Read SEBR SÕNGO, 1998 Yelbũna 7 Bible Online

Yelbũna 7 - SEBR SÕNGO, 1998 bible

Yelbũna 7

¹M Biiga, kelg m goama, bĩng koɛɛgã f sũurẽ.

²Deeg m salgsã tɩ f na vɩɩnde, nong m saglsã wala bũmb sẽn be yõod wʋsgo.

³Gãd-b ne f nus-bi, gʋls-ba f sũurẽ.

⁴Bool yam vẽenem tɩ f tão, bool-a tɩ f zoa.

⁵Woto a na zãag-f ne sãana, ne pag sẽn tar zelem noogo.

⁶A lɩka a peemlɛɛgẽ, a karga tẽnga ween-vɩʋʋgo,

⁷a yãenda a yam-pa-seke, kom-bɩɩba sʋka.

⁸A yam-pa-sek dɩk a yir sore, a tũuda so-buka sẽn yegd sãana doogo.

⁹Zĩig yaa pugsgu, zĩig zoe n sobgame, ya yʋn-sʋka, yaa lika,

¹⁰la paga yiime n seg-a, a baoo peend n lud a nenga wa bi-pugla.

¹¹A ka yɛɛsd bũmb ye, a ka zoet nif ye, a ka tõe n zĩnd yir ye.

¹²A saada so bɛda, a saada so-tiisã, a baooda zĩiga n yɛs n gũud neba.

¹³A wudgdame n mobg a sẽn seg a soaba, a wɩsga a meng n yeele:

¹⁴«M da tara bark pʋʋsg maando n na kʋ; n pidsa m pʋlong dũnna.

¹⁵Yaa rẽ yĩng la m yi n seg foom, m yiime n na n bao foom, la m yãend-f lame.

¹⁶M gãaga tʋɩ ne peend neere, yaa peend sẽn yit Ezipt tẽnga.

¹⁷M baoo bũmb sẽn tar yũ-noogo n mese, bũmb sẽn tar gondreyẽoogo, la wisao yũugu.

¹⁸Wa, tɩ d bao sũ-noogo tɩ beoog vẽege, wa tɩ d dɩk d meng n kõ sũ-noogo.

¹⁹M sɩd ka yir ye, a toga so-woko,

²⁰a looga ne ligda korgo, dẽn kiuugã lebg ki-peelgo t'a yaool n lɛɛg n wa.»

²¹A tara goama n tar goama, t'a yam-pa-sek yama wẽnemde. A goama paama pãnga t'a yam-pa-sekr na n tũ-a.

²²A tũud-a lame t'a sũur kiuusdẽ, a tũuda wala naafo b sẽn tat n na n tɩ kʋ, wala yãk sẽn lʋɩ loangẽ.

²³La pĩim n gũud a wakato, n na n kõs a lʋgre, wala tãoog sẽn yõk luiila t'a miẽ tɩ yaa a vɩɩm baasgo.

²⁴M biiga, kelg maam marsã, kelg m goama neere,

²⁵sõng tɩ f sore da bʋgd n yek a yam-pa-sek dẽnd ye, da saag n tũ a menesg soy wã ye.

²⁶Ad neb niyns a sẽn wẽ n kʋ sõor labsa, sẽn da teeg-b meng pãnga paame.

²⁷A yirã yaa bugum yir sore, a sorã sigd n dabda kɩɩms zĩigẽ.