Read SEBR SÕNGO, 1998 Kowelɛt 7 Bible Online

Kowelɛt 7 - SEBR SÕNGO, 1998 bible

Kowelɛt 7

¹ [14†] Yʋ-noog são ka-noog sẽn daad toogo, tɩ kũum daar são dogem daare.

²Kẽ kũum zakẽ são f sẽn kẽed kibs sẽn dɩt zĩig ninga, tɩ ninsaal fãa baasgo na n yɩɩ boto, la kũum zakẽ sẽn vɩ-a ne yõor fãa bɩɩsda a tagsgo.

³Yãbre são laado; yãbr wata ne nen-gãnenga la a pekda sũuri.

⁴Yam yẽesem soaba la b segd sũ-sãanga zakẽ, yalem la b segd sũ-noog yiri.

⁵Kelg yẽesem soab saglgo são yalma pẽgr yɩɩl kelgre.

⁶Gãeeng laad sẽn wẽnd bũmb ninga, bãng tuud sẽn dɩt bugum yɩgrẽ la b pusdẽ. La sẽn ka be võor n yɩɩda,

⁷yaa pãn-tõog sã n lobgd yam soab gãeemdo, tɩ kũun sẽn kõt menesd a pʋ-peelem.

⁸Baas neer são sɩng neere. Maag-m-menga n são wilg-m-menga.

⁹[15†] Da yãg n puug f sũur ye, tɩ yalem sũuri n puugd tao-tao.

¹⁰D da sok yaa bõe yĩnga la zaamẽ são rũnna ye. Sokr a woto buud ka segd ye.

¹¹Yẽesem nooma wa buud pʋɩɩre la a nafda sẽn be a tẽng zugu ka.

¹²Yẽesem sõngda wala ligdi n ligind yɛla. Yẽesem rõnegda vɩɩm dẽ me la paam-a la bãng n sog-a tar yõodo.

¹³Ges Wẽnnaam tʋʋma. Ãnna n tõe n tẽeg Wẽnd sẽn põde?

¹⁴Kɩdeng daar bɩ f noog f sũuri, la ko-yũud daare bɩ f tagse: ad Wẽnnaam n maan bãmb b yiibã fãa la ninsaala ka tõe n yãg n bãng bõe n na n lʋɩ taoore, t'a to pʋg ye.

¹⁵Mam vɩɩma ne a ya koɛɛga, ad-m paam n bãngame tɩ d tõe n sega fãa. Nin-sõng sẽn kiid ne a sẽn yaa nin-sõngã, tɩ nin-wẽng ket ne yõore ne a sẽn yaa nin-wẽngã.

¹⁶Gũus n da mams f meng wa nin-sõng tɩ yõsg ye, la f da maan tɩ foom n tar yẽesem tɩ loog ye. F bõnda f meng bõe yĩnga?

¹⁷Da maan wẽnem tɩ loog ye, da yɩ yalem ye. Bõe yĩng la f na n ki tɩ nan pa ta?

¹⁸Togame tɩ d gãd sagls a yiibã. Sẽn waoogd-a Wẽnde ka kongd a sẽn na n yalsẽ ye.

¹⁹Yẽesem kõta yẽesem soaba vẽenem n yɩɩd tẽn-soaben-dãmb piiga sẽn get tẽng a ye yelle.

²⁰Ninsaal ka be tẽng zug t'a sõmblema sek a vɩɩnd neere n ka tol n tudg bada ye.

²¹Ka tog tɩ d gãd wa sɩd menga neba sẽn gomd goabg la rɩtga ye. Ka rẽ f na wʋm tɩ b yet tɩ f dakõor gomda beed f poorẽ.

²²Naoor a wãna la f meng rɩ kaseto tɩ f wɩta f taaba?

²³M gesa dẽ fãa ne gũusgu n tẽed tɩ m na paam yam vẽenem la m neeme t'a paoong yaa toogo.

²⁴Tõnd sẽn ne bũmb ning marsã wã yita sẽn zulmẽ. A yita al yɩɩga. Yɩlẽ n wʋm a võor zãng yaa toogo.

²⁵M nadga pãnga ne gẽesgo la vɛɛsgo. M tʋlgame n wʋm yɛla võore. M pa rat n dok zugẽ n bas sẽn tagem tẽngr tẽngra ye. M bãngame tɩ sẽn pʋgda wẽnga bɩ yalma, fãa wẽnda gãeemdo.

²⁶M yãendame tɩ pag nina yaa wa bẽdgo la a sẽn wat ne sũ-sãang ninga yɩɩda kũum sẽn wat ne a soaba. Pag nina sũur yaa gãmbre t'a kams yaa loetse. Sẽn tũud-a Wẽnd daabo, yẽ soab põsdame. Yel-wẽnd maand yẽ paada a bẽdgẽ.

²⁷Woto la m yãe yã, a Kowelɛt n gomde, m sẽn waa n zĩnd n pʋg yɛla a yeyn-ye n na n bãng b võore tɩ baas n pa yãk neng ye.

²⁸Neb tusri sʋka mam yãeta dao sẽn tõe n bool tɩ yẽesem soaba. Pagba ka tɛka sʋka m baoo pag sẽn tog ne waoogre n konge.

²⁹Ad mam sẽn wʋm bũmb ninga: Wẽnnaam naana ninsaala t'a pʋg ya pɛɛlg fas la yaa ninsaal n yik n baood gõdem-gõdem.