Read SEBR SÕNGO, 1998 Yɩɩla 72 Bible Online

Yɩɩla 72 - SEBR SÕNGO, 1998 bible

Yɩɩla 72

¹A Salomo yɩɩlle. Wẽnnaam, kõ-y dĩma yam ning y sẽn tar n kaood y bʋʋdã; kõ-y dĩm biigã y yam sõngã.

²Woto a na bʋ y neba ne zemsgo, n bʋ y yemsa wa sẽn toge.

³Y sẽn maand fãa ne zemsgã, bɩ tãmsa la kunkuba dɩlg dĩma soolem.

⁴Bɩ nin-koam paam a sẽn tog n paame, tɩ naong soab paam a teenda, tɩ kalwẽdg la zãmb sɛ zãnga.

⁵Wĩndga la kiuuga sã n ket n wit b bugma fãa, bɩ a neba fãa dig dabeem a taoore, n tãag dũni wã tekre.

⁶Dĩma yɩ kõata, wa saaga n ni bedg-bedg n yʋgemd tẽnga, n ni tɩ yamda wuk bãoogẽ!

⁷A zĩnd a zaoora zugu, n sik arzɛk la tɩgr nin-sõng zakẽ, tɩ yʋʋma tong taab n tõt sɛɛbo!

⁸ [68†] Dĩma rĩunga toaag sɩngda mogrã n ta mog-kãsengã, n sɩng kʋɩl-kãsengã n ta dũni wã tɛka.

⁹We-raoogẽ dãmba na n wõgemda a taoore, a bɛɛba na n moga tom.

¹⁰Tarsis rãmb la tẽnsa sẽn puk koomẽ dãmba na n toola b kũuni; Saba la Seva dĩm dãmb na n yaoo fadgo.

¹¹Dĩm dãmb a taaba na n wõgemda a taoore, bu-zẽmba fãa zug la a na n dɩ naam.

¹²A na n fãaga naong soab sẽn kos a sõngre, la nin-koam sẽn ka tar teegda.

¹³A na n gesa naong la sẽn ka-a pãng soab yelle, a na n fãaga naong rãmb yõore.

¹⁴A na fãag-b sũ-to-rãmba la nin-toose nusẽ, a kõn bas tɩ b kood-b zaalem ye.

¹⁵Wẽnd na kaoos rĩma! A soolma rãmba na ges t'a paam Saba sãnema, b na pʋʋs a yĩng n ka vʋʋs ye, b na kils-a beoog sẽn vẽege!

¹⁶Bɩ tẽnga tõre, tẽn nabrẽ n tãag tãmsa zutu, yɛdg ne pʋto, tɩ kooda zut sulgdẽ la b roogdẽ wa Libã googa sẽn maande. F sã n be tẽnga pʋga, f sẽn ne yaa vã-maas bala.

¹⁷Bɩ dĩma yʋʋr da menem moog ye, a yʋʋra zẽk saaga tẽngre, tɩ ned fãa pʋd a yʋʋra ne pẽgre, tɩ neba fãa boola tɩ zu-noog soaba.

¹⁸Bɩ Wẽnd paam pẽgre, bɩ Israyɛl Wẽnda paam pẽgre! Bãmb b ye bala n maan bõn-bãna.

¹⁹B yʋʋr sẽn tog ne pẽgra soog barka! B pids mooga ne b ziiri! Ami, ami!

²⁰Woto n baasd a Zese biig a Daviid yɩɩla.