Read SEBR SÕNGO, 1998 Yelbũna 28 Bible Online

Yelbũna 28 - SEBR SÕNGO, 1998 bible

Yelbũna 28

¹ [32†] Nin-wẽng kʋɩta tĩiga tɩ ned yaool n ka pʋgd-a ye, nin-sõngo yaa wa bõnyẽ-bila a ka zoet sẽn wãgd ye.

²Tẽng rãmb sã n zẽk b zugu ne b naaba, nanamsa lebgda kʋʋngo. Naaba sã n tar yam la bãngre, bũmb fãa lebda a zĩigẽ.

³Zu-soab sẽn ya naong soaba n dɩt a ka-neng rãmba, wẽnda saag sẽn ni ne pãnga n loog ne fãa, tɩ rɩɩb kaẽ n dɩtẽ ye.

⁴Sẽn ka tũud-b noore pẽgda nin-wẽnga, tɩ sẽn tũud-b noor puugd b sũuri ne-a.

⁵Nin-wẽns ka mi noor deegre sẽn dat n yeel tɩ bũmb ning ye. Sẽn deegd-b noor bala n tar dẽ võore.

⁶Naong soab sẽn vɩ ne sõmblem, são nin-wẽnga sẽn tũud so-golemse, n yaool n ya arzɛk soaba.

⁷Sẽn tũud-a noor yaa biig sẽn tar yam, sẽn tũud-a yoaadba lebgda a ba yãnde.

⁸Sẽn paasd-a a paoongo ne peng-wẽnse, tigsda arzɛka, ned a to sẽn na n wa rɩk n kõ naong rãmba.

⁹Sẽn yẽt-a a tʋba n pa rat n bãng noore, Wẽnd ka reegd a soab pʋʋsg ye.

¹⁰Sẽn takd-a nin-sõma n kẽes a so wẽng pʋga, yẽ soab lɛɛgd n lʋɩ-la a meng loangẽ.

¹¹Arzɛk soab tẽedame t'a tara yam, mik naong soab yam n na n yɩɩg-a.

¹²Nin-sõma paoongo sã n paasdẽ yaa sũ-noogo, sã n yaa nin-wẽns dẽnd n paasde, lebga f zoe n bao zĩiga.

¹³Sẽn solgd-a a wẽnem ka tõe n yɩ ned ye, sẽn pukd a wẽnem wilgdame t'a kis-a lame la a paamda sugri.

¹⁴Sũ-noogo soaba la sẽn maand-a gũusgu, sẽn zãgs-a gũusgu, lʋɩta yell pʋgẽ.

¹⁵Na-wẽnga sẽn dɩt naam t'a soolem dãmba zĩ ne pɛta, wẽnda bõnyẽega la gɩgemd-padre, bãmb tɛk yaa kelem la wudg n bri.

¹⁶Naab sẽn ka tar yam pida ne pãn-tõogo; sẽn ka tar-a fãad yam tara yõ-woko.

¹⁷Ned sẽn mi a sũurẽ t'a kʋʋ neda, zoet n digda a meng yaoogẽ, bɩ ned da gɩdg-a ye.

¹⁸Sẽn tar-a a meng neere, yell kõn pak-a ye. Zãmb soab kõn põs ye; a sã n põs rɩtgo, a paada goabga.

¹⁹Sẽn kood-a a pʋʋgo kõn kong rɩɩb ye, la sẽn pʋgd-a a kuroogo na tɩg kom gãase.

²⁰Pʋ-peelem soab n paamd Wẽnd barka, sẽn dat-a n lebg arzɛk soab tao-tao ka põsd sɩbgr ye.

²¹Ges ned nenga n kao a bʋʋdo, ka sõma ye, la neb a wãna n sakd yel-wẽnde, dɩɩb bilfu yĩng bala?

²²Sẽn zoet-a n pʋgd arzɛk nini ka noom ye, a ka mi tɩ nimbãaneg na n wẽneg n lʋɩ-la a zug ye.

²³Sã n ka zoet ned nifu n wilg-a a kongre, f wat n mikame tɩ foo ne-yẽ lebga zoodo, n yɩɩd sẽn pʋgd-a n belgd-a.

²⁴Ned sã n zuk a ba bɩ a ma n yet tɩ rẽ ka yel-wẽnde, yẽ soab ne fãad zem taaba.

²⁵Rat wagl soaba wata ne zaba, la sẽn teeg-a Wẽnde, bũmb kõn paoog-a ye.

²⁶Sẽn teeg-a a meng dabaar yaa yalma; sẽn kẽnd-a ne gũusgu na n põsame.

²⁷Ned ka kõt naong soaba n lɛɛg n ki kom ye, la sẽn yãet-a naong soaba n mum nini n looge, Wẽnd yãkda a soab barka.

²⁸Nin-wẽns sã n so tẽnga, ned kam fãa baooda zĩig n soonde, b sã n looge, nin-sõma wekda balbo.