Read SEBR SÕNGO, 1998 Yelbũna 22 Bible Online

Yelbũna 22 - SEBR SÕNGO, 1998 bible

Yelbũna 22

¹Yʋ-noogo são sãnem baoore; paam tɩ ned waoog-fo la sãnem la wanzurfu.

²Arzɛk soaba la naong soaba sõsda maasem yɛnga, Naaba-Wẽnd n naan-b fãa.

³ [24†] Yam soab yãeta yel-beedo sẽn wate n solg a menga, tɩ yam kaoolg soab wudgi n kẽ sʋka, n pa yellẽ.

⁴Sulg-m-meng yõodo yaa Wẽnd nif zoeese, n paas arzɛka, waoore, la yõ-woko.

⁵Nin-wẽng sor gãnega bãeense la gõose; sẽn nong-a tẽng zug vɩɩm, zãaga ne vɩɩm menga.

⁶Zãms bi-bɩɩga minim sõma a tʋʋmda sɩngrẽ, t'a wa kell n vɩɩnd boto.

⁷Naong rãmb naaba: arzɛk soaba; ned sã n peng f ligdi, a lebga f zu-soaba, tɩ fo lebg a yamba.

⁸F sã n bʋd zãmbo, f kẽebda bõne; la pãng ning f sẽn tar n tʋmd beeda na n sɛɛme.

⁹A mi sugri n paamd Wẽnd barka, t'a rɩkda a meng rɩɩbo n kõt naong rãmba.

¹⁰Dig zab-baooda tɩ zabre na wẽneg n sɛ, tɩ gãgsa la tʋya pa koees-koeese.

¹¹Ned sã n nong pʋ-peelem soaba la nin-bʋgsgo, dĩma me nonga nin-kãnga.

¹²Naaba-Wẽnd sõngda mita la bãmb n kalemd nin-wẽng zelemde.

¹³Kʋɩɩm daolg yetame: bõnyẽeg n be yɩnga, m sã n yi a nan kʋ-m lame.

¹⁴Loang sẽn zulum wʋsgo la pag sẽn ka zoet yãnde Wẽnd sẽn bas a soaba lʋɩta a goama bẽdgẽ.

¹⁵Kom-bɩɩba sũur bãag la gãeemdo, dasaar sẽn mukd sõmbo n sãoogd-b.

¹⁶Naong soab tara pɛta la pɛta n na n wa ne a yidgri; sẽn kõt-a arzɛk soaba paasda a naong bala.

¹⁷Kɩll f tʋbre n kelg yam vẽenem rãmb goama, nek f yam n deeg bãngr ning m sẽn dat n kõ-fo.

¹⁸Bĩng-ba f yamẽ, pẽneg-ba f noorẽ tɩ b na wa ne f sũ-noogo.

¹⁹M tʋllame tɩ f rɩk f saagre n bas ne Wẽnde, yaa rẽ la m dat n wilg-f rũnna.

²⁰Ade, fo yĩnga, m gʋlsa naoor yaka n dat n sagl-fo la m kõ-f bãngre.

²¹F sẽn na n paam zãmsg ninga na n sɩd puka f yam. Woto ned sã n baood bãngre f na tõog n zãms-a sɩda la sɩd bala.

²²Da tũ naong soab ka pãngã n loog ne a sẽn tar ye; bʋʋd zĩigẽ me bɩ f ra wɩbg sẽn ka tar-a sõangd ye.

²³Naaba-Wẽnd na n sõng-a lame, la yaa fãadba vɩɩm la b na n deege.

²⁴Da yõg zood ne sũ-pu-ned ye, da tũ sũ-to-ned ye.

²⁵F wat n lebga wa yẽnda n lʋɩ a bẽdgẽ.

²⁶Da saag n kãab ned tɩ f na n yao a sam ye.

²⁷Ad-f sã n ka tar n yaooda b wat n looga ne f gãaga.

²⁸Da saag n vik toaag kugri f yaab rãmb sẽn vigli ye.

²⁹Yɩ ned sẽn mi-a a tʋʋmde la ra yɩ tʋʋm-tʋmd yaalg ye tɩ woto rĩma meng wat n kẽes-f-la a tʋʋmnẽ.