Read SEBR SÕNGO, 1998 Yɩɩla 33 Bible Online

Yɩɩla 33 - SEBR SÕNGO, 1998 bible

Yɩɩla 33

¹Nin-sõma, pẽg-y Soaala yʋʋre! Ad-y Wẽnd pẽgr toga nin-tɩrs noorẽ.

²Pʋʋs-y b barka ne ruudga, ruudga susa yegl taab piig piiga,

³tɩ y pʋd y yɩɩn-paale n kils-ba; maan-y noog wala y sẽn tõe tɛka.

⁴Wẽnd sẽn yeel n yɛse, b sẽn maan fãa yaa sõngo

⁵la b sẽn nong yaa zemsgo la sɩda; tẽnga fãa pida ne b nonglma kaseto.

⁶Wẽnd gomdã n naan yĩngr ne a teedã; yɩɩ ne b noora gomd bal la rẽ fãa maan yã

⁷bãmb n kaad kooma la b bɛɛd a soya, bãmb n wat n pag-a mog-bɛd pʋgẽ.

⁸Bɩ tẽnga fãa maan dabeem ne Soaala, bɩ tẽnga rãmb fãa rig b taoore.

⁹B gomame bala la bũmba fãa yalsame, b yaaga b noore la bũmba fãa waa moogo.

¹⁰Soaala kɩtame tɩ bu-zẽmba sẽn da seda vaale, bu-zẽmba sẽn da seda fãa lʋɩɩ vɩʋʋgẽ.

¹¹Bãmb daab bal n pidsd wakat buud fãa, b sũura raab pita fãa zamaan ne zamaana.

¹²Zu-noog rãmb la neb niyns Soaal sẽn ya b Wẽnde. Zu-noog la buud ning Wẽnd sẽn yãk wa b pʋɩɩre.

¹³Wẽnd bee yĩngri n getẽ, la b nee ninsaalba fãa.

¹⁴B sẽn be zĩig ninga, b getame, b nee tẽng zug rãmba fãa.

¹⁵Wẽnd neeme tɩ b yaga b fãa ne tãnd yɛngã la b gũud-b-la gũub-yɛnga.

¹⁶Ka tãb-biis sõor n fãagd dĩm ye ka sũ-keelem n fãagd gãndaoog ye.

¹⁷Ka weoof n tõe n fãag ye, ka weoof n tõe n zoe n põs ye.

¹⁸Yaa sẽn zoet-b bãmb la Soaala fãagda, yaa sẽn saagd-b kãabga sẽn ka vaandã.

¹⁹Sẽn teeg-b bãmb la b na n fãag ne kũum, bãmb dãmb n na n põs kom wẽnde.

²⁰Tõnd yẽ gũuda Soaala, bãmb la d sõangda la d gãongo.

²¹D sũ-noog yita bãmb nengẽ, d teega b yʋʋra sẽn ya sõngã.

²²Bɩ Wẽnd nonglma kell n pa ne-do, tɩ d saagra me paada ne bãmba!