Read SEBR SÕNGO, 1998 Yam vẽenem 11 Bible Online

Yam vẽenem 11 - SEBR SÕNGO, 1998 bible

Yam vẽenem 11

¹Yam vẽenem kõo Israyɛl kambã bãngd sõngo tɩ b tʋʋmd ning b sẽn sɩng fãa na n baas neere.

²B pãrga we-raoogã n ti b roto, zĩig sẽn da pa tõe n ta ye.

³B pa tar b bɛɛba taoor ye, b bɛɛba n tar n leb poorẽ.

⁴Ko-yũud waa n yõka Israyɛl kamba. B yõka Soaala, sɛɛga. Soaala yaa pĩig sẽn tão n kul yĩngri la Pĩiga sika koom n kõ-ba. Pĩig sẽn da ka zoet bũmb ne keglem lebga b ko-yũuga.

⁵Koom la Wẽnd tall n sɩbg bɛɛba, koom la b tall n yols b kamba yɩɩre.

⁶Kʋɩlga wa n zãgsa a fõd ne pãnga n tãag n yɛs ne begd la zɩɩm.

⁷B sɩbgr la bɛɛba reeg yã ti b ra kõo noore tɩ b kood a Israyɛl kom-peelse. Sã n yaa a Israyɛl kambã, b paama b sẽn da pa tẽede: koom sẽn bul ne pãnga.

⁸Ko-yũud ninga sẽn da zabda ne bãmbã n wilg a Israyɛl sɩbg-toaag ninga Wẽnd sẽn sɩbg b bɛɛ.

⁹Wẽnd sẽn waa pʋgd b neba ne bʋgsem la nonglem, n tʋl tɩ b paam zʋg-sõngã, b zã-b-la toog bilfu. Woto me la b neba tõog n bãng bɛɛba sɩbgra toolem, wakat ning b sũura sẽn waa n fudgã.

¹⁰Yãmb sɩbga y neba wa ba sẽn dat n sagl a kamba, la sɩbgr ning y sẽn sɩbg nin-wẽnsã, wẽnega rĩm toaag sẽn sɩbgd tɩ sugr kaẽ ye.

¹¹Nin-wẽnsa kell n yãee toogo, Wẽnd neba sẽn wa n ket b sɛɛgẽ wala b sẽn wa n zãage.

¹²Dẽ me la nin-wẽnsa sũ-sãanga paam n pid zãnga. Bãmb n tẽr b naonga sẽn yɩ a soaba,

¹³bãmb n le bãng tɩ bãmb pɛta waa ne Israyɛl kamb sũ-noogo, la a puka Israyɛl kamba yam tɩ b reeg tɩ b Soaala pʋga b poore.

¹⁴Moyiiz ning sẽn da na n paẽ Ezipt rãmb kʋɩlgẽ, Moyiiz ninga b sẽn da rig n yiis b tẽngẽ ne paoorã, nin-kãng la b wa n lɛɛg n pẽgda, tɩ bãmb pɛta la b ko-yũuda waa n zʋʋga nin-sõma wã rẽnda.

¹⁵Ezipt rãmba wẽnema ra kẽes-b-la moog zãnga tɩ b wa yik n na n waoog wiis sẽn ka tol n tar yam, n waoog rũm-yaalse. Dẽ me la Wẽnd sɩbg-b ne rũm-yaals kãense, bãmb ka tɛka.

¹⁶Woto me la b bãng yã tɩ yel-wẽnd sẽn be zĩig ninga a sɩbgre me bee zĩ-kãnga.

¹⁷Wẽnd nuga sẽn tar pãng yĩnga, bũmb da ka toog ne bãmb ye, tɩ nug kãng n naan dũniya, sɩngrẽ wã, a sẽn da waa n ka nengã. Da kaẽ toog ne bãmba tɩ b yiis kata ka tɛka la bõnyẽes sẽn tar tĩig ye. Da kaẽ toogo tɩ b yiis rũms toose wa gɩgemd-padre bɩ ãbs ye.

¹⁸Da kaẽ toogo tɩ b yiis rũms buud b sẽn da zɩ n yãend ye, rũms sũur sẽn kɛɛde, tɩ b yõya tãoosd bug-walem ye, rũms noor pemsem sẽn ya yũug a nare, tɩ b nin tãoosd sa-yãgb sẽn kẽesd dabeem ye.

¹⁹Rũms kãens yãeeb menga ra seka Wẽnd bɛɛba dig rabeem n ki zãnga.

²⁰La ba b pa yiis rũmsi Wẽmd da tõeeme ne b noor pemsem bala n kʋ-ba. La Soaala pa nams n geel b sẽn tog ne sɩbgr ning ye, b pa geelg b sẽn na n yelg-b ne sobg ning ye, b tũ-la y so-kʋdgo, b raar fãa sore. Soaala sẽn maand fãa tũuda sore, n tar nao la buka.

²¹Yãmb bala n ka mi pãn-tõogo, Soaala, ãnda n yaool n tõe deeg yãmb wẽedo?

²²Dũni wã tõre yɛsa yãmb taoore wala bĩisri bɛɛl sẽn yãk bõn-magdg laagẽ, bɩ yibeoog meenem sẽn dʋʋgd tẽnga: paooda.

²³Yãmb zoeta d fãa nimbãanega tɩ bũmb pa toe ne yãmb ye, yãmb mumda y nini n pa rat n yãe ninsaal beegre sẽn na n yɩlẽ tɩ tuubgu wa b sũurẽ.

²⁴N-ye! Yãmb nonga sẽn be dũni wã fãa pʋgẽ, y pa sãbsd naand ba a ye; bũmb sã n da beẽ tɩ y pa nong-a, y kõn naan-a ye!

²⁵Bõe n tõe n pa sãamẽ, yãmb sã n da pa tʋlg-a, a yɩta a wãn n ketẽ; yãmb sã n da ka bool-a, a kõn loogẽ?

²⁶Yãmb pa sãamd baa fɩ, tɩ fãa yaa yãmb n so, yãmb la vɩɩma Soaala!