Read SEBR SÕNGO, 1998 Yam vẽenem 12 Bible Online

Yam vẽenem 12 - SEBR SÕNGO, 1998 bible

Yam vẽenem 12

¹Bõn-vɩɩll vɩɩ ne yãmb vɩɩma sẽn ka tõe n loogã.

²Yaa rẽ yĩnga la y sã n dat n sɩbg sẽn lʋɩ-bã, yaa bilfr-bilfr bala la y sɩbgda. Yãmb wilgd-b-la b kongre sẽn be zĩig ninga, sẽn na n yɩlẽ tɩ b veoog b menga ne wẽnga la b tẽ yãmba, bũmb fãa Soaala.

³Y moorã waa n pa zemse ne neb niyns sẽn da be-b kãabga tẽnga ye,

⁴tɩ b ra yaa wɩɩbd rãmba, b ra pʋgda tɩt rãmba, b ra maanda sẽn kisi.

⁵B ra kʋʋda b kamba n dɩt b nemd, n yũud b zɩɩm la b wãbd b yãado b kibs bɛd kẽere; la rẽ la b ra ne b zãmsdẽ, n dɩt b rɩ-bɛd, beoog sẽn vẽege.

⁶Yãmb wa n yik n sedame tɩ d yaab rãmbã n na n kʋ neb niyns sẽn kʋʋd b kamba, kamb sẽn ka tõe n zab n fãag b mensã.

⁷Ad-y y tʋlgame tɩ tẽng ninga y sẽn da nong n yɩɩd a taabã paam kẽed-paalse sẽn tũud yãmba la sẽn da tog ne y tẽngã.

⁸B sẽn da ya ninsaalb yĩnga, yãmb kong n maana sugri, n sɩbg-b bilf-bilfu, n tʋm zab-zabdba taoore, tãb-biis sẽn da ya toose wa kãnenkãase, n na n kʋʋd-b bilf-bilf bala.

⁹Ka yet tɩ b ra ka tõe n bas tɩ bɛɛba sũ taaba n tak zabre, tɩ b kɩt tɩ b fãa pa nin-sõma wã nusẽ ye, ka yet tɩ b ra pa tõe tɩ we-rũms sɛɛs b vugri, bɩ kãab wẽng rɩ-b fãa zãng ye.

¹⁰B tʋlgame tɩ b paam vɩʋʋgo n tuubi; yaa rẽ la sɩbgra sẽn ka wa vugrã. Y yaool n da miime tɩ b roga ne b wẽnem, n dog ne bi-beelem, n ka tõe n tek zʋg ye.

¹¹Ad-y yaa al b sɩngrẽ la b ra zoe n kong Wẽnd barka. Ka yet tɩ y ra zoeta neda, Soaala, la y sẽn bas nin-wẽnsã n pa sɩbga ye.

¹²Ãnda n na n saag n soke: «Bõe la y maan yã?» Ãnda n na n kɩɩs yãmb sẽn kaool bũmb ninga? Ãnda n na n yeele t'a na n yika zabre ne Wẽnde, tɩ yaool n ya Wẽnd n yiis fãa moogo?

¹³Ayo! Sã n ka yãmba, Wẽnd ka be sẽn get bũmb fãa yell ye! Ned ka be tɩ y tog n wilg a soaba tɩ y bʋʋda ka bʋʋd kɛdb ye.

¹⁴Naab bɩ dĩm ka be sẽn tõe n zẽk a zug yãmb taoore wa yẽ n na n sõng y sẽn sɩbgd b rãmba ye.

¹⁵Y sẽn mi zemsgo, y zãada fãa ne zemsgo, la y yetame tɩ pa segd ne Pãng-Soaba t'a sɩbg ned sẽn pa tog ne sɩbgre ye.

¹⁶Yãmb pãnga zugu la y yals y zemsgo, yaa y sẽn so fãa yĩnga la y maan sugri ne bũmb fãa.

¹⁷Yãmb sẽn wilgd y pãnga yaa neb niyns sẽn pa reeg tɩ y tõee fãa, la yãmb ningda yãnde neb niyns sẽn mi y pãnga la b maand wilg-m-menga.

¹⁸Yãmb sẽn tar pãnga, y kaooda d bʋʋdo ne maag-m-menga, yãmb zãada tõnd bʋg-bʋge, ka rẽ, yãmb sẽn dat bũmb ning fãa, y toeeme.

¹⁹Yãmb maana woto, n na n wilg y nebã tɩ nin-sõng kũmda a to. La yãmb kõ-la y kamba saagre, saagr tɩ b yel-wẽnd poore, vɩʋʋg na paame n maan tuubgu.

²⁰Nimbãan-zoeer la bʋgsem zĩnda bɛɛba sɩbgr pʋgẽ; bɛɛba yẽ sɩd da toga ne kũum tɩ b da koota y kamba, la yãmb kõ-b-la vɩʋʋg tɩ b yeeg b wẽnema n lobe.

²¹Rẽ kɩtame tɩ y bʋ y kamba ne gũusgu, tɩ yãmb da yõga zoodo la y ra kãaba b yaab rãmb kãab noodo.

²²Tõnd saglg yĩnga, y pa sɩbg d bɛɛba tɩ loog ye sẽn na yɩlẽ tɩ tõnd me tẽeg y bʋgsem, d sã n dat n kao ned bʋʋdo, tɩ woto la d me na n tõog n saag y nimbãan-zoeere.

²³Yãmb sɩbga sẽn da vɩ-b nin-wẽnse la gãeems vɩɩm. Yãmb basame tɩ b manes yoodã lɛɛg n nams-ba.

²⁴B tudgra pʋgẽ, b ra menemame n zãage, n wa tol boond tɩ wẽnd dãmba bõn-yaalse, la rũm-yoodo, n tol n bas tɩ b belg-ba wala kamb yam sẽn nan ka wɩsge.

²⁵Yaa rẽ yĩnga la yãmb me sẽn wa n na n sɩbg-ba, y sɩbg-b-la ne sɩbg yaalse.

²⁶Sɩbgre yaalga sã n yaool n ka tek b zʋgo, Wẽnd meng bʋʋdame n paalg-ba.

²⁷Rũms niynsi sẽn nams-ba yaa b sẽn da get b rãmb wa wẽnde, bãmb n lɛɛge n lebg b bɛɛba, la woto b nin pukame tɩ b na n ges wala Wẽnd akɩka, Wẽnd ninga b sẽn ka tʋlg n bãng pĩnda. Yaa b sẽn da ka tʋlg n bãng Wẽndã la sɩbgr-kãens lʋɩ b zugu.