Read SEBR SÕNGO, 1998 Zoob 37 Bible Online

Zoob 37 - SEBR SÕNGO, 1998 bible

Zoob 37

¹Saaga sã n tãse, m sũura deegd n digimdame, al tɩ ya waa a yɩk n yi-la m yãoogẽ.

²Bɩ y sĩnd n kelge; kelg-y b koɛɛga rãamde, kelg-y bʋʋr ninga sẽn yit b nengẽ.

³Yaa ween-vɩɩs a naasa fãa n deegd koɛɛgã n sokd taaba. La kãna sẽn tãoodã tata dũni wã sɛtmẽ.

⁴Saaga sã n yãgemd n looge la koɛɛg sẽn vũudi, sẽn pida ne ziira soab koɛɛga wat n sãta ne pãnga.

⁵Wẽnd koɛɛga sãtame n pukd b yel-bãna. B yel-bãna sɩd zʋʋga tõnd yama pãnga.

⁶Wẽnd yeta sẽn wẽnda sapɩlem faagã dʋʋg tẽnga, wa zom pɛɛlga. Dẽ poore yaa saluka, dẽ poore yaa bedg-bedge, saaga niidame n tõt yoogre,

⁷tɩ tʋʋmd buug ka le tõe n tʋm ye, tɩ neba na n tũ rẽ n bãnge tɩ Wẽnd n tʋmd b tʋʋmde.

⁸Rũng lebda a gãagẽ, sẽn gãe a bokẽ tʋgd n soonda a pẽkẽ.

⁹Sob-raoog yita nug rɩtgo, tɩ sob maasga yit goabga.

¹⁰Wẽnd fʋʋsda kooma zug t'a sɩng gĩsbu, kooma sẽn da ya koaagã ginda taok wa kutu.

¹¹Wẽnd pidsda sawata ne koom, la b pidsd-b-la ne sa-tãse la b tʋmd-b-la goabg la rɩtgo.

¹²B sɩngda gilgr yĩngri la zĩig ka yaagd n bas ye, b reegda b noorã n taas zĩig zãnga,

¹³bũmba fãa maanda wa b sẽn date b sikda b toolem ka, n puk b nonglem ka-sẽnẽ.

¹⁴Zoob, fo ra tog n maana gũusgu, f ra tog n kʋmsa f yĩnsi n ges Wẽnd bõn-bãna.

¹⁵Fo mii Wẽnd sẽn sigind b yɛl bãna to-to? Fo mii sawata sẽn yiisd sa-tãsa to-to bɩ?

¹⁶Pɩgs bʋg la b tar n laand yĩngri? Wã ka bãngr sẽn pid bãngr sɩda?

¹⁷Tẽnga sã n sɩng n na n namse n nams ne nug rɩtg sob-tʋʋlgã ad-y futa yeelgr lebgda sɛsga.

¹⁸Wẽnnaam sẽn waa n yɛdgd sa-gãongã b sẽn saas-a t'a lebg wala zũud nin-gɛtgã, fo n zĩnd be n sõng-b bɩ?

¹⁹Wilg maam d sẽn tõe n togsẽ Wẽnde? D meng sẽn zĩ ne lik ningã n pa tẽed d na walem bõn-sõng ye.

²⁰M sã n wa rat n gome m tog n deng n wilg-b lame bɩ? M sã n gom n sɛ, tog n pʋg n yeelame tɩ yaa a Zagl n gom bɩ?

²¹Ade, nif kamsg pʋgẽ bala vẽenem wat n menemame, sawatã n wat n luda wĩndga zãnga, tɩ sobg na n yik n pek sa-gãongã.

²²Vẽenem sẽn ya neer wa sãnem n wat n puk nug goabga. Yaa Wẽnd n gũbg b meng ne vẽenem vẽenem sẽn wat ne rabeem la yɩɩre.

²³Bãmb la tõnd sẽn ka tõe n kolg ned ningã, bãmb la Pãng-Soabã, sẽn pid ne naam la zemsgã, n pa sɩɩsd yell sẽn ka be a soab zug ye,

²⁴Dẽ me la ninsaal fãa rigd dabeem b taoore. Dẽ me la bãmb ka sulgd n gese sẽn yet-a t'a yama pida zãnga ye, Bãmb me ka sokd yẽ soab yell ye.