Read SEBR SÕNGO, 1998 Yɩɩn-noog menga 8 Bible Online

Yɩɩn-noog menga 8 - SEBR SÕNGO, 1998 bible

Yɩɩn-noog menga 8

¹Ges wɛ! Tõnd dag n yaẽ ma-biisi, n yẽsmẽ ma a ye bĩisim, m sẽn yãendẽ foo zĩig ning fãa m tõe n mobgẽ-f lame tɩ ned ba a ye ka sãbs-d ye.

²Sã n yaẽ woto m lʋɩtẽ la f taoore, m taldẽ-f lame n kẽes m ma roogẽ, n kelg f koɛɛga zãnga la m yũnug-f ne rãam sẽn tar yũ-noogo, wa weooga fãa sẽn yelgd a soaba soom-saar wakato. M na yũnug-f ne m meng rã-toose.

³M zug kʋglẽ-la f goabga tɩ f rɩtg mobgẽ-ma.

⁴M yõkda y sɛɛga, Zerizalɛɛm kom-pugli tɩ y ra nek-a ye, tɩ y ra nek m zooda ye, bas-y m zooda t'a gũs a raab tɛka.

⁵Yaa ãnda n tik a noanga n yit we-raoogẽ n watẽ? Yaa maam n nekd foo tɩɩga tẽngre, f ma sẽn dɩk f pʋg zĩig ningã, sẽn doga fooma sẽn dɩk f pʋg zĩig ningã.

⁶Bas tɩ m yɩ wa makre f sũurẽ, tɩ m yɩ wa makre f kangẽ, tɩ zood yaa pãng soaba wala m ba kũum. To nonglem ka be kabsg ye, A sẽn sog ka le tõe n fãag ye. A bugum ka rɩt n kees ye a zabda wa Wẽnd bugum.

⁷Sa-bɛd lagem koabga tɩ nonglem bugum tõt kiusgu. Kʋɩls sũ tãpo n na n dɩ-a t'a tõt kiusgu. Ned sẽn ka tõe n yɩ a bɛɛb laado yaa sẽn wʋka a zak arzɛk fãa n da nonglem.

⁸Tõnd tão wã nan paooda, a bĩsa nan ka yod ye. Bõe la d na n maan a yĩnga, a yell sã n wa be sʋka?

⁹D tão wã da yaẽ lal-gũbri d na n roglẽ wanzurf lill a zug n paase. D tão wã sã n da yaẽ dignoore, d na n kɛ tɩ-kegemse n maneg n page.

¹⁰Mam mee wa zabr kõn-ling-m doogo, ne a lal-gũbri. Bũmb ka paoog ye. Sẽn zao-b ro-lug-lugã, n gũusd bɛɛba me meeme. Woto wã m sɩd yaa a Zɩ-yɩɩre, la pidsda m noanga ne sũ-noogo.

¹¹A Salomo sela a bugsuntung Baal-Amo sẽnẽ. A baoo neb n gũnug tɩɩsã. Sẽn data n kẽ n tõs wata ne wakɩ koeems tusri.

¹²Sã n ya maam, maam bal n get m tɩɩsa yelle. A Salomo nong bɩ a kẽ wakɩ koeems tusra pʋgẽ n yãk koeems kobs-yi n kõ gũudba.

¹³Fo bee zẽeda tẽnsʋka, m zoodo, tɩ m tũud-n-taasa rat n wʋm f koɛɛga. Sõng tɩ d wʋm f koɛɛga, m noanga!

¹⁴Zoe n looge, m noanga! M noanga; zoe tao tao wa yãg-bila, zoe wa yĩs-bila, wudg n dʋ f yũ-nood tãmse!