Read SEBR SÕNGO, 1998 Yɩɩla 25 Bible Online

Yɩɩla 25 - SEBR SÕNGO, 1998 bible

Yɩɩla 25

¹Yaa a Daviid yɩɩlle. M wẽnemda m neng n tees yãmba.

²Soaala, m teega yãmba, pids-y m daabo, da sak-y tɩ m bɛɛba tõog-m ye.

³Ned zɩ n teeg yãmb n kul zaalem ye. Ad-f sã n ka leb ne bũmbu, f ka wa b nengẽ ne pʋ-peelem ye.

⁴Wilg-y maam y noya, Soaala. Wilg-y maam b sẽn teesd-m.

⁵Zãms-y-ma, togl-y-m sɩd sore, yãmb m Wẽnde la m Fãagda. M gũud-y-la wakat buud fãa.

⁶Tẽeg-y tɩ y yaa nin-bʋgsgo la y pʋleng zɩ n vaal ye.

⁷Yĩm-y m bi-bɩɩlmẽ wẽnnẽ yel-wẽna, ges-y-m ne nonglem la nimbãan-zoeer bala.

⁸Soaala yaa noanga la b ka mi zãmb ye, n ket n wilgd yel-wẽn-maand so-sõngo.

⁹Sõmblem sora la y teesd sulg-m-meng rãmba, so-kãng la b zãmsd tɩ b rɩke.

¹⁰Soaala sor fãa yaa nonglem la sɩd sore. F rat tɩ b kãabga pids f yĩnga, bɩ f rɩk so-kãnga.

¹¹Y ziira labs ne m wa beeg yãmb woto fãa, la rẽ me yĩng la m kot-y sugri.

¹²Fo nif sã n ka sãag Wẽnde, ad-b wilgd-f-la sor ning f sẽn na n dɩke.

¹³Yʋngo gõeem na n saka yẽ soaba, la bãmb buudã n na n wa soog moogo.

¹⁴Wẽnd pakda b sũur ne sẽn zoet-b bãmbã, b wilgda bãmb b zoodã.

¹⁵M sẽn teeg a soaba la Soaala tɩ b tõee fãa; bãmb n tõe n lood bɛɛba sẽn za-m ne wĩ niynsã.

¹⁶Wẽnemd-y y neng n tees-ma, Soaala, zoe-y m nimbãanega, tɩ m yaa m ye la m ka yõod ye.

¹⁷M nina yaee yɛl bɛda tɩ m yam puki. Wa-y n fãag-y-ma!

¹⁸Ges-y m nimbãanega la m pɛta, loog-y ne m wẽnema fãa.

¹⁹Ges-y tɩ m bɛɛba sõora labsa, ges-y tɩ b pʋ-toogã n yɩɩda.

²⁰Wogl-y m yõore, fãag-y-ma, m sool-y lame, kogl-y-ma.

²¹M gũuda yãmba, Soaala, zãag-y-m ne yel-wẽnde, wilg-y-m sõmblem sore.

²²Fãag-y Israyɛl wɛ, Wẽnde! Gũ-y y buudã, a zu-loeesa fãa pʋgẽ.