Read SEBR SÕNGO, 1998 Yelbũna 10 Bible Online

Yelbũna 10 - SEBR SÕNGO, 1998 bible

Yelbũna 10

¹A Salomo yelbũna: Bi-sõng noogda a ba sũuri, tɩ bi-wẽng sãamda a ma sũuri.

²Arzɛk sẽn paam ne tʋʋm yoodo ka yõod ye, f sẽn paam ne f tʋʋm sõma bala n tõe n zã f vɩɩm.

³Sẽn pʋʋsd-a Wẽnde ka kiid kom ye; la Naaba-Wẽnd mongda nin-wẽng a sẽn datã.

⁴Nug sẽn pa tʋmd wata ne naongo, tɩ nug sẽn tʋmd wat ne arzɛka.

⁵Yam soaba tigsda sɩpaolgo, la sẽn basd-a tigsgu n kẽed gãaga yaa nin-yaalga.

⁶Naaba-Wẽnd bark bee nin-sõng zugu, la nin-wẽng noor la a kũum loko.

⁷Nin-sõng tẽegre yaa pẽgre tẽegre, nin-wẽng yʋʋre ka zɛɛd sãoong ye.

⁸Sẽn tar-a yam sõngo deegda noore, yam kaoolgo soaba goam wãad-a lame.

⁹Sẽn kẽnd-a tɩrga tata a sẽn datẽ, sẽn kẽnd-a n tuumnẽ baooda a meng sɩbgre.

¹⁰Sẽn dat-a a to ne wẽnga na n dɩɩ bõne, wa yam kaoolg soab goam sẽn lɛɛg n dɩt-a.

¹¹Nin-sõng noore: vɩɩm ko-yũuga, nin-wẽng noore: kũum gʋlgo.

¹² [14†] Beem yaa zabre bug-vɩlenga, tɩ nonglem ya peende sẽn tar n lut kongre.

¹³Yam sõng n yaagd nin-sõng noore, la dasaare n palg nin-wẽng bãgdo.

¹⁴Bãngre la yam sõng soab tigsda wa arzɛka, tɩ nin-wẽng zelemde wat ne a wãabo.

¹⁵Arzɛk soab pãng la a arzɛkã, la bũmb ka wãad naong soaba n zʋʋg a naonga ye.

¹⁶Yaa vɩɩm la nin-sõng dolbo, yaa kũum la nin-wẽng laogo.

¹⁷Vɩɩm sore: noor tũudem. Meneng sore saglgo zãgsgo.

¹⁸F sã n tugd beem f ka togsd f pʋg ye, f sã n yelgd rõadga f zema gãeenga.

¹⁹Goam pa gomd n sesdẽ tɩ wẽng ka tũ ye, sẽn mi-a n gom n zemse la gũusg soaba.

²⁰Nin-sõng zelemde yaa wanzurf sẽn yɩlg zãnga, nin-wẽng sũur ka yiisd bũmb sẽn be yõod ye.

²¹Nin-sõng zelemde dɩlgda neb ka tɛka, la gãeemsa gãeemdo n kʋʋd-ba.

²²Wẽnd barka n wat ne arzɛka n yɩɩd m kaaga m rĩir tʋʋlgo.

²³Nin-wẽng wɩsgda a gĩini ne wẽng maanego, tɩ nin-sõng yẽegd a gĩini ne yam sõng baoobo.

²⁴Nin-wẽng sẽn ka rat yell ningã n pakd-a, nin-sõng sẽn kot bũmb ninga la a paamda.

²⁵Nin-sõng maneg n wẽrs n zĩime, tɩ sɩlmand sẽn wa bɩ a loogd ne nin-wẽnga.

²⁶F bao kʋɩɩm daolgo n kẽes f tʋʋmdẽ, f paama bõn-miisg sẽn na n zãab f yẽna la bug-zõos sẽn na n leo f nini.

²⁷Sẽn zoet-a Soaala nif paasda a yʋʋm sõore, la nin-wẽng yʋʋm tara woogre n dabda.

²⁸Nin-sõng yɛl baasda ne sũ-noogo, tɩ nin-wẽng saagr faagd n dabda.

²⁹Sẽn tũud-a Wẽnd be-la a tãnsoben-doogẽ, sẽn pa tũud-a bãmb wãada a menga.

³⁰Nin-sõng nao ka lukd b zĩigẽ ye. Nin-wẽng roogo ka tiid tɩ yals ye.

³¹Nin-sõng zelemda gomda yam goama, la b na n kong n võoga nin-wẽng dẽnna.

³²Nin-sõng noor gomda sẽn sakd kelgre, tɩ nin-wẽng gomd gom yoodo.