Read SEBR SÕNGO, 1998 Zoob 32 Bible Online

Zoob 32 - SEBR SÕNGO, 1998 bible

Zoob 32

¹Neb a tãabã makame n kong n sĩnd b noor n bas a Zoob, bala a Zoob da tagsdame t'a yaa nin-tɩrga.

²La ade, a Barakeyɛl biig a Eliyu, Buz tẽng neda, a Ram doogẽ, kolga a Zoob ne sũ-puuri, a sẽn da gomd wala a sɩda yɩɩda Wẽnd dẽnna.

³A ra puuga a sũur ne a Zoob zo-rãmb a tãabã la rẽ yaa b sẽn ka tõog n leok a Zoob neere, tɩ lebg wala Wẽnd n sɩd ka bʋʋma.

⁴Bãmb sẽn wa n tar goama a Eliyu da maag a meng n sĩnd a noore, bala yẽ n da yaa bãmb fãa yao-zʋʋga;

⁵la yẽ sẽn wa n mik tɩ bãmba ka le tõe n leok a Zoob tɩ fɩ, a sũura puugame.

⁶Dẽ la yẽ menga, a Eliyu, a Barakeyɛl, Buz daoa biiga, sɩng goam n yeele: Mam yẽ sɩd ket n paoodame, la yãmb yaa nin-kẽemse. Dẽ yĩng la mam da zoet dabeem, n da ka rat n wilg yãmb m sẽn mi ye.

⁷Mam da yeelame: «Kãsem dãmba n na n gome, yʋʋm sẽn waoogẽ dãmbã n na n puk sɩda.»

⁸La sã n ya sɩda, bũmb a to la ninsaal paamda, Ninsaal paamda Wẽnd-Pãng-Soaba yam n lebg mita.

⁹Yʋʋm ka wat ne yam ye, leb n ka kʋʋlem n wat ne sẽn ya tɩrg bãngr ye.

¹⁰Woto wã, m na n kos-y lame tɩ y kelg maam: tɩ m dat n wilga mam me sẽn mi.

¹¹Sẽn ta marsã, m da teega yãmb goama pãnga, n da yoog m tʋbre n kelgd yãmb wilgrã, n kelgd ned kam fãa sẽn leokd a Zoob to-to.

¹²Mam sɩd da kʋmba m menga n kelgd-y neere, la bʋko! M yãeeme tɩ ned ba a ye ka leok a Zoob ye, ned ba a ye ka tõog n leok n koms a goama pãng ye.

¹³Bɩ y da le yeele: «Tõnd n tar yam: tɩ ka ninsaala, yaa Wẽnd bal n tõe n gom n lub-a.»

¹⁴Ad-y yẽ gomd ba a ye ka gomd sẽn tar yõod m yĩng ye, la mam me pa rat n leok-a wa y sẽn leok-a wã ye.

¹⁵Yãmb kell n yɛsa woto sɩɩ, n ka leokdẽ ye n ka tõog n yiis gomd y noorẽ ye.

¹⁶M yaas n gũume la y sẽn ka le gomdã, tɩ y zuka y sẽn da tar fãa y yãmẽ,

¹⁷leokrã, yaa maam n na n leok m dẽnna, m me na wilg m sẽn mi.

¹⁸Mam yẽ ka tõe n kong sẽn na n togs ye, m bãngr zulunga n tusd-m tɩ m gome.

¹⁹M pʋgẽ wã yaa wa bũmb sẽn wuk n dat n pusgi, yaa wa rãam sẽn wukd ko-wao-paalle t'a rat n pusgi.

²⁰La m sã n paam n gome m vʋʋsga na lebg naana, m na yaag m noor n sɩng ned kam fãa leobo.

²¹Mam kõn gom n sõng ned ba a ye ye; m kõn gom n bao n noog ned ba a ye sũur ye.

²²M pʋs n ka mi belg ned n noog a sũur ye, m pʋs n maan dẽ m Naanda na wẽneg n yãk m yõore.