Read SEBR SÕNGO, 1998 Yɩɩla 10 Bible Online

Yɩɩla 10 - SEBR SÕNGO, 1998 bible

Yɩɩla 10

¹Bõe tɩ y maan wa y zãra ne-do, Soaala, n solgd y meng d pɛta wakato?

²Ad-y yaa a toog-ka-be-ne-Wẽnd soaba tɩtaama n yaand nimbãan-dãmbã. A toog-ka-ne-Wẽnde n tusd-b n lubd a bẽdgẽ.

³A tusd n lubame n tẽed t'a maana raoodo, a raaba sã n yaool n pidsi, ka Wẽnd la a pʋʋsd barka, yaa Wẽnd la a lɛɛg n laadẽ.

⁴A toog-ka-ne-Wẽnd pida ne yamsekre, A sẽn ka le baood Wẽndã, wã bal n be a noorẽ: «Wẽnd ka ye!» La rẽ sek-a lame.

⁵Yaa wa a raaba pidsda wakat buud fãa, la wa yãmb sẽn leokd bũmb ning yĩngrã zãra ne a wʋmbo, dẽ la a kẽnd n sẽoosdẽ la pursdẽ.

⁶Woto la a gomd a sũurẽ: «M paam n kɩɩ yẽgna, yel-beed buud kõn tol n pak-m ye.»

⁷ [13†] A noora pida ne kãab beedo, a raaba yaa tudg m to la m maan-a pãnga, a zelemd sẽn gomd yaa a zãmbã la a tʋʋm yoodã.

⁸Tẽn-bõonesa noorẽ la soondeda, n maneg n solg n na n kʋ ned sẽn ka yelle, ka võor dãmba la a gũusda.

⁹A maneg n solga a tʋgrẽ n gũusd wa bõnyẽega, a sorame n na n bri zu-bʋk soaba; f lʋɩ a bẽdgẽ, t'a vu n looge.

¹⁰Ad-a sẽn sore, ad-a sẽn vũnumdi n na n yɩk ne a pãng fãa n lʋɩ n yẽege.

¹¹A bee tẽngr n maane: «Wẽnd yĩmame, tõnd solga b nini, b ka ne fɩ.»

¹²Yik-y yã, Soaala, zẽk-y y nugu, da yĩm-y nimbãan-dãmba yell ye!

¹³Pʋs n yaa bõe yĩnga la a toog-ka-ne-Wẽnd laad Wẽnd la a yetẽ: «B na n yi n gẽes-m-la yɛɛnẽ?»

¹⁴A yĩmame bal tɩ y yãenda a tʋʋm yoogã la a sẽn wa ne naong ninga, a yĩmame tɩ y kolda bũmb fãa, a yĩmame tɩ ka yõod soab teega yãmba, a yĩmame tɩ kɩɩb rɩt mɛdga, yãmb n pʋgd n punda bɩɩm.

¹⁵Yik-y yã, Soaala, n menes a toog-ka-ne yãmb dãmba! Tɩ y sã n wa yik n baood-b ne b zɩtma bɩ y ra yãend fɩ ye.

¹⁶Wẽnd n so naam beoog sẽn wate: nin-dẽgdã kõn le kell y soolmẽ ye.

¹⁷Soaala, yãmb deega a ka mi zẽk-m-meng kosgo, n kengd a sũuri, yãmb yoogda y tʋbre n kelgdẽ,

¹⁸woto kɩɩb-bil la ka neng soaba lebda b zakẽ ne b bʋʋm, woto me la y na n sɛɛs tẽng zugu zãmb la pãn-tõog buud fãa.