paama pʋgẽ,

²⁶m sã yãenda wĩndga t'a tãoosd a vẽenem, n yãend kiuug t'a pelgda,

²⁷tɩ m sũur soos n yeel t'a wẽnd puk yã, tɩ m zẽk m nug n waoog-a,

²⁸dẽ na yɩẽ yell kegr bʋ-kaooda sẽn sɩbgde, tɩ rẽ yaẽ la yĩngr Wẽnda kɩɩsgo.

²⁹M pa tẽed tɩ m bɛyã paama bõne tɩ mam kɩdem a bõna yĩnga, tɩ m noog m sũur yel-beeda sẽn lʋɩ a zuga yĩnga ye,

³⁰tɩ m zɩ n bas m noor t'a kãab wẽnga, m zɩ n kãab m bɛ kũum ye.

³¹M zak rãmb ka mi n gomd woto sɩda: «Ãnna soab n ka paam nemd a nengẽ n wãb n tɩge?»

³²Ba vugr menga sãan ka wa m yir n gãand yɩng ye, so-toagd mikda m zaka noore tɩ pak yã.

³³Mam yɩta wãna n maan wa Adem biisã n solg ned m yell kegre, n solg m beegrã m pʋgẽ?

³⁴M maan dẽ fãa, yɩtẽ la neb goam dabeem sẽn tar-m yĩnga, yɩtẽ la m sẽn zoet neba sãbsgo yĩnga; tɩ m na n kong n sĩnd m noor la m pa rat n yi m zakẽ.

³⁵M yaoolem koɛɛg la woto: M yãeta yɛɛlẽ ned sẽn na n kelg-ma? Bɩ Pãng-Soaba wa leoke!

³⁶Sã n kella m bɛ wã sẽn sõdg yɛl niyns toor-toorã, m na rɩk-ba n palg m bãoko, m na rɩka n maan m faong rĩ-tɛɛgdga.

³⁷Yaa Pãng-Soaba la m na n wilg n kẽnda sẽn yɩ a Soaba, bãmb la m na seg ne zu-zẽkre!

³⁸M pʋʋga koaadba sã n yika zabr ne maam, sẽn bʋd-ba la sẽn ko-ba sã n ninga nintãm,

³⁹tɩ m sɛɛsa b pãnga n yaool n ka yao-b ye,

⁴⁰bɩ a tõdg kood wombo n yi gõose, bɩ a tõdg ki wekre n wek lamzʋʋdo. La woto me n baasd a Zoob goama.