Read SEBR SÕNGO, 1998 Kowelɛt 5 Bible Online

Kowelɛt 5 - SEBR SÕNGO, 1998 bible

Kowelɛt 5

¹Da yãg ne goam ye. La f da yãg tao-tao n pʋlem f pʋlen-bɛd Wẽnnaam taoor ye. Tɩ Wẽnnaam be yĩngri tɩ fo be tẽnga. Bɩ goama gom n zemse.

²F sã n gomd wʋsgo, f tõeeme n ka tags tɩ sek ye. Yaa wala ned sẽn zĩi n yɩɩdẽ sẽn tõe n zãms yoodo.

³[12†] F sã n pʋlem Wẽnnaam bũmbu, bɩ f ning pãnga n pids f pʋleng tao, tɩ Wẽnnaam pa nong yalemd ye. Pids f kãabgo.

⁴Da pʋlme n são f sẽn pʋlemd n pa pidsi.

⁵Maan gũusgu, tɩ f noor gomd da wa kɩt tɩ f menga tõre dɩ taale, la f da wa yeel maan-kʋʋdã tɩ f tudgame ye. Ad goam a woto tõe n puuga Wẽnd sũuri tɩ f sẽn tʋlg neera wa lebg zaalem.

⁶Goam pererr ne ta yʋng n zãmsd zãmsd ka tɛka zem taab ne yõodo. Woto wã ges n lʋɩɩs Wẽnd waoogra taoore.

⁷Fo sã n wa yãe tɩ tẽnga pʋgẽ b namsda naong soaba, la b kaood bʋʋdo n ka yɛs n get ãnna n so bʋʋm, n pa baood sɩda, bɩ f ra maan wa ling-f lame ye. Ad nin-kãseng n be nin-kãseng zugu, tɩ bɛd-bɛd me le be bãmb zugu.

⁸Tẽngã n waa n tɩ gal ne yõodo, tɩ dĩma meng teega pʋtã.

⁹Sẽn nong-a ligdi, ligdi pa sekd-a ye; sẽn dat-a naare arzɛk pa paad a nugẽ ye. Dẽ me ka võor ye.

¹⁰Rɩɩba sẽn nar zĩig ninga, ad rɩtb tigimdta taab be zembala. La bõe la dɩɩba soab paamd a arzɛka pʋgẽ sã n ka nina gesg yamleoogo bala?

¹¹Sẽn nong-a tʋʋmd soab gõeem noma, a rɩ n tɩge t'a pa rɩ n tɩge; la arzɛk soab pʋg pitame tɩ gõeem yaool n pa sakd-a ye.

¹²Mam le yãeta yell a to saaga tẽngre sẽn pa zems baa bilfu: yaa arzɛk sẽn bĩngi t'a na n yaool n wa wã a soaba.

¹³Yel-beedo n wat n sɛɛs arzɛka gilli. A sã n dog biiga a ka basd a nug ne bũmb ye.

¹⁴[13†] Ned dogda bɩlgemde n na n loog bɩlgemde wala a sẽn wa bɩlgemde, t'a tʋʋmnã pʋgẽ, a pa rɩkd bũmb n tall n loog ye.

¹⁵Yell kãng me ka zemsg baa bilfu, fo sẽn lebd bɩlgemde, wala f sẽn dog bɩlgemdã, bõe yõod la f rɩk yã, f sẽn tʋme, f bira sobg bala!

¹⁶Dẽ pʋgẽ me beoog sẽn vẽeg fãa, pɛt bala n tar foom la sũ-sãang la yɩɩre la bãase la sũ-toogo.

¹⁷Ade, sũ-noog ninga sẽn tog ne ninsaala m sẽn yãende, yaa a rɩ la a yũ, yaa a rɩ yõod ne tʋʋma fãa a sẽn tʋmd tẽng zugã; tɩ zems ne Wẽnd sẽn kõ a dasem sõor ninga, tɩ rẽ la a pʋɩɩre.

¹⁸La f sã n zãad arzɛka, n zãad paoongo, f sã n paam n dɩt f tʋʋma yõodo la f kɩdemnẽ, ad rẽ yaa Wẽnd kũuni.

¹⁹Ninsaal ka le tagsd a pʋlemdã sõor tɛka, Wẽnnaam sã n yãmb a sũurã ne sũ-noogo ye.