Read SEBR SÕNGO, 1998 Zoob 38 Bible Online

Zoob 38 - SEBR SÕNGO, 1998 bible

Zoob 38

¹Naaba-Wẽnd zĩnda sob-raooga pʋgẽ n leok a Zoob:

²Yaa ãnna soab n gomd goam faado la a wɩt yĩngr la tẽnga Naanda?

³Yik n sẽbg f kalle, la kolg ne sũ-keelem la f leok m sokre n paas m bãngre.

⁴Mam sẽn wa n vigind tẽnga tɩ fo bee yɛ? Leok-m wɛ, pid ne bãngr soaba!

⁵Fo mi ned ninga sẽn maga tẽngã, sẽn tar-a a yalem la a woglem?

⁶A sud n yɛsa bõe zugu. Ãn n kõ a yasra pãnga, ãnda n kɩt tɩ ãdsa na n naag taaba,

⁷n naag taab n pɩl tõd-beoogo pɩlbo tɩ Wẽnd kamba na n naag taab n yeele: «Ne y tʋʋmd-tʋʋmde!»

⁸Ãnna soab n yõk mogrã n page, a sẽn wa n yi paalem n yɛdg yaarã,

⁹m sẽn waa n dɩk wulgu n pil-a wa fuugu, n bao sawat wa fuugu n tʋɩ a gãaga?

¹⁰Maam n yiis noor n koms mogra pãnga, n lɛɛg n pag a noora kẽnkẽ, ne kʋɩlenga.

¹¹ [22†] Mam n yeel-a: «Da long n ta taoor ye! F ko-wiisã sã n yiki, bɩ b pa ka bala.»

¹²Fo sẽn doga tɛka, fo zoe n kõo yibeoog noor la f yals sõor a zĩigẽ bɩ?

¹³Fo n gãd tẽnga kɩrems a naasã n fugumd nin-wẽnsa bɩ?

¹⁴Tẽnga ne a teedã paamda neng a Yagda nugẽ. Fãa yitame n yɛs ne faongo.

¹⁵Nin-wẽnsã vẽenem bal n menemde, Kang ninga sẽn da zẽkda n na n wilg a pãngã n kaoogde.

¹⁶La fo kẽe mogrã pʋgẽ n taa a ko-nina bɩ? F gõ n saaga mogra tẽngr bɩ?

¹⁷B wilga-foom kɩɩmsa dooga noore kʋɩlens bɩ? Fo yãenda kʋɩlens niyns sẽn pag kũuma a likẽ wã bɩ?

¹⁸Fo nan bilga f yamẽ, tẽnga yalem sẽn yaa a soaba? Fo sã n mi a zãng bɩ f mak n wilg-ma.

¹⁹Vẽenema bee kɩreng bʋgo? Lika yẽ yita al yɛ?

²⁰Kẽng n tɩ gẽes-b b soolmẽ, f sã n mi sor ning sẽn dɩkd n ta be.

²¹Fo yaool n tog n mii sorã, tɩ f sẽn wa moog daar zãra.

²²M sok n gese: fo kẽname n ta kooma sẽn gĩs n gãneg zĩig ningã, fo yãee sapɩlma sẽn sam zĩig ninga?

²³Mam bĩnga rẽ fãa n gũud yɩɩr daare, zabre la tẽn-kũum daare.

²⁴Wĩntooga vẽenema tãoosd n teesda yɛ? Sob tʋʋlga yii yɛ n wẽed tẽngã?

²⁵Ãnna soab n tuk ko-soya n kõt sa-kooma? Ãnd n tuk sor n kõ sawata sẽn maand bʋʋrã

²⁶la a kɩt tɩ b niid n kõt ninsaalb kooma, n madgd we-raoogo la zĩ-peen-daaga,

²⁷n yũnugd tẽn-koɛɛnga tɩ mood buli n paam n yi?

²⁸Saaga sẽn niida tara ba bɩ? Meenema sẽn dʋʋgda yita yɛ?

²⁹Ko-gĩsdma ma la a bõe, la ãnda n dog fʋlfʋl-bi wã?

³⁰Kooma maanda a wãna n gũsi, n lebg kẽnkẽ wa kugri, mogra kooma maanda a wãn n gãd taab zãnga?

³¹ [23†] Fo tõe n paam n loe Susã ne taaba? La f lodg yĩngr tãb-biiga [24] sɛɛg sẽbdga?

³²Fo mii wakat bʋg la sẽoog na n deeg sɩpaolgo, la wakat bʋg la f na n kẽes noaaga ne a kambã?

³³La fo mi yĩngri teedã sẽn tũud noy niynsã? Fo n wilgd sẽn be-b tẽng zugã noy niyns b sẽn na n deege?

³⁴Fo sã n tees saagã n tãse, na sek tɩ sa-koom kiigi?

³⁵Yaa foo n tʋmd sa-tãsa tẽnga? Yaa f sẽn bool-ba la b leokda: «Ad tõnd wooo! Tõnd la f rat bɩ?»

³⁶Ãnna soab n kõ kʋɩl-pesg yam, ãnd n kɩt tɩ no-raoog tar pʋtẽere?

³⁷Ãnna n tõe n sõd sawatã neere, n kɩll yĩngri ko-yũusã tɩ b raag b koom,

³⁸tɩ wubsga lebg begdo, tɩ tãndaga boogdẽ?

³⁹Fo n baood rɩɩb n kõt gɩgemd yãang bɩ? Foo n yiisd a kamba kom,

⁴⁰kamb niyns sẽn wũg b gãasẽ la sẽn sor-b tuudẽ wã bɩ?

⁴¹Gãoobg rɩɩb yita ãnna nugẽ tɩ yẽ paam n kõt a kamba, b sẽn wat n tees Wẽnd n yãbdã, koma sẽn wat n yilimd b nenga?