Read SEBR SÕNGO, 1998 Yɩɩla 52 Bible Online

Yɩɩla 52 - SEBR SÕNGO, 1998 bible

Yɩɩla 52

¹Yɩɩlla bee yɩɩla naab sebrẽ. A Daviid yɩɩlle.

²[49†] A tẽegda Edomitg a Doeg sẽn waa n wilg a Sol t'a Daviid kẽla a Abimelɛk zakẽ.

³Wʋglem bãag bʋg la f bẽeda n yet tɩ wẽng bala la fo na n tʋme?

⁴Beoog sẽn vẽeg fãa wẽng bala la f yama tar bilgri. F zelemda rɩta wala wanzam barga, f sẽn mi bal la neb kãnegre.

⁵Fo nonga wẽnga n kis neere, n nong zirẽ-beed n yɩɩd sɩda.

⁶F zelemd goalenga sẽn mi yaa sẽn sãamd bala. F sẽn leok fãa yaa kalem-kalem.

⁷Wẽnd na n bas-f lame tɩ f lʋɩ n da le yik ye, b na n tak-f lame n yiis f roogẽ, b na n võog-f lame n yiis nin-vɩɩs sʋka.

⁸Dẽ marsã la nin-sõma wã na n yãende, n wẽed siri la b gomda:

⁹«Ges-y rao ninga sẽn da maand wʋglma, n da teeg a paoongã n yɩɩd Wẽndã!»

¹⁰Sã n ya maam, m na n wẽnega oliviye, sẽn tãood a wil Wẽnd zakẽ. M teega Wẽnd nonglma sẽn ket n pʋgd-m wakat fãa.

¹¹Y tʋʋm sõnga yĩnga, m na pʋʋs-y barka, la m gũuda wa bũmb sẽn toge, daar ning b sẽn na n pẽg y yʋʋrã nin-sõma wã sʋka.