Read SEBR SÕNGO, 1998 Yɩɩla 45 Bible Online

Yɩɩla 45 - SEBR SÕNGO, 1998 bible

Yɩɩla 45

¹Yɩɩlla bee yɩɩla naab sebrẽ, Yɩɩla naaba yɩɩnd-a lame t'a wẽneg lɩɩnga puug pẽgr yɩɩlle. Yɩɩlla be a Kore kamb sebrẽ. Nonglem yɩɩlle.

²Gom nood n pid m sũuri tɩ m wɩɩdẽ la m na n pʋda m yɩɩlle, m dĩma yĩnga. La Wẽnd na kɩt tɩ m zelemda lebg m gomda naana wa gʋls mit nug sẽn maand sebr zugu.

³Dĩma zʋʋga a Adem kamb a taaba ne neerem, gom nood ka kongd a noorẽ ye, a naama na yɩɩ daar buud fãa yĩnga.

⁴Tãb-biig sẽn pid ne sũuri, sẽbg f sʋʋg f sɛɛgẽ. Sʋʋga naag n yɩ f arzɛka la a yɩ f naama kaseto.

⁵Dõos f tãpo, la Wẽnd na sõng-fo! Zomb f weoof n tak f zab-sõngo, n wa fãag naong rãmb la f yals zemsgo zamaane. Bɩ f rɩtg kanga tʋm a pãn-tʋʋma.

⁶Fẽeg f pɛɛma sẽn maneg n sɩlse tɩ b rʋʋg bu-zẽmba zut, tɩ b fãa yɛɛse.

⁷Dĩma, y naama zaoor wẽnda Soaala rẽnna, ka bũmb sẽn vigl daar a ye yĩng ye. Naama na n dɩɩ ne zemsgo.

⁸ [45†] Y nonga sẽn zemse n kis sẽn ya wẽnga. Yaa rẽnd me yĩnga la Wẽnnaam, y Wẽnda, taag-y sũ-noog kaam n welg y toore, y taaba sʋka.

⁹Y futa yũugu, yũ-nood a yeyn-ye! Ro-neeba wulumda ne yʋʋm-teed bʋʋre bʋʋr sẽn noom n sakd kelgre.

¹⁰Zĩiga pida ne kom-pugli, yaa na-biis sẽn maneg n fam b mense, y nug rɩtgo, la y yals na-pagã, t'a yãgd ne Ofir sãnem.

¹¹Kelge, bi-pugl sõngo, ges la f yoog f tʋba, yĩm f roagdba la f buudu.

¹²Bas tɩ f yamleoog kẽ rĩma, Bãmb la f zu-soaba, yĩgimd b taoore,

¹³la bãng marsã, Tir bi-pugla, tɩ sẽn gãe-b ne arzɛka na kaoog n wa belem-f ne b kũuni.

¹⁴Dĩma bi-pugl sẽn tog ne naama be-la a roogẽ. A fuuga maneg n buka ne sãnem.

¹⁵Fuga peende, saag gomtɩʋʋg rẽnna; b tall-a-la woto n wa kɩs dĩma. A tũud-n-taasa me naagame n wa dĩma taoore,

¹⁶b tongame n kẽed dĩma zakẽ ne sũ-noog yɩɩla.

¹⁷Kamba na n leda ba rãmba zĩiga dũni wã nanams na n yɩɩ bãmba.

¹⁸Sã n ya maam, m na kɩt tɩ b tẽeg dĩma yelle, zamaan ne zamaana, la neba na kell n talla a pẽgre, zamaan sẽn wate.