Read SEBR SÕNGO, 1998 Yɩɩla 81 Bible Online

Yɩɩla 81 - SEBR SÕNGO, 1998 bible

Yɩɩla 81

¹A Asaf yɩɩlle. Yɩɩla naab yɩɩnd-a lame t'a wẽneg: Bugsuntunga biis yɩɩlle.

²Kaas-y sũ-noog Soaala yĩnga: bãmb la d pãnga. D kils a Zakoob Wẽndã.

³Maan-y noogo, ne gãngãoogo ne ruudg la kʋnde.

⁴ [92†] Kũms-y baorg ki-paalga yĩnga, a rãamd sãd ki peoolgo la yʋʋm-vẽkre.

⁵Yaa noor sẽn yals a Israyɛl yĩnga, yaa noor a Zakoob Wẽnda sẽn yiisi.

⁶Yaa noor b sẽn kõ a Zozɛf buudu, Wẽnd sẽn wa n yik zabr ne Ezipt tẽnga. No-rɛɛs n deeg n gome n yeele:

⁷M sika zɩɩbã f bãgdẽ, m yolsa f nug ne yembd-tʋʋma.

⁸ [93†] F sẽn waa n zĩ ne yɩɩre f bool-m lame la m fãag-f lame. M zĩnda sa tãsa sʋka n leok-fo. M fɛɛs-f-la Meriba ko-nifẽ.

⁹M buudu, kelg-ma, tɩ m tara bũmb n na n wilg-fu, la fo sã n da tõe bɩ f kelgẽ, Israyɛl!

¹⁰Fo nengẽ, bɩ weer da le zĩnd wẽnd sãang yĩng ye! Wẽn-naand da paam waoogr f nengẽ ye!

¹¹ [94†] Maam f Soaala la f Wẽnde, la maam n yiis-f Ezipt tẽnga. Wilg maam f raaba fãa t'a na pidsi.

¹²M buuda ka kelg-m ye, a Israyɛl ka le tʋlg maam ye.

¹³Ya rẽ me yĩng la mam me bas-a ne a tʋb-pa-wʋmdem. B maan b sẽn date.

¹⁴M buud a Israyɛl sã n da kelgẽ a sã n da rɩkẽ sor ning m sẽn wilg-a,

¹⁵kõn le kaoosẽ tɩ bɛɛba tũ sor ye. M naan n zẽkẽ m nug n pãb-b n tõoge.

¹⁶Wẽnd bɛɛba naan n sulgẽ b menga la Israyɛl na n yãeẽ-la vɩɩm noogo daar fãa.

¹⁷Wẽnd na dɩlgẽ-yẽe ne alkam sõngo n tɩgs-a ne weoog sɩɩdo.