Read SEBR SÕNGO, 1998 Kowelɛt 2 Bible Online

Kowelɛt 2 - SEBR SÕNGO, 1998 bible

Kowelɛt 2

¹Mam da kõo m meng yam kãnga: yik n maan f yamleoogo, loog n dɩ naare! La kato! Dẽ me yaa wudg n kok zaalem.

²M waa n leoka laad poorẽ tɩ yaa yalemdo! N leok yĩng sũ-noog poorẽ tɩ m pa yãend a sẽn paasd bũmb ning ye.

³M kaoola m sũurẽ tɩ m na n tɩgsa m yĩnga ne rãam, n kaool tɩ m kõn bas n yẽesma zãng yẽ ye. La baasgo n na maan yalemdo sẽn zems bala, m bãng bõe n tog ne Adem biig a tẽng zug vɩɩm koɛɛga pʋgẽ.

⁴[2†] La mam maana sẽn labsa. M yik n mee roto, m sela bugsuntungu,

⁵m koo zẽedo, n sel tɩɩse. M sela tɩɩs sẽn womd biisi, buud toor-toore.

⁶M tuu bãgse n tõog n zãgs m tɩ bõonese sẽn piuug wa googo.

⁷[3†] M daa yem-daado la yem-posge; m baoo sõgen-kamba la rũmsi, m niis la m piis sõor yɩɩ ka tɛka. M yɩɩga sẽn deng-b maam Zerizalɛɛma fãa.

⁸[4†] M baoo arzɛka n zame, wanzurf la sãnem. M deeg-b-la dĩm dãmb kẽere nengẽ, b soolem dãmb nengẽ. M baoo yɩɩn-yɩɩndba, dapa la pagba. M paama paga, m paasa pagb wʋsgo, la rẽ la Adem biis sẽn pẽgd wa fãa-fãa wã.

⁹[5†] M lebga nin-kãsenga, m lebga arzɛk soaba, m yɩɩga sẽn deng-b maam Zerizalɛɛm. Yam vẽenem ning m sẽn paama n sõng-m.

¹⁰Mam gesa m nini sẽn tʋlg n ges bũmb ninga fãa, la m ka mong m sũurã sũ-noog ba a ye. M sũur yɩɩ noogo ne m tʋʋmda fãa, dẽ n yɩ yõod ninga m sẽn dɩ, m tʋʋma pʋgẽ.

¹¹La mam gesa m nus sẽn tʋm tʋʋm ninsa fãa; m gesa naong ning m sẽn namsã, la ayo! Dẽ fãa ka yõod ye, la yaa wudg n bir sobgo; ad-y yõod ka be saaga tẽngr ye.

¹²M tʋlgame n bãng yõoda sã n bee yẽesmẽ wã n yɩɩd gãeemdẽ la yalemdẽ. M tʋlgame n bãng ned ninga sẽn na n dʋ zaoora mam poorẽ wã manesma sã n na n yɩɩ toore.

¹³Sɩda m miime tɩ yam vẽenema n são yalemdã wa m sẽn mi tɩ vẽenem n são likã.

¹⁴Sẽn tar-a yaam nee a sẽn dabdẽ la yalma babendame n baood a sore. Yaa sɩda! La mam miime tɩ bãmb b yiib fãa baasg na n yɩ-la a ye.

¹⁵Tɩ mam yet m sũuri: gãeeng baasgo sẽn yaa a soaba, mam me baasgo yɩta boto, dẽ yĩnga, m yẽesmã yõod be yɛ marsã? La mam yeta m sũurẽ tɩ rẽ me m ka tar võor ye.

¹⁶Yam soab woo, gãeeng woo, b sẽn tẽegda a soab yell n kaoos ka ye, beoog ne a na n vẽege tɩ yĩma bãmb b yiib yelle; yam soab na n wa kii wala yalma la neba pa na n tẽeg a ye yelle n yɩɩg a to ye.

¹⁷La yɛla sẽn ya woto wã, m yam ka be ne m vɩɩma baa bilfu; tɩ sẽn maan fãa saaga tẽngre pa tat m yam ye, la bũmb fãa yaa ka yõodo, yaa wudg n bir sobgo.

¹⁸Mam kisga tʋʋmda ne a naongã a sẽn pids m vɩɩma tẽng zug ka, la rẽ yaa m sẽn ne tɩ yaa tɩlɛ tɩ m wa bas-a ne sẽn na n deega mam zĩigã.

¹⁹Ãnd n mi la ãnda n tõe n bãnge a na n yɩɩ yẽesem soaba, bɩ gãeenga? Yẽnda n yaool n na n wa soog yõodo, m tʋʋmdã m sẽn tʋm saaga tẽngrã ne yama yõodo. Dẽ me yaa bũmb m sẽn ka wʋmd a võore.

²⁰Woto marsã la m waa n dat n bas raoodo, ne m tẽng zug tʋʋma fãa.

²¹Ges-y ned sẽn tʋm a tʋʋna ne yam la minim tɩ sake, la yaool n yaa ned sẽn pa naag n tʋme, n na n deeg a pʋɩɩre. Ad-y m ka ne rẽ me yõod ye, yaa naong kãseng bala.

²²La woto marsã, bõe n kees nin-kãnga yĩnga? A tʋʋm tooga ne a namsgã, a sẽn yãend a vɩɩma pʋgẽ, tẽng zug ka wã, bõe yõodo la a rɩkd a pʋgẽ?

²³[6†] Beoog sẽn vẽege, yaa namsg ne namsgo, tʋʋmda menga yaa sũ-sãanga, la yʋngo gõeem ka laafi gõeem ye. Dẽ me yõoda la bʋgo?

²⁴ [7†] Ninsaal raab yaẽ la a rɩẽ la a yũẽ la a lembẽ sũ-noogo ne a tʋʋmde. M neeme tɩ yaa Wẽnd me raabo.

²⁵Ned sɩd ka be n tõe n dɩ la a noog a sũuri, Wẽnd sã n ka kõ-a ye.

²⁶[8†] Wẽnd kõta b sẽn dat a soab yam vẽenem, bãngre la sũ-noogo. B sẽn kõt yel-wẽnd maand tʋʋmd ninga yaa bao la a tigs nin-sõng yĩnga. Woto wã yel-wẽn-maanda yõodo ne sẽn bira zaalem yõod zem taaba.