Read SEBR SÕNGO, 1998 Yɩɩla 71 Bible Online

Yɩɩla 71 - SEBR SÕNGO, 1998 bible

Yɩɩla 71

¹Soaala, m yãk-y lame tɩ y yɩ m soondg zĩiga. Da le sak-y tɩ b paoog-m ye.

²Y sẽn pid ne zemsgã, yãmb n na n fãag-ma. Kelg-y m koɛɛg n fãag-ma.

³Yɩ-y pĩig ning sẽn na n lill-ma, soondg zĩig m sẽn tõe n ta wakat buud fãa. Yãmb kãab-m-la y fãagre. Sɩda yãmb la m pĩiga, m tãnsoben-doogo.

⁴Fãag-y-m nin-toaaga nugẽ ne nin-kʋʋdba la pãn-tõog rãmb me rẽnnẽ.

⁵Soaala-Wẽnde, yãmb la m saagre. Al m yãadmẽ yãmb sɛɛgẽ bala la m sũur da ya kẽnkẽ.

⁶M sẽn wa dũni tɛka, yãmb bal la m teegda, m dogem tɛka, yãmb bal la m pẽgda.

⁷M da yaa wa bõn-bãnd neb wʋsg nifẽ m sẽn paam tɩ y lebg m tãnsoben-doogo.

⁸M noor sẽn da mi yaa yãmb pẽgr bala, tɩ m da nee wakat fãa, y sẽn da pid ne ziir ningã.

⁹M sẽn kʋʋl marsã wã bɩ y ra bas-m kɛɛng ye. M pãnga sẽn woogd n dabdã, da zãag-y-m ye.

¹⁰M bɛɛba gomda m yelle, lɩɩsdba kʋ-la b yẽsgo.

¹¹Ad-b sẽn yeele: «Wẽnd bas-a lame wẽ-y gũbri n yõk-a. Ned ba a ye kõ wa n fãag-a ye!»

¹²Soaala, da zãag-y ne m ye, zoe-y tao n wa fãag-ma.

¹³Sẽn baood-b maama zoe n menem ne yãnde. Sẽn baood-b maam ne wẽnga sẽgen paoor la yʋ-beed kʋɩdse.

¹⁴Sã n ya maam, m ket n saagdame la m ket n tara y pẽgra yɩɩla.

¹⁵Beoog sẽn vẽeg fãa m noor le sõdgda y sẽn maan bũmb ning fãa n wa ne zemsgo la fãagre. Ad-y y sẽn maana yaa kõn bãng n sõde.

¹⁶Maam n dɩ Wẽnd tʋʋm-bãna yõodo. Yãmb sõmblema bal n pid zãnga.

¹⁷Soaala, al m yãadmẽ la y pʋgd-m ne y wilgri la sẽn ta marsã, m tara y tʋʋm-bãna moonego.

¹⁸M kʋʋlame la m zug pelgame, Soaala, da bas-y m kɛɛng ye. M dat n tõog n wilga dũnna zamaana rãmba y sẽn maan ne y kang pãnga, n wilg beoog zamaana rãmba y sẽn tʋm ne raoodo.

¹⁹Y sõmblema zẽk n kula yĩngri, Soaala. Y maana yɛl bɛda, Soaala, ãnda n tõe n wẽneg yãmba?

²⁰Y basame tɩ m yãe bʋko la yel-beed wʋsgo, bɩ y le bas-m bilf bala tɩ d vɩɩnde, Wa-y n yiis-y-ma m sẽn sud n be zĩig ninga.

²¹Wa-y n le paas m ziiri, la y le keng m pɛlga.

²²M na n baoo bɛɛla n pẽg Soaala, n pẽg b sẽn pʋgd maam ne b nonglma. M na n bao kʋnde n wẽ y yĩnga, Israyɛl Wẽnnaam!

²³M na n wãaga ruudg y yĩnga la m noor na n pʋda sũ-noog yɩɩla, tɩ yãmb n fãag m vɩɩm.

²⁴M zelemda na n kilsa y sõmblem beoog sẽn vẽege. Yãmb maasem yĩnga, sẽn da baood-b maam ne wẽngã, ad-y yaa bãmb n seg yãnde, n tʋk yʋ-beedo.