Read SEBR SÕNGO, 1998 Yɩɩla 49 Bible Online

Yɩɩla 49 - SEBR SÕNGO, 1998 bible

Yɩɩla 49

¹Yɩɩla naaba la a Kore kamb yɩɩlle.

²Dũni rãmba, kelg-y woto: dũni wã kẽedba, yoog-y y tʋba.

³Nin-bɛd la nin-bõonese, arzɛk bɩ naong rãmba, kelg-y, y fãa gilli.

⁴Yaa yam zulung goama la m noor yiisda, yaa goam sẽn be võor la m yiisd m sũurẽ.

⁵M maaga m meng n kelg yelbũna la m dɩka m kʋnde n na n wegs-a ne yɩɩlle.

⁶Bõe tɩ m na n maan yɩɩre, ra-beeda raare, yɩɩre tɩ nin-wẽns n gũbg-ma,

⁷yɩɩre tɩ neb sẽn teeg-b laogo n yegd-ma, la yaa b arzɛk sẽn waoogã la b kilsda?

⁸Ned ka tõe n fãag a to ye, a ka tõe n deeg-a Wẽnd nugẽ ne ligd ye.

⁹F sẽn kɩs bũmb ning fãa n na n fãag yõore, raara sã n ta, f yõora ta-la a tɛk bala.

¹⁰Ned tõee n kell n vɩɩnda woto raar fãa? N vɩ woto n ka tol n yãend a yaoogo?

¹¹D ka nee nin-tɩrs sẽn kiid bɩ, d ka ne b sẽn kiid zãnga ne ka-yõod rãmba bɩ nin-toos bɩ? N kiidẽ tɩ neb a taab yõneg n dɩt b raboog bɩ?

¹²B ra tẽedame tɩ bũmb kõn luk-ba b zĩisẽ ye, n tẽed tɩ b roog kõn tol n kɩll ye, n tol n dɩk b yʋʋr n pʋt b tẽnse!

¹³Ad-y b sẽn zẽk ninsaal n ta zĩig ning fãa, a miime t'a wat n kẽe gãag n ka vẽeg beoog ye, a wat n lebga bõn-muka wa rũnga.

¹⁴Ad neb niyns sẽn teeg-b meng zãnga, ad sẽn kilsd-b mens ne b noor goama, ad-b sẽn na n baas to-to:

¹⁵B wẽnda piisi la kũum n tar-ba n digd bʋg-tẽnga. Na n pag-b-la bʋg-tẽnga wa pe-bi. B loogra poor marsã, nin-sõma n wat n tab-ba n bedse. B fãa gill sigda yaoogẽ, n menem, b zãagda ne b ro-neeba.

¹⁶Sã n ya maam, Wẽnd n na n wa fãag-ma, bãmb n na n wa yiis-m bʋg-tẽnga.

¹⁷Da le maan yɩɩr lɛ-lɛ f sã n ne neb sẽn tiig n lebg arzɛk rãmba, tɩ b zak pid ne faongo, n pid ne ziir ye.

¹⁸B sã n kiidẽ, ad-y b pa zɩt bũmb n loog ye, b ziira pa tũud-b yaoogẽ ye.

¹⁹Neda sẽn waa n vɩ wã, ba a sã n da pẽgda a menga n yet tɩ bũmba fãa zemsa a nengẽ,

²⁰a bãng t'a na n leba a saam-dãmbẽ, la ba a ye nif kõn le teeg vẽenem ye.

²¹Ãnda n be n ka miẽ, tɩ ninsaal ne a ziira fãa, wat n lebga muk wa rũnga?