Read SEBR SÕNGO, 1998 Yɩɩla 74 Bible Online

Yɩɩla 74 - SEBR SÕNGO, 1998 bible

Yɩɩla 74

¹A Asaf yɩɩlle. Bõe tɩ y basd-m kɛɛng daar fãa, bõe tɩ y puug y sũur ne y bãgra rũmsi?

²Tẽeg-y buud ning y sẽn bao n kõ y meng sɩngrẽ, buud ning y sẽn yãk wala y pʋɩɩre. Tẽeg-y Siõ tãnga, yẽ zug la b tii y ro-sõngã.

³Kẽn-y n tees a raboogã sẽn yɛdg n dɩgã. Bɛɛba wãa fãa y ro-sõngã.

⁴Yaa yãmb sẽn da segd tõnd zĩig ninga la bɛɛba kẽ n kaase b zabr kaasgo. Be la b kẽ n yagl b zab-yʋy.

⁵B ra wẽnda ra-kɛɛdba sẽn kẽ goog ne b lare,

⁶n tãag b kʋɩlensã n pãbe la b kɛ n kʋʋse.

⁷B tugla y dooga bugum, b rẽgmame la b sarma b sẽn waoogd-y zĩig ningã.

⁸B zemsa taab gilli n na n yõog tẽnsa pʋsẽ, zĩis niyns fãa d sẽn da tar sɛk ne Soaala.

⁹D ka le ne bõn-bãn ye, bãngd ka le ket ye, la ned ba a ye ka mi sẽn na n ta wakat ning ye.

¹⁰Soaala, keta rasma a wãna, rasma a wãn tɩ bɛ wã na n kell n tall y tʋʋre? A na n kell n laa maam n ta da-bʋre?

¹¹Bõe tɩ y na n yõbg y rɩt kanga? Bõe tɩ y pa na n zẽk-a n va?

¹²Yãmb la m Wẽnd la m dĩm al sɩngrẽ, la yaa yãmb maasem yĩng la m tõog bɛɛbã.

¹³ [69†] Yãmb yalsa mogrã a toaagẽ, wag bãnda zuta koglma taab koomẽ n bõgs taab wa yoaga.

¹⁴ [70†] Yãmb bedsa a Leviatã zutã, la y rɩgs-b lame n lob we-rũmsi.

¹⁵Yãmb kɩtame tɩ ko-nin pusi n kɩt tɩ kʋɩls zoe ne pãnga, n kɩt tɩ kʋɩls niyns sẽn da pid n daannẽ, lebg kʋɩl wagdo.

¹⁶Yãmb n so raare, n so yʋngo, yãmb n yagl-b, b zĩigẽ, wĩntoog la kiuugu.

¹⁷Yãmb n karg tẽnga toaaga, n welg sẽoog la sɩpaolgo.

¹⁸Tẽeg-y tɩ bɛ wã tʋʋsa Wẽnde, tẽeg-y tɩ gãeemse n sãam y yʋʋre.

¹⁹Da rɩk-y y wallã n lob wɩbg ye, tẽeg-y toog sẽn gũbg-b rãmb vɩɩma yelle.

²⁰Le nek-y zoodã; ges-y tãmsa bogd sẽn pidi; neba zoe n wa soonda be n na n tɩlg pãn-tõogo.

²¹Modg-y tɩ ned da paoog a to, modg-y tɩ neba zã taab ne laafi la bãane, sõng-y tɩ sẽn ya-a naong la sẽn tar-a pɛta tõog n pẽg y yʋʋre.

²²Yik-y yã, Soaala, zab-y y zabre. Tẽeg-y tɩ b yika wa gãeemse n tar y tʋʋre, la b tʋʋd-y lame tɩ wĩndg kẽ.

²³Da bas-y tɩ bɛɛba bʋ-raasa wek y tʋb ye, Da bas-y tɩ b bʋra le yãng paas ye.