Read SEBR SÕNGO, 1998 Yɩɩla 36 Bible Online

Yɩɩla 36 - SEBR SÕNGO, 1998 bible

Yɩɩla 36

¹Yɩɩlla bee yɩɩla naab sebrẽ. A Daviid yɩɩlle.

² [38†] Nin-wẽnga gomdã n wat m yamẽ: «Da tol n dig Wẽnd dabeem ye.»

³Nin-wẽng pẽgda a menga n ka nee a wẽnem ye, a pa tẽed t'a beegame n tog n tuub ye.

⁴Sẽn be a noorẽ bala, yaa tudg f to, yaa f tʋʋs-a. A ka le mi bõe n ya neer ye.

⁵A keta a gãagẽ la a zoe n dat n tʋma beedo. Sor sẽn ka so-sõng la a yãe n dɩke, wẽng bal la a yãend n tar pʋgbo.

⁶Soaala, y pʋ-peelma la yĩngr dãmba kilsda, y sõmblema la sagãna moonda.

⁷Y sõmblema gãndga y tãn-wogda gilli, y yama zulum le gãndga bʋg-tẽnga. Yãmb n fãagd ninsaalba la rũmsã.

⁸Soaala, y nonglma yaa bõn-sõngo! Ninsaalba zoe n wa soonda y maasmẽ.

⁹Y zaka pʋgẽ dɩ-nooda la b pidsd b pʋga, sẽn nooma fãa la y tugl-b tɩ b yũuda.

¹⁰Yãmb n tãoosd vɩɩma ko-nifu, yãmb vẽenema n kõt tõnd vẽenem.

¹¹Bɩ sẽn mi-b yãmba le tɩg y nonglma n paase, tɩ sũ-tɩrsa rãmb me tɩg y sõmblem.

¹²Wʋglem soab naoor da tag m zakẽ ye, la nin-dẽgda me nus da sɩɩs-m ye.

¹³Ad-y nin-wẽnsa sã n ta y ro-sõngã, b rʋʋgdame. B sẽn lʋɩ zĩig ninga, b paada be, ka le tõe n yik ye.