Read SEBR SÕNGO, 1998 Zoob 40 Bible Online

Zoob 40 - SEBR SÕNGO, 1998 bible

Zoob 40

¹Soaala boola a Zoob n yeel-a:

²Wẽnd-Pãng-Soaba zabd-n-taaga tara bũmb n na n paas bɩ? Sẽn tara goam pererr ne Wẽnda ket n tara leokr bɩ?

³T'a Zoob me na n yeele:

⁴Soaala pãnga yɩɩda maam, woto wã m leokdame tɩ bõe? Mam sẽn tõe marsã, yaa m pĩ noor bala.

⁵M zoe n gomame, m kõn leb n paas ye, m zoe n leoka naoor a yiibu, m kõn le tõog ye.

⁶Wẽnnaam zĩnda sa-raooga pʋgẽ n yeel a Zoob:

⁷Sẽbg f kall kẽnkẽ wa gãndaoogo. M na n sok-f lame tɩ f vẽneg-ma.

⁸Fo ratame tɩ b le maneg n sɩng bʋʋdã, tɩ b mong maam bʋʋm n kõ-foom.

⁹Fo kanga tara Wẽnnaam kanga pãng bɩ, fo koɛɛga tõe n tãsa wala Wẽnnaam dẽnna?

¹⁰Aya! Bao naam la ziir n yeelge, yãg ne pãng la neerem.

¹¹Bas tɩ f sũurã puugi, gẽen wilg-m-meng rãmba tɩ b zug sulgi.

¹²Gẽen zẽk-m-meng soaba n sik-a, tab nin-wẽns n beds zĩig pʋgẽ bala.

¹³Naag b fãa n bus tomẽ, kɩt tɩ b mum b noor bʋg-tẽnga.

¹⁴Dẽ marsã la m menga na n pẽg-fo, fo nuga pãng sẽn kɩt tɩ f maan daooda yĩnga.

¹⁵Ges Rũn-bãnd a Beemot, [26] maam n naan-a wala m sẽn naan fooma. A wãbda yamdo wa naafo.

¹⁶Ges pãng ning sẽn be a kɩgbẽ, ges a pʋga gĩin sẽn wɩk wɩkr ninga.

¹⁷A nakda a zʋʋrã wala kʋk willi, a gɛyã gĩina kẽe taaba wa pãnenga.

¹⁸A kõaba keelem, zũud dẽnna, a sĩ-bi wã, kut sẽn toos ne zãar.

¹⁹M bõn-naandsa fãa sʋka, yẽ la m nand n yɩɩda maam bal a Naanda la a zoeta.

²⁰Dẽ la tãmsa me kõn dɩlg-a, b kõn dɩlg-a ne bũmb a to tɩ ka yamd ye. Pʋ-weesa rũms reemd n gilgd-a lame.

²¹A gãee mugnusa tẽngre, a sora bãada moodẽ.

²²Mugnusã n kõt-a maasem kʋɩlga yɩlsa sʋk la a vʋʋsda.

²³Kʋɩlga koom rat bɩ a yik n vũ, ad-y a ka tol n yɛɛsdẽ ye, Zʋrdẽ koom lim-a n tãag a noora me, ad-y a ka bʋʋd ye. Sẽn noom-a la rẽ.

²⁴A pukda a nina n getẽ tɩ f yõk-a wãn-wãna? N yãend ra-sɩleng yɛ n vʋdg a yõore?

²⁵ [27†] Ges koomẽ rũn-toaaga a Leviatã, [28] fo yõkd-a-la ne lɛoog bɩ, f lɛooga kõsda a zelemd bɩ?

²⁶Fo na n vʋdga a yõ-bogdã ne susutga bɩ f poogda yeera ne bãn-sɩlenga?

²⁷Foo la a na n kudg a kãntɩɩga la a gom ne f gom-noodo?

²⁸A na sak tɩ yãmb sed ne taaba, t'a lebg f sõgne, a vɩɩm zãnga?

²⁹Fo na sak n deem ne-a wa luiil sẽn ka yẽna, f na loe-a ne wĩir n kõ f kom-pugli tɩ b reemd ne-a?

³⁰Koos rãmb na sũ taab n wa kẽes-a raaga? Raadba na pas-a nemdã n weele?

³¹Fo na po a gãongã ne pɛɛma, la f na vʋdg a zug ne kãnd bɩ?

³²Tik a ne nug bala: fo na yẽ maoore, fo kõn le mak yɛs ye.