Read SEBR SÕNGO, 1998 Yɩɩla 118 Bible Online

Yɩɩla 118 - SEBR SÕNGO, 1998 bible

Yɩɩla 118

¹ [175†] D kils Soaala tɩ b pida ne sõmblem, la b nonglma ka be sɛɛb ye.

²A Israyɛl le yeel n paase: B nonglma ka be sɛɛb ye!

³A Aarõ rooga le yeele: B nonglma ka be sɛɛb ye.

⁴Sẽn zoet-b Soaala le togse: B nonglma ka be sɛɛb ye!

⁵Tãb-biisa sẽn waa n gũbg maam, m boola Soaala la b leok-m lame, n fãag-ma.

⁶ [176†] Soaala bee m poorẽ, rabeem sɛɛme. Bõe la ninsaal tõe n le maan-ma?

⁷Soaala be-la m poorẽ n na n sõng-ma la m yĩgsda m bɛɛba.

⁸Teeg Wẽnd sãoo teeg ninsaala.

⁹Teeg Soaala sãoo teeg rĩm biisi.

¹⁰Bu-zẽmba gill da gũbg-m lame, la Soaala yʋʋr yĩnga, m sẽeg-b lame.

¹¹B gũbg-m lame, n gũbg-ma, la Soaala yʋʋr yĩnga, m wes-b-la wa raado.

¹²B gũbg-m-la wa kãnenkãase la b wẽneg n kii wa gõaag-tuug bugum, Soaala yʋʋr yĩnga, m da pʋgd n pãbd-b lame.

¹³B tus-m lame n na n lubi la Soaala kok-m lame.

¹⁴ [177†] Bãmb n kõ-m pãnga, bãmb n tãs m zabr tãsga. Bãmb yĩng la m maan raoodo.

¹⁵Nin-sõma rot pida ne sũ-noogo, b sẽn paam fãagra sũ-noogo, n gomda: «Soaala zẽka b ritgã n zabe la bãmb n tõoge.

¹⁶Wẽnd zẽka b nug rɩtgo la b rɩtg tʋma a tʋʋma.»

¹⁷Ayey! M kõn ki ye, m na n vɩɩndame la yaa Wẽnd tʋʋma la m na kilsi.

¹⁸Sɩbgre, Wẽnd sɩbg-m lame la b pa bas-m ne kũum ye.

¹⁹Nin-sõma sẽn tũud noor ning n tat yãmbã, pak-y no-kãnga tɩ m kẽ n kaas m Soaalã.

²⁰Soaala roog noor pakame, bɩ nin-sõma wã loog n kẽ!

²¹M pẽgd-y lame tɩ y leok-m lame la yãmb maasmẽ m maana raoodo.

²² [178†] Kugr ninga tãn-metba sẽn da bas kɛɛngã kug kãng la b rɩk yã n wa ne rooga pãng la a neerem.

²³ [179†] Dẽ yaa Wẽnd tʋʋmde la yaa tʋʋmd bãnde.

²⁴D pẽg raara Wẽnd sẽn kõ tõndã. A pids-du ne sũ-noog la langre.

²⁵ [180†] Soaala, sõng-y-d tɩ d tõog d bɛɛba. Sõng-y-d tɩ d maan daoodo!

²⁶ [181†] Sẽn wat-a Soaala yʋʋr yĩnga paam pẽgre! Yaa Soaala roogẽ la d be n pẽgd-ba.

²⁷Soaala yaa Wẽnde, bãmb n kõ-d vẽenem. D kaoog willi n zã d nugẽ n sɩng gilgri, d gilg n ta maan-kugra menga.

²⁸Yãmb la m Wẽnde tɩ m kilsd-y. Yãmb la m Wẽnde tɩ m zẽkd y yʋʋre.

²⁹D kils Soaala tɩ b pida ne sõmblem la b nonglma ka be sɛɛb ye!