Read SEBR SÕNGO, 1998 Yɩɩla 18 Bible Online

Yɩɩla 18 - SEBR SÕNGO, 1998 bible

Yɩɩla 18

¹ [17†] Yɩɩn-kãnga bee yɩɩla naab sebrẽ. A Daviid n gʋls-a; yɩɩ Soaala sẽn fãag-a raare ne a bɛɛbã la a Sol menga.

²A Daviid yeelame: M nong-y lame, Soaala, yãmb la m pãnga.

³Soaala yaa m pĩiga la m lilli, bãmb la m tãnsoben-doog la m fãagre, bãmb la m gãongo la m fãagr zab-teoogo.

⁴Bɩ Wẽnd paam pẽgre, tɩ m sẽn bool-ba b waame la m tõoga m bɛɛba.

⁵Kũum kolga ne a wĩ, n gũbg-ma, a kolga ne a ko-wiiga n na n ling-ma.

⁶Bʋg-tẽng kolga ne a wĩ n gũbg-ma, Kũum kolga ne a sʋgre n na n tiig-ma.

⁷M tees n kelma Wẽnd m yɩɩra pʋgẽ, m tees n bool-b lame la b zĩnda b ro-sõngẽ n wʋm m koɛɛga m koɛɛga waa n lʋɩ-la b tʋbrẽ.

⁸Tẽnga rigimdame tɩ tãmsa vigs b seesẽ tɩ Wẽnd sũur puugame.

⁹Ad-y bug-zõos n nuki, Wẽnd sũ-puurã n widg a bugum, tɩ b noora puusd bug-walem la bug saala.

¹⁰Soaala pilga saagã n sigi sawad taok la b naoora teeg n sigi.

¹¹B looga wala b yɩk n zomba weoofo, wala b laanda ne sobg pɩgsa.

¹²Likẽ la b zoe n tɩ solge lik sẽn pid lik menga, sawadg sẽn pid sawadgo.

¹³Vẽenem n deng taoore tɩ sawadga yaool n pʋgda, n le paas sapɩlem la bug pãrse.

¹⁴Soaala zĩnda yĩngri n kũms bʋʋre, Yĩngr Pãng-Soaba tãsame tɩ sãde, tɩ sapɩlem la bug saal na n le bare.

¹⁵B sẽn yãag b tãpo, pɛɛm sẽega zĩig zãnga, saaga sẽn tãse la b sʋʋga sẽn yãg goalma.

¹⁶Ad-y kʋɩlsa koom fẽbga vugri, sẽn da be zugẽ zoe n busa tẽnga, la y tãsgã n wa ne rẽ fãa, Soaala-Wẽnde! Y tĩsga n wa ne bũmb fãa zũndugri.

¹⁷Soaala zĩnda yĩngr n tʋm la b waa n yaag-m-la ko-liungẽ.

¹⁸B waa n fãag-m-la ne bɛɛb toose, bɛɛb sẽn da tãag-m yĩid ne pãnga.

¹⁹B sẽn tẽ raar ning tɩ m na n konga pãngã, baraare la Soaala yik n teeg n sõng-ma.

²⁰B fãag-m lame, m paam n põsame, b fãag-m lame tɩ b nong-m lame.

²¹Soaala zã-m-la wa sẽn tog ne-ma, wala m sõmblem sẽn tog tɛka.

²²M dɩka Soaala sore, n pa kɩɩs b noor ye

²³M tũ-la b soya tɩ b fãa rɩga m taoore, m ne-b lame la m pa kɩɩs ba a ye reegr ye.

²⁴M pelga m pʋga n tũ Soaala, m modg n zãaga m meng ne wẽnga.

²⁵B maana ne maam wa sẽn segde, wala m pʋ-peelma sẽn tog ne.

²⁶Wẽnd pʋgda sẽn pʋgd-b bãmba, b pʋg peela ne pʋ-peen neda.

²⁷Sẽn ka tar-a a toorẽ yelle, Wẽnd ka rat yẽ soab ne yell ye. Ned sɩlsda a wẽnem wa baafo, tɩ Wẽnd sɩls b sɩlem wa pĩim.

²⁸Wẽnd doogda sulg-m-meng soaba, la b sulgd sẽn zẽkd b mense.

²⁹Wẽnd maag yãmba, m naama nan ka gʋsg ye! Soaala, m Wẽnnaam, vẽnegda m lika.

³⁰M yɩgd n gãeesda bogd ne sũ-keelem, m yɩgd n kanda lalse ne bãmb pãnga.

³¹Soaala sora la so-sõngo, bãmb gomd ka lʋɩt vɩʋʋgẽ ye, b kogenda sẽn baood-b bãmb zĩiga.

³²Ãnda la Wẽnde, sã n ka tõnd Soaalã? Ãnda la pĩiga, sã n ka tõnd Wẽndã?

³³Bãmb n mobg-m ne b pãnga, bãmb n dems m sora tɩrga.

³⁴ [18†] Bãmb kõ-la m nao keglem wa walg rẽnna, b tol n zẽk-m lame n dʋʋs yĩngri.

³⁵B zãmsa m nusa zab-teed zãabo, m kang rõosda kut tãbdo.

³⁶Y gãong yĩnga m maanda raoodo, y kõ-m-la pãnga, y pʋg-m-la ne y nonglem, y zẽk-m lame n dʋʋs yĩngri.

³⁷M kẽnd lebga faasga la m pʋs n ka le mi yaams ye.

³⁸M pʋgd n yõgda m bɛɛba, m pa lɛɛgd n wa tɩ b ket vɩɩs ye.

³⁹M kʋʋd-b lame n gãnege, b fãa rʋʋgda m taoore.

⁴⁰Soaala yĩnga m boba zabr ne raoodo, bãmb yĩnga m bɛɛba gãnegda m taoore.

⁴¹Ad-m nug sẽn teeg b kãare, tɩ m kʋʋd-b yaare.

⁴²B tara kɛlenga la yɛ la b fãagr na n yi? B boola Soaala la b pa leokd-b ye;

⁴³m neem-b lame tɩ b lebg tom tɩ m dɩk n kõ yĩngr sobgo. M kãagd-b lame n lobd wa sor zug begdo.

⁴⁴M neba sã n mi n yik n wulumd ne-ma, yãmb n kongd n wa fãag-ma, Soaala, yãmb kõt-m-la naam bu-zẽmba zugu, m sẽn da ka kĩ ne b rãmba, yik n kẽeda m soolmẽ.

⁴⁵Sãamb waa n nok-m lame. M sã yaag m noor bala b tũudame,

⁴⁶m sã n gome b basda raoodo b zoet n yi n basa b roto.

⁴⁷Soaala paam pẽgre, m pĩiga soog barka! Wẽnd ninga sẽn kõt-m pãnga soog naam!

⁴⁸Bãmb n kõt-m tɩ m dokd m sũuri bãmb n kõt-m naam bu-zẽmba zugu.

⁴⁹Bãmb n sõngd-m tɩ b tõe m bɛɛba, bãmb n sõngd-m tɩ m maand raoodo ne m zabd-n-taase, bãmb n fãagd-m pãn-tõog rãmb nusẽ.

⁵⁰ [19†] Soaala, m pẽgd-y-la bu-zẽmba sʋka, m na n yɩɩlame n kils y yʋʋrã.

⁵¹Dĩma tõe-la a bɛɛba, Wẽnd sõngda b sẽn taag a soab naam kaama, B ket n pʋgd-a-la ne b nonglem, beoog sẽn vẽege, b ket n data a Daviid buuda ne naam, zamaan ne zamaana!