Read SEBR SÕNGO, 1998 Yɩɩla 39 Bible Online

Yɩɩla 39 - SEBR SÕNGO, 1998 bible

Yɩɩla 39

¹Yɩɩlla bee yɩɩla naab la Levit dãmba sebrẽ. A Daviid yɩɩlle.

²M da yeela m menga: «Maan gũusgu f vɩɩma pʋgẽ ne f goama. Kʋɩdg la f na n bao n tẽo f noore, nin-wẽng fãa sã n be f sɛɛgẽ.»

³M paga m noor n ka le gomd ye, m sĩndgu meng waa n looga toogo, la m tooga waa n yɩɩga m zɩɩbo.

⁴M sũura da widgda bugum m yãoogẽ. M yaamsã la bugma toolem kɩtame tɩ m gome.

⁵Soaala, wilg-y maam m sẽn na n baas to-to, wilg-y m raara sẽn mag n tek zĩig ninga tɩ m bãng tɩ m bee rũnna n ka beoog ye!

⁶M yõora woglem, nug pʋg yalem bala. Sã n ya ne yãmba, dẽ yaa zaalem. Ninsaal ne a keglem, yaa sobg bala.

⁷Ninsaal kẽndame la a watẽ, wa sulunsuku, a sẽn samd goabg la rɩtgo, yaa sobg bala, sẽn sama menga a ka mi a wʋkd ye.

⁸Woto wã, bõe la m na n gũ, Soaala? Y nengẽ bal la m saagr keta.

⁹Fãag-y-m ne m yel-wẽna fãa. Da bas-y tɩ m wa lebg gãeemsa laad ye.

¹⁰M sẽn mum m noorã a kõn le pak ye. M basda yãmb ne sẽn ketã, yãmb soog tʋʋm kãnga.

¹¹Da le pãb-y-m ye, tɩ y na n va-m lame n lubi.

¹²Y sɩbgda ninsaala a zʋg tekr yĩnga, rasempʋɩɩg la y lobgd a yĩn-nongrã. Soaala, ninsaal yaa sobg bala!

¹³Soaala, m kosgo la m kɛlenga lʋɩ y tʋbrẽ. Ges-y m nintãma sẽn daagde, kelg-y m yãbrã. M yɛsa y taoor wa sãan bala, m yaa noaka wa m saam-dãmba.

¹⁴Bas-y-m bilf bala tɩ m noor le sɩng laado tɩ m yaool n loog la m menem zãnga.