Read SEBR SÕNGO, 1998 Yɩɩla 119 Bible Online

Yɩɩla 119 - SEBR SÕNGO, 1998 bible

Yɩɩla 119

¹Zu-noog soaba la nin-tɩrga sẽn deegd-a Soaala noore.

²Sẽn tũud-a b sẽn yalse, n sakd noora zãnga.

³Yẽ soab n vɩ wa Soaala sẽn date n ka maand wẽng ye.

⁴Soaala n yiis b noore la d tog n tũ-a-la neere.

⁵Sõng-y-m-tɩ m kẽn tɩrga, sõng-y-m tɩ m wɩng n tũ zãnga,

⁶woto m kõn kong m sẽn datã, m sã n modg n tũ-ba a yeyn-ye.

⁷M na pẽg-y ne m sũur fãa. M miime tɩ y sẽn yals fãa yaa sõmbo.

⁸M na modg n deeg y noorã, la bɩ yãmb me keng m daoodo.

⁹Bi-bɩɩg rat t'a kẽnd yɩ tɩrga bɩ a reeg Soaala noor.

¹⁰M data ne m sũur fãa n tũ y raabo, da bas-y-m tɩ m bʋdg ye.

¹¹M sã n kẽnd n ka yĩmd y saglsã m kõn tol n beeg-y ye.

¹²Y barka, Soaala, tɩ y wilg-m-la y raabo.

¹³M zĩi n sõta m yamẽ y sẽn gɩdg bũmb ning fãa.

¹⁴Y noora reegr pids-m-la ne sũ-noogo, yaa arzɛk kẽeng la m paam yã.

¹⁵M na n zĩnd n bilga y raabo n tɩg sor ning y sẽn tuk m yĩnga.

¹⁶Y noora tũudem la m sũ-noogo, m kõn yĩm y gomda ye.

¹⁷Maan-y neer ne y yambã tɩ m le yik n tũ y sẽn togse.

¹⁸Ypk-y m nina tɩ m yãend neere, m yãend y noora sẽn pid ne bõn-sõma niynsã.

¹⁹M yaa sãan tẽng zug ka, da solg-y maam y noya ye.

²⁰Bɩ m yam kẽ y sẽn yalsã la y sẽn yet tɩ m maan fãa.

²¹Y kãabda y sɩbgr tɩtaam dãmba la b fãa na n kẽe moogo.

²²M sẽn tũud y noora zãngã bɩ y ra bas tɩ b wa la-ma la b sãbs-m ye.

²³Rĩm biisa nong bɩ b yik n maan beem ne maam, Wẽnd sẽn yals bũmb ninga la m tũuda, b sẽn gɩdg bũmb ninga la m gɩdg m menga.

²⁴Y noyã pʋs n noogda m sũuri, bãmb n sõngd-m tɩ m vɩ neere.

²⁵M faoolame n gãe tomẽ wa-y n vʋʋg-y-ma wa y sẽn kãab-ma.

²⁶M wilg-y-la m vɩɩma sẽn yɩ a soaba n dat leokre la y leok-m lame. Kell-y n wilg-y maam y raabo.

²⁷Wilg-y maam y sẽn gɩdg bũmb kẽera võore, sõng-y tɩ m bilg fãa m yamẽ.

²⁸M sũur sãamame tɩ m tar yãbre, keng-y m vɩɩma wa y sẽn kãabe.

²⁹Zãag-y-m ne zirẽ-beedo, paalg-y maam y noora pʋgẽ.

³⁰M deegame tɩ m tog n tũ-la y noya. M na tũ y sẽn yalse.

³¹M saka y sẽn date, Soaala, bɩ m da yãend paoogr ye.

³²M tũuda y noya faasg-faasga, tɩ m yama tar yẽegre n dabda.

³³Wilg-y maam y sẽn gɩdgã tɩ m gɩdg m menga la m vɩɩnde.

³⁴Wilg-y maam y raaba neere tɩ m na pids-a ne m sũuri.

³⁵Wilg-y maam y sẽn date, tɩ m nonga y sẽn nonge.

³⁶Pa sẽn noom maama n so taoor ye, yaa sẽn noom yãmba la m sũura pʋgda.

³⁷M da belg m meng n pʋg yell yaals ye, sõng-y tɩ m vɩɩnd y noora pʋga.

³⁸Pids-y y kãabgo y yamba yĩnga, tɩ neba na rig y rabeem.

³⁹Y sẽn yalsa noom-m lame, zãag-y-m bal ne bɛɛba tʋʋre.

⁴⁰M sẽn nong y sẽn kõ-m noy-niynsã, bɩ m paam y sõmblema n tõog n vɩɩnde.

⁴¹Kõ-y maam y nonglem kõ-y maam y fãagrã wala y sẽn kãabe.

⁴²M na tõog n leok sẽn tʋʋsd-b maama la m leokra na n tũu yãmb dẽnna.

⁴³M noora ra yiis bũmb a to tɩ ka yãmb sẽn togs ye, tɩ m tara y kãabga saagre.

⁴⁴M na n tũ y noorã n ka vʋʋs ye dũnna la beoogo.

⁴⁵M na n kẽna faasg-faasga, tɩ m tũuda y sẽn wilgi.

⁴⁶Dĩm dãmb taoore m na goma y noora sẽn gɩdge, la m kõn paam yãnd ye.

⁴⁷Yãmb daaba maneg n pids-m-la ne sũ-noogo, sɩda m nong-y lame.

⁴⁸M kokda y sẽn yiis noor ning fãa tɩ m yama kẽ-b la zãnga.

⁴⁹Tẽeg-y y sẽn yeel y yambã, tɩ gomd kãng n wa ne m saagre.

⁵⁰M sã n zĩ ne toogo, yaa yãmb nengẽ la m paamd belsgo, yãmb noya n le yãngd m vɩɩma.

⁵¹Wilg-m-meng rãmba yik n laada maam, la m yaool n ka bʋdg ye.

⁵²M tẽra y sẽn yals al daar zãra la yãmb daaba pidsgu n wat ne m sũ-noogo.

⁵³M sũur yikda nin-wẽnsa taoore, la yaa b sẽn bas y sorã.

⁵⁴Yãmb noya n lebg m yɩɩl tɩ m zodgdẽ, m pa-weera tẽngẽ.

⁵⁵Yʋngo m tẽegda y yelle, Soaala, m kotame n tũ y noya.

⁵⁶Tʋʋmd a ye bal la m kõ m menga: yaa y noora reegre.

⁵⁷M wilga yãmb m zu-noog pʋɩɩra sẽn yaa a soaba, ya m tũ y noora bala.

⁵⁸M gũuda ne m sũur fãa tɩ y tees maam y nenga, m tẽed tɩ y na maan sugr wa y sẽn kãabã.

⁵⁹M gesa m sẽn tũud sor ningã, m kõn sak n kẽn n zãag ne y noya ye.

⁶⁰M kẽna ne yãgbo, m ka vʋʋs ye, la yaa y sora bala la m dɩk yã.

⁶¹Nin-wẽnsa yõk-m-la b bẽdgẽ la ad-y b pa tõog tɩ m yĩm y noora ye.

⁶²Y sẽn yalsa yaa sõmbo tɩ m yikd ne yʋngo n pʋʋsd-y barka.

⁶³M yõga zood ne neb niyns fãa sẽn zoet b yãmbã, n deegd y noya.

⁶⁴Dũni wã gill pida ne y nonglma kaseto, wilg-y maam y raabo.

⁶⁵M sũ-nooga sɩd yi-la y nengẽ wala y sẽn da kãab-ma, Soaala.

⁶⁶Wilg-y maam tɩ m bãng y sẽn yalsã n maneg n pẽge.

⁶⁷M sẽn waa n nan ka wʋm toogo m da bʋta moogo, marsã ya y sora bal la m tũuda.

⁶⁸Soaala pida ne nonglem n maand-m neere, wilg-y maam y noya.

⁶⁹Wilg-m-meng rãmb n yiki n sãam m yʋʋr ne b rõadga, m yaool n tũuda sora ne m sũur fãa.

⁷⁰Nin-wẽnsa sũur gũsa wa kaam; sã n ya maam, y raaba pidsgu n wat ne m sũ-noogo.

⁷¹M sẽn dɩ tooga waa ne m nafre, tɩ m zĩnd n vɛɛsa y noorã.

⁷²Sagls niyns y sẽn yiis y noorẽ wã, m pẽgd-b lame n yɩɩd sãnem la wanzurfu.

⁷³Yãmb nusã n yag maam n zĩndgi. Kõ-y-m yam tɩ m zãms y sẽn dat ne maam.

⁷⁴Sẽn zoet-b yãmba sã n yãend maam b sũur yaa noogo; b neeme tɩ ya yãmb bal la m teeg yã.

⁷⁵M deegame, Soaala, tɩ y sẽn yalsa yaa sõmbo, y talla bʋʋm y sẽn waa n bas tɩ bɛɛba laad-m.

⁷⁶Bɩ y pʋlenga sẽn ka vaanda bʋk m sũuri, tɩ boto la y rat m yĩnga.

⁷⁷Bɩ y kũm m nimbãanega la y sõng tɩ y noora paalg-ma vɩɩm sõnga so-raoogẽ.

⁷⁸Bɩ sẽn dõd-b maam zirẽ-beeda loog ne yãnde, Soaala nee m sẽn bʋgsd b noora seem ninga.

⁷⁹Sẽn zoet-b yãmba lɛɛg n wa m nengẽ tɩ m zãms-b yãmb daabã.

⁸⁰Mam me na modg n deeg y noya neere n da wa paam yãnd ye.

⁸¹M zĩndame n kaoos n gũud y fãagre, ad-y m da saagda y kãabgã.

⁸²M nina waa n yiigdame tɩ m ket n vɛɛsd y noya. Dẽ me la m sokda: «Y na n wa bʋka m sũur da-bʋre?»

⁸³M waa n lebga wa ko-waoog sẽn kʋɩ n weglme, ne rẽ fãa m pa yĩm y noya ye.

⁸⁴Ya rasma a wãn yɛs la m na n le gũ? Da-bʋr la y na n yik n wɩbg m bɛɛbã?

⁸⁵Wilg-m-meng rãmb n kɩɩs y noorã n yik n bẽd b bẽdgo.

⁸⁶Y noya fãa pid n daanda ne nonglem. Sõng-y-ma tɩ neb n pʋgd-m ne raab wẽnga.

⁸⁷M yɛɛ zãnga, b lub-m lame la bala, la m ka zãgs y sora tũudem ye.

⁸⁸Y nonglma sẽn ka be sɛɛba yĩnga, wa-y n vʋʋg-y-ma tɩ m na tũ y noor sẽn togse.

⁸⁹Soaala, y noora la m wĩndga t'a zao yĩngri n vẽnegd-m.

⁹⁰Y nonglma pʋgd-d-la zamaan ne zamaana; wala y sẽn vigl tẽngã, y nonglma me vigla boto.

⁹¹Bũmb fãa yɛsa a zĩigẽ wa y sẽn tʋlge; dũni wã yaa yãmb sõgne.

⁹²Y noora sã n da ka pids-m ne sũ-noogo, pɛt n da na n kʋẽ maam.

⁹³M kõn yĩm y noya abada tɩ bãmb n tong m yõore.

⁹⁴M yaa yãmb soolem, fãag-y-ma, y sora la m bao yã.

⁹⁵Nin-wẽnsa tẽeme tɩ b na n kẽes-m-la moogo, m tara gũusgu ne y sẽn wilgi.

⁹⁶M yãee bõn-sõng fãa ne a sõmblem tɛka, yãmb noora sõmblem tɛk bal la m pa yãende tɩ yẽ la a sõmblem ka tar tɛka.

⁹⁷Ad-y m nonga y noora wʋsgo, m bilgd-a-la m yamẽ beoog sẽn vẽege.

⁹⁸Y noora la m paoong wa fãa fãa, tɩ m pẽgda, a kõ-m-la yam n yɩɩg m bɛɛba.

⁹⁹M yama zulgame n yɩɩd m karen-saam-dãmba, la rẽ yaa m sẽn zĩnd n bʋgs y noorã m yamẽ.

¹⁰⁰M mii yɛla welgre n yɩɩd nin-kẽemsã tɩ m deega y noya fãa.

¹⁰¹M pa saag n dɩk wẽng sor ba a ye, sẽn na n yɩlẽ n tũ y raabo.

¹⁰²M pa zãgs y sẽn yalsa ye, tɩ yãmb n yɩ m karen-saamba.

¹⁰³Y noya nooma m noorẽ, a noomame n yɩɩd sɩɩdo.

¹⁰⁴Y gomda yĩnga m tara yell ne a võore, la m kisa zirẽ-beeda soya.

¹⁰⁵Y gomda yaa vẽenem m nao-kẽndr yĩnga, a yaa vẽenem sẽn vẽnegd m sore.

¹⁰⁶M wẽename la m kõn lebs m noor ye, tɩ m na n tũ-la y sẽn wilg ne y zemsgo.

¹⁰⁷M pãnga sɛɛ zãnga, Soaala, bɩ y gomda le wa vʋʋg-ma.

¹⁰⁸Reeg-y yã, Soaala, m pʋʋsgo, wilg-y maam y sẽn date.

¹⁰⁹Da tõe n tũla m yõor yãkre la ne rẽ fãa m pa bas y sora tũudem ye.

¹¹⁰Nin-wẽns n bẽd b bẽdgo, b pa yõk-ma tɩ m pa zãag ne y sora ye.

¹¹¹Y noya sẽn kõ-m bãngr ninga la m buud pʋɩɩre. M sũur yaa noogo.

¹¹²M modgdame n na n deeg y noore. Be la m dolb na n yi.

¹¹³M pa rat n be zĩis a yi wa kazukemd ye, y noora bal la m nonga.

¹¹⁴Yãmb la m soondg zĩiga la m gãongo, m saagda y kãabgã.

¹¹⁵Nin-wẽnse, da pʋg-y-m ye, yaa m Wẽnda noor la m dat n tũ.

¹¹⁶Wala y sẽn yiis y noorẽ, Soaala, yɩɩ-y m teegda tɩ m na vɩɩnde. M da gũ sõngrã n kong ye.

¹¹⁷Teel-y-ma tɩ m na põse la m kõn yĩm y saglsa ye.

¹¹⁸Yãmb basa sẽn da bʋdg-ba n kẽed moogã, tɩ b manesma fãa ra yaa tuud taaba.

¹¹⁹Noora nonglem n be yõodo, la nin-wẽnsa sẽn ka nong-a wã, Wẽnd lobda bãmba wa boaag pʋgẽ sagdo.

¹²⁰M sã n be yãmb taoore m yĩnga rigda rabeem, m yɛɛsda y sẽn yalsã.

¹²¹M vɩɩma tũu zemsg so-tɩrga. Da bas-y-ma m bɛɛba nusẽ ye.

¹²²M maanda saagr tɩ m na yãend sũ-noogo, tɩ wilg-m-meng rãmba kõn wõd-m ye.

¹²³M yiiga m nin n gũ y fãagre, la sõmblem sore m sẽn na n dɩke.

¹²⁴Maan-y ne y yamba wala y nonglma sẽn sede, zãms-y maam y raabã.

¹²⁵M ya-la y yamba, puk-y m yama zãnga tɩ m na bãng y noya gilli.

¹²⁶Soaala, y yaa n tog n maana bũmbu tɩ neba tõdga y noorã.

¹²⁷Bãng-y tɩ m nonga y noorã, m nong-a lame n yɩɩd sãnem sẽn yɩlge.

¹²⁸M deegame tɩ fãa zemsa noora pʋgẽ la m kisa zirẽ-beeda soya.

¹²⁹Y sẽn yalsa yaa sõmbo, dẽ me la m tũud bãmba.

¹³⁰Sẽn wʋm-a y sẽn togsa fãa paamda vẽnegre, yam bõonesa rãmb fãa yam wekdame.

¹³¹M yaaga m noor n gũud n na vel-ba tɩ m nong-b-la fãa.

¹³²Wẽnemd-y n tees-ma la y maan m sugri, tɩ woto la y maand ne sẽn nong-b yãmb yʋʋrã.

¹³³Y gomda wa paas m karsa keglem, da bas-y tɩ wẽng buud tõog-m ye.

¹³⁴Fãag-y-m ne ninsaalba wẽoogre, tɩ m na reeg y noya.

¹³⁵Bɩ y yamba paam tɩ y nenga vẽenem tʋʋs-a, tɩ m tũ rẽ n bãng y raabã.

¹³⁶Ad-y m nintãm dʋʋgdame m sẽn ne tɩ b pa tũud y noorã.

¹³⁷Soaala, yãmb pida ne zemsgo, la y sẽn yet tɩ b maan fãa yaa sõmbo.

¹³⁸Y kõ-d-la noore la y tũ-la y sõmblema la y kãabga sẽn ka vaandã.

¹³⁹M sũura puuda wʋsgo m sã n ne tɩ m bɛɛba yĩmda y saglsã.

¹⁴⁰Bũmb ka kalem y noorã n pa zems ye, la yaa rẽ me la y yamba nong-a.

¹⁴¹Ba m sẽn waa n ka pãnga tɩ b pa nand-ma, m ka yĩm y noya reegr ye.

¹⁴²Y sẽn yals bũmb ningã, y yals-a-la daar fãa yĩnga la y noora tũuda sɩda.

¹⁴³M sega yɩɩre la sũ-beedo, la y noora pids-m-la ne sũ-noogo.

¹⁴⁴Y tũ-la y sõmblema sẽn ka teemna n na n gome bɩ y puk m yama zãnga tɩ m na vɩɩnde.

¹⁴⁵M bool-y-la ne m pãng fãa, Soaala, leok-y-ma! M na maan y sẽn date.

¹⁴⁶M bool-y lame, fãag-y-ma, m na tũ y noorã.

¹⁴⁷M bool-y-la tõd-beoogo tɩ m saagda y kãabgã.

¹⁴⁸M nekame tɩ beoog nan ka vẽeg ye, la yaa sẽn na tõog n bʋgs y goama.

¹⁴⁹Tũ-y y nonglma n kelg m koɛɛga, sõng-y tɩ m vɩɩnd wa y sẽn yalsã.

¹⁵⁰Ad-y b watame, neb niyns sẽn namsd m vɩɩma la sẽn kẽnd n zãagd ne yãmb noorã.

¹⁵¹Yãmb yẽ pẽeme, Soaala, la y sẽn wilga fãa yaa sɩd bala.

¹⁵²M mii al daar zãra tɩ y sẽn yals y noya yaa yʋʋm sẽn ka be sɛɛb yĩnga.

¹⁵³Ges-y m pɛta, fãag-y-ma, ad-y m pa yĩm y noora ye.

¹⁵⁴Bʋ-y m bʋʋdã n kõ-ma, Gom-y n le nek m vɩɩma.

¹⁵⁵Nin-wẽnsa zãr ne fãagre, tɩ b pa bao n na n pids y raaba ye.

¹⁵⁶Soaala, y nimbãan-zoeera labsa, wa-y n vʋʋg-y-ma tɩ rẽ la y kãab-m.

¹⁵⁷Ad-y m bɛɛba waooga, sẽn tar-b maam n namsdẽ wã labsa, ne rẽ fãa, m pa bʋdg sor ye.

¹⁵⁸M yãenda zirẽ-be-rãmba la m sũur puugame tɩ b pa tũ y noora ye.

¹⁵⁹Ges-y m sẽn nong y noya to-to sõng-y tɩ m vɩɩnd wala y sẽn kãab-m.

¹⁶⁰Y gomd fãa tʋɩ-la a gãag, sɩd zugu; y sẽn yals yaa daar buud fãa yĩnga.

¹⁶¹Rĩm biisi n yik n namsd-m tɩ m ka wʋmd a võor ye. B bãng tɩ m sẽn zoet yaa yãmb bala.

¹⁶²Wala ned sẽn paam laog n wʋk t'a sũur ya noogo, woto la y noora noogd m sũuri.

¹⁶³M sẽn kis wa fãa-fãa ya zirẽ-beedo, m sẽn nong yaa y noorã.

¹⁶⁴Beoog sẽn vẽeg fãa, m pẽg-y-la naoor a yopoe, y noy-sõma wã yĩnga.

¹⁶⁵Sẽn nong-b yãmb noora zĩi ne laafi, gɩdgr ka le ket b yĩng ye.

¹⁶⁶Soaala, yaa yãmb nengẽ la m gũ m fãagre. M tũ-la y noya fãa.

¹⁶⁷M deega y saglsã, m sɩd nong-b lame.

¹⁶⁸M maana y sẽn date, m zãgsa y sẽn kisi, m sẽn tũ soy niynsa fãa rɩga y taoore.

¹⁶⁹Bɩ m kɛlenga sãd n ta yãmba, Soaala wek-y m yama n kõ-ma wa y sẽn kãabe.

¹⁷⁰Bɩ m kosga lʋɩ y tʋbrẽ fãag-y-ma wala y sẽn kãabe.

¹⁷¹Bɩ m nora sɩng y kilsgu tɩ yãmb la m karen-saamba.

¹⁷²Bɩ m zelemda yɩɩl y noya tɩ y noya fãa wata ne sõmblem.

¹⁷³Bɩ y rɩtga wa sõng-ma, yaa y noora la m dat n tũ.

¹⁷⁴Yaa yãmb fãagra la m bõsda, Soaala, y noora noogda m sũuri.

¹⁷⁵Sõng-y tɩ m vɩɩnd y pẽgra yĩnga, Sõng-y-m ne y noya reegre.

¹⁷⁶M saada zĩis fãa wa pe-yãang sẽn meneme, bao-y y yamba t'a ka yĩm y noora ye.