Read SEBR SÕNGO, 1998 Yam vẽenem 10 Bible Online

Yam vẽenem 10 - SEBR SÕNGO, 1998 bible

Yam vẽenem 10

¹Yaa yam vẽenem n gũ pipi nedã, dũni wã ba wã, n naan-a t'a yaa a yembre, n zã-a neere, n fãag-a a tudgr wakato.

²La a kõ-a pãng t'a soog dũni.

³A sũ-puur daare, yel-wẽn-maand a ye zãaga a meng ne yam vẽenem, n puug a sũur ne a yao, tɩ kũum na n loog ne-a.

⁴Tẽnga soaal beegra yĩnga koom dɩɩ tẽnga, la yaa yam vẽenem n wa ne fãagre, n dugs koglg faoogo mogra zugu n fãag nin-sõngo.

⁵Wẽnema sẽn wa n pid moogo n ka yãk zĩig n teke, tɩ lebg yãnde, yaa yẽnda n welg nin-sõng toore, n sõng-a t'a vɩɩnd neere Wẽnnaam taoore, n sõng-a t'a biiga nonglem da yɩɩg Wẽnd dẽn ye.

⁶Yaa yẽnda n fãag nin-sõng a ye nin-wẽns wãab wakato n kɩt t'a põs bugma sẽn zomb tẽns a nu wã.

⁷Yaa b wẽnema kaset yĩnga la b tẽnga pa wala bug-toaalga n zãr ne bʋgsem, tɩ b tɩɩs biis zãgsd moogre. Yaa yel-kɩɩsa tẽegre yĩnga, la yamsem kugra ket n sela a zĩigẽ.

⁸B sẽn ka tũ yam vẽenem sorã, ka neere bala la b tõdg zãmsg ye, b basa sẽn ket-b rũnna, b gãeemda kaset, sẽn na n yɩlẽ tɩ b wẽnema da solg abada.

⁹Yam sõng fãaga sẽn sak-b yẽ tũudem, b zu-loees wakato.

¹⁰Yaa yẽnna n wilg nin-sõng a ye so-tɩrga, a sẽn waa n zoetẽ, n na n põs a kẽem beem. A wilg-a-la Wẽnnaam Rĩungu, a wilg-a-la yĩngr dãmba, a kɩtame t'a tʋʋmda sẽn wat ne yaamsa tõog n kẽng taoore, a kɩtame t'a namsg zĩnd yõodo.

¹¹A zãag-a-la ne fãadba n kõ-a arzɛka.

¹²A fãag-a-la a bɛɛb nusẽ, a kɩtame t'a põse sẽn da gãneg-b bẽdgo a taoore. Maoora yɩɩ toogo la a kɩtame t'a maan raoodo, la woto a bãngame tɩ Wẽnd tũudem n yɩɩd bũmb fãa.

¹³Nin-sõng a ye la b da koos yã, la Wẽnd maag yam vẽenem, a zãaga ne yel-wẽnde.

¹⁴Yam vẽenem naag-a lame n kẽ bi-bees roogẽ, a ka bas tɩ bãensa kaoos a nusẽ ye, a tol n wa kõ-a-la naam dasaare; la sẽn da maand-b pãn-tõogã tẽngẽ, a waa n lebga naaba. A kʋɩdga a rõatba, a kõ-a-la ziir sẽn kõn sɛ.

¹⁵Yam vẽenem fãaga bu-sõngã a bɛɛba nusẽ; buud ninga sẽn ka tara a toor yellã põsa a kʋʋdba.

¹⁶Yam vẽenem n kẽ Wẽnd tũuda a ye yamẽ t'a bõn-bãna zẽk a zugu dĩm toos taoore.

¹⁷A rola nin-sõma wã namsgo, a wilg-b-la so-sõngo, a ra ya b maasem tɩɩg wĩntoogo, la yʋngo, a ra ya b vẽenem, a ra ya b ãdse.

¹⁸A kɩtame tɩ b rʋʋg Rudum Mogrã, a kɩtame tɩ b pasg ko-kẽengã,

¹⁹a sẽn belg bɛɛbã, mogra paam-b lame n vele n le wa lɛɛg n wʋk-ba.

²⁰Nin-sõma wã looga ne nin-wẽnsã arzɛka; b pẽga Wẽnd yʋ-sõngã, b naag taaba n kils Wẽnd nug pãnga.

²¹Yam vẽenem yaaga musg la kom-bõones noore.