Read SEBR SÕNGO, 1998 Yelbũna 2 Bible Online

Yelbũna 2 - SEBR SÕNGO, 1998 bible

Yelbũna 2

¹M biiga, f sã n deeg m goama, f sã n deeg m noya f sũurẽ,

²f sã n yoog f tʋba n deeg yam zulunga saglse, f sã n gãneg f sũurã sɩda zugu,

³f sã n nek f pʋtẽere, f sã n bao yam sõngo n pẽneg f menga,

⁴f sã n bao-a wala f arzɛka,

⁵ad yaa wakat kãnga, la f na sɩng n zoe Soaala nifu, wakat kãnga la f na n sɩng Wẽnd bãngre.

⁶Yaa Wẽnd n kõt yam sõngo: bãmb noor n yiisd minim la bãngre.

⁷B sõngda nin-tɩrse la b yaa nin-sõma gãongo.

⁸Bãmb n get tɩ bũmb ba a ye da kedb ye, bãmb n togend b zo-rãmba so-sõngo,

⁹tɩ b mii sẽn zemse, sẽn toge, sẽn yaa tɩrga, tɩ b mii sor ninga sẽn dabd sũ-noog zĩigẽ.

¹⁰Yam sõngo kẽeda f sũuri, tɩ f bãngre pids-f ne sũ-noogo.

¹¹Wakat kãng la gũus-m-meng na n yẽeg-fo tɩ yam minim fãag-fo.

¹²F kõn le saag n dɩk so wẽng ye, n le saag n tũ gom yood soab ye,

¹³n le saag n tũ sẽn basd-b so vẽenese n kẽnd likẽ ye.

¹⁴Bãmb dãmb sũ-noogo la wẽng maanego, kẽes moogo la b tʋʋmde, tɩ b pẽgda.

¹⁵B soya fãa yaa goalma, b soya teesa pɩgla.

¹⁶Yam sõngo n na n zãag foom ne sãana, ne pag sẽn ka tẽnga paga, pag sẽn gomd gom noodo.

¹⁷Ade, a basa a pipi zoa, a basa a sẽn loe a meng ne a soaba Wẽnd taoore.

¹⁸Ade, a roog kɩlla a wãab kɩllgo. A sẽn tũud soy niyns fãa kẽesd-a-la Likẽ, kũuma zakẽ.

¹⁹Sẽn sõs-a ne-a ka lɛɛgd n wa ye, a pa le tõe n paam vɩɩm sor n dɩk ye.

²⁰Bao nin-sõma sor n dɩke, bao nin-tɩrs sor n tũ.

²¹Nin-tɩrse n na n vɩɩnde, sẽn ka mi b wẽng roto n na n yalse.

²²Nin-wẽnsã la tẽng kãnga nin-yoodã na n digame n yiisi.