Read SEBR SÕNGO, 1998 Kowelɛt 12 Bible Online

Kowelɛt 12 - SEBR SÕNGO, 1998 bible

Kowelɛt 12

¹Tẽeg f Naanda yelle tɩ f ket n ya pẽbre. Tẽeg b yelle tɩ raara nan ket n zãra, daar ning f sẽn wat n yeele: «M ka le rɩt m vɩɩma sũ-noog ye.»

²Wakat kãng tɩ wĩndga kɩllame tɩ ya lika. Wakat kãng tɩ kiuuga la ãdsã sobame, tɩ saaga niid n pa yoogdẽ ye.

³Wakat kãnga f na n wẽnega ro-gũud sẽn digd rabeem a roog noore, n wẽneg bi-bɩɩg sẽn wẽneg n kʋʋl n zõonde, n wẽneg roog-biig sẽn zãgs neerẽ werbo, a sẽn lebg a ye yĩnga, n wẽneg pag sẽn ka le rat tɩ b yãend a neng yɩnga.

⁴F vɩɩma na n lɛɛg n paga a toore wa kʋɩlenga sẽn lug roog noore. Werd-m-toor sã n yaasdẽ, a bʋʋra me woogdame; luiila, yɩɩn-yɩɩnda sã n yɩɩl n tɩge, a koɛɛga boogdame.

⁵Sor sã n dʋʋda, a tũub wat n lebga rabeem ne-fo, nao wã zẽkr meng wat lebga toogo; f zoobda na n pelga wa laongo; yɩgd n vũud f yam wa sʋʋra ka na n le yɩg ye, f zelemda ka na n le bak toog la miisg ye. Daar n wate tɩ Adem biig fãa na n dɩk ra-babs sore la kʋ-yãbdba zoe n seglame n gũudẽ.

⁶Daara na n taame, vɩɩma gĩsga, a gĩs pɛɛlg wa wanzurfa, na n tõsgame, sãnema wamda na n wãagame, yʋʋra na wesga kʋɩlgẽ, lɩʋʋga na pa bulgẽ.

⁷Wakat kãng la ninsaal yĩnga na n leb a tomẽ tɩ yaa be la a yi yã, tɩ vɩɩma vʋʋsem me leb Wẽnnẽ tɩ bãmb n da fʋʋs-a.

⁸Wa a Kowelɛt sẽn togse, sɩda, bũmba fãa yaa zaalem sẽn pid zaalem.

⁹Tog n paasame t'a Kowelɛt ka vʋʋs ne zãma wã zãmsg ye. A zuka a bãngra zãnga n kõ-ba. A dõoga yelbũn ka tɛka. A modgame tɩ yelbũnd fãa pid ne yõodo.

¹⁰A Kowelɛt modgame n togs yɛla wa b sẽn ya-la, la a baas n yãe goam sẽn kõt-d daoodo.

¹¹Mitba goam yaa wa bũmb sẽn nekd yam, yaa wa wĩir sẽn loet bãngra ne taaba, tikem-tikem. Yaa Wẽnnaam n walemd gom-kãense, tɩ bãmb bala n mi sor n wilgdẽ.

¹²M biiga m na n wilg-f lame tɩ f ra saag n gʋls bũmb n paas ye. Sɛba sõor paasgo yaa tʋʋmde sẽn ka be baasg ye la sẽn sɛt ninsaal pãnga.

¹³Goama tɛk yɩ woto. D zems taab zãnga. Zoe Wẽnd nifu la f tũ b noore tɩ rẽ la ninsaal fãa tʋʋm-pakre.

¹⁴Bãng tɩ d yel-manesem buud fãa, sẽn solge bɩ sẽn puki, sẽn ya neere, bɩ sẽn yã wẽnga, fãa na n bool-d-la bʋʋdo Naaba-Wẽnd taoore.