Read SEBR SÕNGO, 1998 Yɩɩla 59 Bible Online

Yɩɩla 59 - SEBR SÕNGO, 1998 bible

Yɩɩla 59

¹ [54†] Yɩɩlla bee yɩɩla naab sebrẽ. A Daviid yɩɩlle. A Sol sẽn waa n kos-a t'a gũ a zaka, n dat woto n paam-a n kʋ naana.

²Soaala, fãag-y maam m bɛɛba nusẽ, gũ-y maam ne m bɛɛba.

³Zãag-y maam ne nin-wẽnsã, zãag-y-m ne sẽn nong-b zɩɩma raagrã.

⁴B bao zĩig n sorẽ n gũud-ma, yaa nin-bɛd mens n yik n na n zab ne-ma. La ade, Soaala, m pa beege, m pa maan wẽng ye.

⁵Ne m sẽn ka beegã, b zoet n beoogd-m lame. Yik-y y gãagẽ, Soaala, seg-y-ma, tɩ y na yãe!

⁶Yãmba, Soaala, Pãng Naaba, a Israyɛl Wẽnde, yik-y n sɩbg-y bu-zẽmba fãa. Da zoe-y ned ba a ye nimbãaneg ye, b fãa maana zãmbo n bõn b mense.

⁷Zĩig sã n sobge, b lɛɛgd n watame. B saada tẽngã n wũund wa baase,

⁸b noora pida ne tãntãmpuudu, tɩ b yẽna lebg wa sʋʋs b noorẽ. Woto wã ãnd n tõe n wʋm b goama? Bãmb n gãgnemd ne taaba.

⁹La yãmb laada bu-zẽmba, Soaala, yãmb toog ka ne b ye.

¹⁰M na n dooga m neng n ges yãmba, yãmb la m pãnga, m tãnsoben-dooga yaa Wẽnde.

¹¹Wẽnd ning kãabg sẽn ka vaandã wata m segbo; bãmb la m teeg yã n yĩgsd m bɛɛba.

¹²Da menes-y b zãng ye, ka rẽ m buuda wat n yĩma a yel-sõmd soaba. Y pãnga yee n vigs-ba la y ning-b yãnde, d Wẽnd la d gãongo!

¹³Zãmb rãmba sã n yaag b noore, yaa b wẽnema bal la b pẽgda. B kãab beedo, b wẽn-tʋʋr la zirẽ yĩnga, bas-y tɩ b wilg-m-menga lebg bẽdgo n yõk-ba.

¹⁴Ypug-y y sũuri n sɛɛs-ba, da kees-y bũmb ba a ye ye. Woto yaang la taoor dãmb na bãnge tɩ Israyɛl Wẽnda pida ne naam la tõogo.

¹⁵Zĩig sobgdame tɩ bu-zẽmba lɛɛg n wa. B lɛɛgd n waame la b wũund wa baase, n saad n pɩkd tẽngã.

¹⁶Yaa sẽn na ning b noorẽ wã la b baooda. B pa rɩ n tɩg fãa, b yãbdame tɩ beoog vẽege.

¹⁷Sã n ya maam m yɩɩndame n pẽgd y pãnga, y nonglma sẽn ket n pʋgd-ma la m kilsd yibeoogo, tɩ y yɩɩ tãnsoben-doog m yĩnga, m soondg zĩig m yɩɩra pʋgẽ.

¹⁸M na n yɩɩlame n pẽg y pãnga, m Wẽnd la m tãnsoben-doogo, tɩ y nonglma ket n pʋgd-m-la beoog sẽn vẽege!