Read SEBR SÕNGO, 1998 Yam vẽenem 13 Bible Online

Yam vẽenem 13 - SEBR SÕNGO, 1998 bible

Yam vẽenem 13

¹N-ye! Neb niyns fãa sẽn ka mi b Wẽnde sɩd yaa nin-yaalse, b mii bõn-sõma la b pa tõog n bãng Wẽnnaam, d Soaala ye; b yãee tʋʋma sẽn tʋm n dɩgle la b pa tõog n bãng tʋʋm-tʋmda meng ye.

²Yaa bugum, sobgo, pemsem, saaga, ãdse, mogre koom, yaa wĩntoog la kiuugu, b sẽn teeg b rãmba n sõt raare, kiuug la yʋʋmdã, bãmb la b ges wala wẽnd dãmba.

³D mi tɩ yaa b neerma sẽn yɩk b pɛlenga la b saag n mams-b ne Wẽnde; b bãng tɩ dũni Soaala n yɩɩda, tɩ bãmb la b neerma Naanda.

⁴B sã n pẽg bõn-naandsa pãnga la b tõogo bɩ b tũ rẽ n bãng tɩ b Naanda n yɩɩde.

⁵Dũni wã teed bedrem la b neerem sõngdame tɩ d bãng b Naanda pãnga la b sõmblem.

⁶Sẽn tudg-ba n waoogd bõn-naandse wa wẽnde toga ne sãbsgo bilfri bala, tɩ yaa b sẽn baood Wẽnde, n dat-bã, la b waa n tudgi.

⁷B sẽn vɩ bõn-naandsã sʋka, n dat n wʋma b võorã, b yãenda b neerma n tudg n mams-b ne bũmb b sẽn tog n waooge.

⁸B yaool n ka tõe n yeele tɩ b bee bʋʋm zãng ye.

⁹B sẽn tar yam tɩ sek a vɛɛs dũni yɛla, b maana a wãna n ka tõog n bãng b Soaala?

¹⁰M sẽn yãbd b rãmb n yɩɩda, yaa sẽn teeg-b bõn-kɩɩmse. Yaa sẽn bool-b tɩ wẽnde ninsaal nug sẽn naane: sãnem, wanzurf sẽn yõg ne minim, tɩ lebg rũng wẽnego; kugri sẽn ka tar a toorẽ yõodo, kʋdem-dãmb sẽn peese n bas n looge.

¹¹Ges-y ra-wãada: a kʋʋgda tɩɩga, tɩɩg sẽn ka tar keglem, n lags a pagdã, n pees-a ne minim t'a lebg tʋʋmd bɩ rɩɩb laoko.

¹²A wʋkda sẽn ketã n tugl bugum, n segl rɩɩbo, n yiis a kom.

¹³Gɩrg a ye n wat n paa a nugẽ sẽn ka yõod baa bilfu, sẽn yaa yoaada, sẽn yaa goalenga, t'a rɩk-a n maag a menga n pees, a sẽn wat n tar vɩʋʋg wakato; a tʋmda a sẽn wat n zĩ zaalma wakato, n kõ raooga ninsaal neng wẽnego.

¹⁴A tõeeme n naan rũn-yook ninga, n bao go-miuugu n bol-a, n ning-a monem, n bao sũudu n taas taas a bogdã.

¹⁵Dẽ poore a pẽnegda lalg a ye, n me roog sẽn tog ne-a, n kẽes-a be, n bao kutu n ka-a,

¹⁶sẽn na n yɩlẽ t'a ra lʋɩ ye, tɩ b sã n ka sõng-a, a ka tõe n sõng a meng ye. A sẽn ya bũmb wẽneg bala, a tara sõngr tʋʋmde.

¹⁷La bãng-y tɩ raoã sã n wa rat n pʋʋse, n paas a paoongo, n pʋʋs a kamb yĩnga, a ka zoet yãnd ye. Yaa bõn-kɩɩngã la a yaagda a noore n bõse.

¹⁸Yaa bõn-kɩɩngã la a kot yõ-woko. A sẽn dat t'a sor yɩ sõngo a pʋʋsda sẽn ka tõe n luk a naoore.

¹⁹A bõsda sẽn ka-a pãngã t'a paas a pãnga, t'a tõog n bao ligdi, t'a tõog n tʋm a tʋʋma, t'a tʋʋm zĩnd yõodo.