Read SEBR SÕNGO, 1998 Yɩɩla 19 Bible Online

Yɩɩla 19 - SEBR SÕNGO, 1998 bible

Yɩɩla 19

¹Yɩɩlla bee yɩɩla naab sebrẽ. Yaa a Daviid yɩɩlle.

²Yĩngr teeda fãa kilsda Wẽnd ziiri, sa-gãonga reegame tɩ yãmb nug n yɛdg-a.

³Dũnna raara reegdame n togs beoog raare, tɩ rũnna yʋnga reegd n togs beoog yʋngo.

⁴B goama ka gom-biis n togsd bũmb ye, ka gomd tɩ koɛɛg sãt ye.

⁵ [20†] B sẽn yaool n gʋls bũmb ninga vẽneg n dɩgame, b sẽn dat tɩ d wʋm bũmb ninga yaool n tata tẽnga tɛka. Wẽnd kula al yĩngri n bao zĩig n kõ wĩndga.

⁶Yibeoogo a yita a gãagẽ wa yi-kãad paalga, n baood sẽn na n wagsa ne-yẽ n kongdẽ.

⁷A sẽn puk kɩreng a ye, a gildame n wa kɩreng a to tɩ zĩiga reeg n wɩng zãnga.

⁸Soaala noor sẽn yals fãa toga ne pẽgre la a kõta vɩɩm yamleoogo; bãmb sora ka kẽesd moog ye, a lekda yam sẽn pa sãoogo.

⁹Soaala noora n ka tar goaleng ye, a pidsda sũur ne sũ-noogo, nora rɩga wa ko-yɩlemde, a vẽenema leooda nini.

¹⁰Zoe Soaala nif ka tar no-koeemd ye, yaa bũmb sẽn tog wakat buud fãa, Bãmb yɛsa b sɩd zug bala, b sẽn yals fãa yaa sõmbo.

¹¹M pẽgda Soaala noorã n yɩɩd sãnem yulli, m pẽgd-a lame n yɩɩd sãnem gilgu, n yɩɩd sɩ-vak la sɩ-kaam.

¹²Yãmb noora la m tũuda n kẽnd vẽenemẽ, y noora tũudem pida ne yõodo, Soaala.

¹³Ãnda n tẽr a zaamẽ kongr zãnga? Yiis-y wẽng sẽn ket n solg m pʋgẽ, Soaala.

¹⁴Zãag-y-m ne wilg-m-meng rãmba, sõng-y tɩ m lok m toog ne bãmba, la m tõog rẽ, m põs yel-wẽnde, m tõog rẽ, m pida m sõmblem.

¹⁵Bɩ m noora goama la m sẽn walemd m sũurẽ ta y yam, m Soaala, m Pĩiga la m Sõangda!