Read SEBR SÕNGO, 1998 Yelbũna 21 Bible Online

Yelbũna 21 - SEBR SÕNGO, 1998 bible

Yelbũna 21

¹Dĩm sũuri bee Naaba-Wẽnd nugẽ wala kʋɩlga tɩ Wẽnd teesd-a goabg bɩ rɩtgo, wala b sẽn date.

²A meng nifẽ ninsaal tẽedame t'a baooda sẽn ya neere Naaba-Wẽnd yaool n nee a sẽn lʋɩɩs taoore.

³ [23†] Wẽnd nifẽ sẽn tũud-a sɩda la zemsgo maanda neere n yɩɩd sẽn kʋʋd-a maando.

⁴Sẽn get-a a to la a yĩgsdẽ, sẽn wukd-a a menga, sẽn maand-a wilg-m-menga, rẽ fãa yaa wẽnga.

⁵Sẽn nong-a tʋʋmde zĩndame n tagse, la rẽ yaa yõodo a yĩnga; sẽn maand-a yãgbo mii kom-gãaga.

⁶Yag zirẽ n paam arzɛka, ka bũmb a to n zʋʋg kẽne n babs kũum ye.

⁷Nin-wẽnsa toolma n wãad-ba tɩ b zãgsa zemsg tũudem.

⁸Nin-wẽng sor yaa goalenga, la nin-sõng manesem yaa tɩrga.

⁹F sẽn na n pa rakõ-roogẽ são f sẽn na n be roogẽ ne pʋg gãeenga.

¹⁰Nin-wẽng yalẽ wã fãa teesa wẽnga, a ka be sugri ne a tũud-n-taag ye.

¹¹Yalem yam yẽegre yaa a sẽn yãete tɩ b pãbd sẽn yaanda a taaba.

¹²Yam soab meng sã n paam zãmsgo, a bãngr paasdame. Nin-sõng nee nin-wẽng zak sẽn yaa a soaba, a neeme tɩ yaa far bala.

¹³Ned ninga sẽn ka rat-a n kelge naong soaba, n pag a tʋba, yẽ soab me watẽ n kelmame, la ned kõn leok ye.

¹⁴Kũun sẽn soos n kõ maagda sũuri, a kiisda sũur sẽn wit wa bugum.

¹⁵Nin-sõng sũur yaa noogo a sẽn tũud tɩrgã, tɩ nin-wẽns sẽn tũud wẽnga zĩ ne rabeem.

¹⁶Sẽn zãagd-a a menga ne gũusgu sore, teesa kɩɩmsa ba yiri.

¹⁷Sẽn nonga noogo kiid-a ne naongo, sẽn nong-a rãam la rɩ-noodo kõn tol n tigs arzɛk ye.

¹⁸Beed ninga nin-sõma la nin-tɩrsa sẽn ka na n segã n na n yɩ nin-wẽnsa pʋɩɩre.

¹⁹F sẽn na n tɩ f zak we-raoogẽ são f sẽn na n tɩ f zaka ne pʋg-gãeenga la sũ-beed soaba.

²⁰Yam sõng soaba sẽn bĩngd a roogẽ, yɩɩda sãnem la arzɛk buud fãa. Yalem bala n ka tẽegd beoogo.

²¹Sẽn baood-a sõmblem, sẽn ya-a nimbãan-zoeta, yẽ soab na n paama vɩɩm, sõmblem la sũ-noogo.

²²Tẽnga meeme n ning lal-gũbri tɩ rabeem kaẽ ye, mik yam zulung soab tat n tus-a lame n lub bõra.

²³Sẽn tõe-a a noore la a zelemde põsa yɩɩr buud fãa.

²⁴Sẽn ka ningd-a a taab sʋka, n pid ne tɩtaam yẽ soab toog ka be ne bũmb ba a ye, a wilg-m-menga bal la a wuk n zĩ ne.

²⁵Kʋɩɩm daolg daab waglsã n kʋʋd-a, a raabã pa naagd ne a nug tʋʋmd ye.

²⁶Beoog vẽegdame tɩ nin-wẽng zĩ n saagdẽ, nin-sõng vaagd n kõtame t'a ka mi beed ye.

²⁷Wẽnd sẽn kis wa fãa-fãa yaa nin-wẽns maoongo, yaa maoong sẽn kʋʋd ne wẽnem.

²⁸Kaset zirẽ soab na ki; sẽn mi-a a sĩnd n kelge n wat n lebg goam mita.

²⁹Nin-wẽng kẽndame wa a pa zoet fɩ; nin-sõng manegda a vɩɩm sore tɩ ya sõngo.

³⁰Soaala-Wẽnd taoore ninsaal yam vẽenem, a gũusgu, a saglse, yaa zaalem.

³¹Tãnsoab weef sẽbda zabre daare, la Naaba-Wẽnd n kõt daoodo.