Read SEBR SÕNGO, 1998 Zoob 42 Bible Online

Zoob 42 - SEBR SÕNGO, 1998 bible

Zoob 42

¹A Zoob leoka Naaba-Wẽnd woto:

²Mam mi tɩ bũmb ka be y sẽn ka tõe n maan ye, y tõe n maana y sẽn tagsd fãa!

³ [29†] M ba bõe n sãbsd Wẽnd sẽn gũud dũni wã to-to n yaool n ka mi ba fɩ wã? M saag n goma m sẽn ka mi, sẽn yɩɩd-ma, tɩ yɛl kãens wʋmb le lebg toog n paase,

⁴ [30†] Y ra yet-m lame: kelg la f bas tɩ m gome, bas tɩ m sok-f tɩ f na leoke.

⁵Ad-y m sẽn da mi yãmb poorẽ, yaa b sẽn gom tɩ lʋɩ m tʋbrẽ bala la marsã, mam nin yãe-y lame.

⁶Woto wã m lebsda m noore m deegda m kongre la m sulga m menga, m faoola m menga n zĩ tomẽ la tompɛglemẽ.

⁷B sẽn gom ne a Zoob n sɛ, Wẽnd yeela Tema raoa, a Elifaz: «M sũur puuda ne foom la f tũud-n-taasã, tɩ yãmb pa togs sɩd mam poorẽ wala a Zoob ye.

⁸Dẽ yĩnga, bao-y lols a yopoe la pe-raad a yopoe, n bʋʋg a Zoob. Yãmb na n maana yũ-noog maoongo, a Zoob na n pʋʋsa y yĩnga; m na n deega a Zoob pʋʋsgã, m kõn dig yãmb n yiis m taoore ne y sẽn pa gom m yell neere wala rao kãngã.»

⁹Tema raoa, a Elifaz, Suwa raoa, a Bildad, Naamat rao, a Sofar tɩ maana wala Wẽnd sẽn wilg-bã. Wẽnd maan-b-la sugri, a Zoob yĩnga.

¹⁰ [31†] A Zoob sẽn yõk sɛɛg a tũud-n-taasa yĩngã, Wẽnd lebsa a Zoob a pĩnd paoongã naoor a yiibu.

¹¹A saam-biisi, kom-dibli la kom-pugli n paas sẽn da mi-ba a Zoob, wa-la a nengẽ n wa ges-a. B ra naaga taab n dɩtẽ, la yĩn-sirg ra tar-b lame, la b ra maagda a sũuri, t'a ra yãee toog Wẽnd nengẽ. Ned kam fãa kõ-a-la ligdi, la sãnem nug bĩnga.

¹²Wẽnd barka siga a Zoob zug n yɩɩg pĩnda. A paama piis tus piig la a naase, yʋgma tus a yoobe, niis tus a yi, bõn-yãans tusri.

¹³A paama kom-dibli a yopoe, kom-pugli a tãabo.

¹⁴Bi-pugl a ye pʋdame tɩ Walle: a to wã: a Yp-neere, a to wã: a Kirʋ.

¹⁵B pa yãend tẽnga pʋgẽ pagb sẽn ya neer wala a Zoob kom-pugli wã ye. B ba naag-b-la ne a kom-dibli wã n pʋɩ-ba a paoongo.

¹⁶Wẽnd sẽn mak a Zoob poore, b sẽn fɛɛs-a wã poore, a vɩɩnda yʋʋm koabg la pis-naase. A yãe-la a yagense, la a yagen-tʋbra-kẽese.

¹⁷A Zoob waa n kiime, n pid ne yʋʋma la raare. Tɛk la tɛka!