Read SEBR SÕNGO, 1998 Yɩɩla 105 Bible Online

Yɩɩla 105 - SEBR SÕNGO, 1998 bible

Yɩɩla 105

¹Kils-y Soaala, pẽg-y b yʋʋre! Ta-y bu-zẽmba sʋk n moon b sẽn maane.

²Yɩɩl-y b yĩnga, sigl-y reem b yĩnga, le togs-y b tʋʋm-bãna fãa.

³Bɩ y zug roog yĩngri, b yʋʋra sẽn paamd pẽgra yĩnga, la y sũur yɩ noogo y sẽn baood b zĩiga yĩnga.

⁴Bao-y Soaala ne b pãngã, bao-y b nenga vẽenem.

⁵Tẽeg-y b tʋʋm-bãna la koees niyns sẽn yi b noorẽ.

⁶Yãmba, b sõgna a Abraam buudã, maan-y tẽegre, tẽeg-y yã, Zakoob kamba, b kom-nongdsã.

⁷Bãmb la Soaala tõnd Wẽnde, bãmb n dɩt naam dũni wã zugu.

⁸B tẽega b zooda yelle, zood ning sẽn yõg yʋʋm ka tɛka yelle.

⁹ [122†] Zood sẽn yõg ne a Abraam, kãabg sẽn kãab noogo a Izaak yĩnga,

¹⁰tẽeg-y b zelemd sẽn yiis a Zakoob yĩnga, tẽeg-y b sẽn yals daar fãa a Israyɛl yĩnga.

¹¹ [123†] Ad-y kãabga kãaba woto: «M kõt-f-la Kanaã tẽnga, yaa fo ne f yagensa pʋɩɩr la rẽnna.»

¹²Dẽ tɩ b sõora nan paooda, da yaa neb a wãn bala sẽn yi b tẽngẽ.

¹³B ra yita buudu n tɩ kẽ buudu, n yi buud a ye soolmẽ n tɩ kẽ a to rẽnnẽ.

¹⁴B pa bas tɩ bu-zẽmba yaal-b ye, b tol n sɩbga dĩm dãmb, bãmb yĩnga.

¹⁵ [124†] B ra yeelame: «Da sɩɩs-y m sẽn welg b rãmb toora ye, da sɩɩs-y m bãngdba ye!»

¹⁶ [125†] B boola kom t'a wa lʋɩ tẽngã, rɩɩb buug ra ka le yãet ye.

¹⁷ [126†] Ned la b reng n tʋm b taoore: a Zozɛf, yɩ-la a Zozɛf la b ra koos wa yem-daoogo.

¹⁸B bao bãng n sog a karga, n bao bũmb n sog a kokore,

¹⁹ [127†] la a gũu woto n tãag wakat ninga Wẽnd meng sẽn wa n yiis-a yellẽ.

²⁰ [128†] Dĩma kõo noor tɩ b yiisa bãngẽ, Ezipt dĩma kɩtame tɩ b yiis-a roogẽ.

²¹ [129†] A tol n kɩtame t'a lebg a zaka soaala, n lebg a sẽn so bũmb ning fãa soaala.

²²A paamame tɩ rĩm biis wa kẽ a tãpẽ, n paam t'a yama nek nin-kẽems rẽnna.

²³ [130†] A Israyɛl tũ rẽ n kẽ Ezipt. A Zakoob wa n lebga sãan a Kam tẽnga.

²⁴Wẽnd sõnga a buuda t'a fɩɩge, a pãnga waa n yɩɩga a bɛɛba rẽnna.

²⁵ [131†] Wẽnd tedga bɛɛba zʋgo tɩ b na n yik n maan beem ne b buudã, tɩ b na n yik n zã a Israyɛl ne wẽnem.

²⁶ [132†] Dẽ me la b tʋm b sõgna a Moyiiz n paas a Aarõ, a sẽn da yãke.

²⁷Ezipt tẽnga b maana bõn-bãn niynsi Wẽnd sẽn kõ-b noor tɩ b maan a Kam tẽn-peelmẽ.

²⁸ [133†] Lik la b tʋm yã la a waame tɩ b sɩng marsã n bas no-koeemde.

²⁹ [134†] Kooma tekame n lebg zɩɩm la zĩma tũu rẽ n ki.

³⁰ [135†] Loms yãmba b tẽngã n tãag b dĩma roogẽ.

³¹ [136†] B sẽn le gome, la keooda sẽn wa, tɩ keooda loog tɩ rũm-pigli wa reeg n yãmb zãnga.

³²B mong-b-la saaga n kõ-b sapɩlem yɩɩ bugum la bug-walem la saaga ni yã.

³³ [137†] B yorga b bugsuntund la b kankamse, b tol n kʋʋsa tẽnga tɩɩse.

³⁴B sẽn gom yɛsa sʋy waame, n gãneg b gɛl n wek b kamba,

³⁵ [138†] la bãmb n sɛɛs tẽnga yamdo la tɩɩsa biisi.

³⁶ [139†] B kʋʋ tẽnga kom-dẽemse. Bãmb n yaool n da ya yõod ninga b sẽn da paam ne rogem pãnga.

³⁷Wẽnd yaool n yiisa b neba wa rakãagba, ne wanzurf la sãnem, tɩ b kẽnd sakdẽ.

³⁸ [140†] B loogra pidsa Ezipt ne sũ-noogo tɩ b sẽn loogã b yɛɛsga kolga weoogo.

³⁹ [141†] B yɛdga sawadgo sẽn na n lebg b maasem tɩɩga, la sawadga widga bugum n kõ-b vẽenem yʋngo.

⁴⁰ [142†] B neba sẽn kose, sobg waa ne pitr-lʋɩɩse; yĩngr bura me la b paam n dɩ n tɩge.

⁴¹ [143†] Pĩig sẽn wẽ n wurgi, koom dʋʋgame, la kʋɩlg n tuk a sore n kẽed pʋ-weese.

⁴²B tẽega b sẽn da yiis gomd sõng ninga b sõgen, a Abraam, yĩngã.

⁴³B yiisa b buuda ne kɩdengo, b yiisa b sẽn tũus b rãmba tɩ b kaasd sũ-noogo.

⁴⁴ [144†] Bu-zẽmba tẽns la b rɩk n kõ-ba, b tʋʋma yõod la b tigs n kõ-ba.

⁴⁵B kos-b lame bala tɩ b reeg b noorã la b tũ b rog-n-miki. Wẽnd paam pẽgre!