Read SEBR SÕNGO, 1998 Yɩɩla 85 Bible Online

Yɩɩla 85 - SEBR SÕNGO, 1998 bible

Yɩɩla 85

¹Yɩɩlla bee yɩɩla naab sebrẽ. A Kore kamb yɩɩlle.

²Soaala, yãmb wilga y nonglma ne y buuda tẽnga! Y tɩ lɛɛg n waa ne a Zakoob yemsã.

³Y luda y buuda rẽgdo, y yẽesa a yel-wẽna zãnga.

⁴Soaala, y sigsa y sũuri, y kiisa y sũ-puurã.

⁵Le kẽes-y tõnd y soolmẽ, Soaala la d Fãagda. Da bao-y n dok y sũur ne tõnd ye.

⁶Bõe tɩ y sũur na n kell n puug ne tõndo? Bõe tɩ y sũura na n zab dar fãa?

⁷D yet tɩ yaa yãmb n na n kõ-d vɩɩm? D yet tɩ yãmb n na n yɩ y buuda sũ-noogo?

⁸Kell-y n pʋg-y tõnd ne y nonglma, tɩ d paam fãagre.

⁹M na kelga Soaala-Wẽnd sẽn yete; yaa woto la b gomda: «Bɩ laafi zĩndi.» A zĩnd b buudã, la sẽn nong-b bãmba yĩnga. La rẽ yaa bãmb me sã n tedg zʋgo.

¹⁰Sẽn zoet-b bãmba fãagr pẽnegame, la Wẽnd yʋʋr na n yiime n pid d tẽngã.

¹¹Nonglem sẽn ka mi welgre na n zĩndame zemsgo la laafi na n kẽnd n yegda taaba.

¹²Nonglem sẽn ka mi welgre na n bula tẽngã n yi la zemsgo zĩndida yĩngr n sig tẽnga.

¹³Yaa Wẽnd meng n kõt sũ-noogã, tɩ tẽnga kõt a biisi.

¹⁴Zemsgo lʋɩta taoor n kẽnda, n tukd sorã n kõt-ba.