Read SEBR SÕNGO, 1998 Yɩɩla 27 Bible Online

Yɩɩla 27 - SEBR SÕNGO, 1998 bible

Yɩɩla 27

¹A Daviid yɩɩlle. Soaala n ya m vẽenem, m fãagra yita bãmb nengẽ. M na n zoe ãnda rabeem? Soaala kẽes-m-la b tãnsoben-doogẽ, m na n diga ãnda taoore?

²Nin-wẽnsa sã n baood-m n na n kʋ, ad-y yaa bãmb n lɛɛgd n pãsd n lʋɩtẽ.

³Bɛɛba tãp sã n gũbg-ma, m sũur ket n ka rigd ye. B sɩng b zabra takre, m ket n zĩi ne saagre.

⁴Bũmb a ye la m kos Soaala, la m kos-a-la me m sũur fãa, yaa m pa b ro-sõngẽ, m vɩɩma zãnga, n tõog n tɩg b rasãndlem, la m me tõog tɩ rooga pa ne a neerem.

⁵Ra-beeda raare, b baooda pẽk n solg-ma b baooda zĩ lilli n kẽes-ma, b baooda pĩig n lill-ma.

⁶Marsã yaa m bɛɛba n sur m taoore. Ro-sõnga pʋga mam tõe n kẽe ne m kũuni, m tõe n waa ne maand sẽn naagd ne kilsgu, maand sẽn naagd ne Soaala pẽgr yɩɩla.

⁷Soaala, kelg-y m boolgo, zoe-y m nimbãaneg n leok-ma.

⁸M tẽra y sẽn yeele: «Bao-y m zĩiga, tɩ mam me baood-y lame.»

⁹Da solg-y y nenga ye, da pĩng-y y yamba ye, da lak-y n bas-ma tɩ y zoe n wa fãag-m lame. Yãmb la m Wẽnd la m Fãagda.

¹⁰M ba ne m ma bas-m lame, tɩ yãmb deeg maam y sɛɛgẽ.

¹¹Wilg-y maam y sora, Soaala, kẽes-y maam y so-sõngẽ, woto m na põs sẽn baood-b maan ne wẽngã.

¹²Da bas-y maam m bɛɛba nusẽ ye. Ad-y b waa ne neb sẽn na n dõd-ma, b waa ne neb sẽn baood n na n maan m pãnga.

¹³M yella yɩtẽ la wãna m sã n da pa tarẽ kaseto tɩ Soaala na yeg-m ne b nonglma tẽng zug ka, nin-vɩɩsa sʋka?

¹⁴N-ye! Ninsaal biiga, teeg Soaala. Wɩsg f menga la f yik ne raoodo, teeg Soaala ne sũ-maasem.