Read SEBR SÕNGO, 1998 Yam vẽenem 14 Bible Online

Yam vẽenem 14 - SEBR SÕNGO, 1998 bible

Yam vẽenem 14

¹Nina ratame n dʋʋg mogrã ne a ko-wiis bedã, n yõkd daoog sɛɛga, daoog sẽn ka tar pãnga, n kẽ yõgdre wa koglga meng a sẽn be a soab pʋgã.

²A raab waglsã n sõng-a t'a naan koom-koglgã, koom-koglg a sẽn ka ne yam la minim.

³Yaa yãmba, d Ba-Pãng-Soaba, n zãad koglgã, yaa yãmb, d Wẽnnaam la d gũud sõngã, n tuk sore mogrẽ, sor sẽn ya sõngo, kooma sʋka, tɩ lisb rabeem kaẽ ye,

⁴n dat tɩ d bãnge tɩ yãmb tõe n gũu fãa, al tɩ ba minim sã n kaẽ bɩ d tõog n kẽ koom-koglgo.

⁵Yãmb pa rat tɩ tʋʋm niyns yãmb sẽn tʋm ne yam zulunga wa kong b yõoda ye. Yaa rẽ yĩnga la ninsaalb sakda n dɩk b yõore n koos ne ra-peko, n dʋʋgd mogre ne koglg bila, n pa tol n yɛɛsd kooma ne a wiisa ye, la b põsd yel-beed buud fãa.

⁶Sɩda, sɩngrẽ wã, gãndaadã sẽn wa n kiid b nagr kũuma, dũni wã gilli da teega koglg faasga, la yaa yãmb nugu n dugs-a tɩ dũni wã paam bu-paalga la a kẽ zamaan paalg pʋgẽ.

⁷Raooga paam barka, Wẽnnaam sẽn tall-a n tʋm b zemsga tʋʋmdã!

⁸Sã n yaa naande b sẽn waoogd wa Wẽnnaam, bɩ Wẽnd yãk rao-kãng barka la b yãk ra-pɛɛsa me barka, n yãk ra-pɛɛsa barka a tʋʋm yooga yĩnga, n yãk a sẽn peesa barka, tɩ yaa bũmb sẽn tõe n sãam la a baas n boond tɩ wẽnde.

⁹N-ye, Wẽnd kisa wẽn-kɩɩsa ne a zɩɩlem!

¹⁰Tʋʋm-tʋmda ne a tʋʋmdã fãa na n paama sɩbgre.

¹¹Wẽnd na n sɩbga bu-zẽna ne zirẽ-be-wẽnd dãmba, tɩ b lebga bũmb sẽn yaand sũuri dũni wã pʋgẽ, n tusd ninsaala n lubd wẽng pʋgẽ, n lebg bẽdgo yam-pa-sek b rãmb yĩnga.

¹²Bũmb ning sẽn wa ne tudgr kãsenga, n wa ne vɩɩma sãoongo, tẽng zugu. Yɩɩ yãend bũmb f yãmẽ n naan bũmb sẽn wẽnd-a.

¹³Togsenda yaa bũmb sẽn yaoole, yaa bũmb sẽn ka na n zĩnd daar fãa ye.

¹⁴Yaa ninsaal yam kaoolgo n wa ne b moogo, yaa rẽ yĩng me la bõn-naandsa na n loog tɩ ka kaoos ye.

¹⁵Bi-bilfu n dag n ki, t'a ba zĩ ne sũ-sãanga. A waa n peesa bũmb sẽn wẽnd a biigã. A waa n yika raar a ye, n na n sɩng n waoog wa wẽnde, bũmb ninga sẽn yaa a bi-kɩɩnga wẽnegã. A tol n wa wilga a zak rãmba, wẽnda tũudma sẽn date, maanda sẽn tog n yɩ to-to.

¹⁶La bilf-bilfu, yʋʋma sẽn tar pʋgbã, waa n lebga rog-n-miki.

¹⁷Yaa woto me la dĩm dãmb waa n kõ noore, tɩ bõn-peesdi wã na n paam waoogre. B sẽn da ka tõe n waoog b nanamsa mense tɩ b ra bee yɩɩga, b maana b wẽnego n ning b taoore, n tõog n balem sẽn zãr-ba wala b sã n da pẽemẽ.

¹⁸Wẽnd maag pɛɛsda minim, dĩma wa n tɩ paama waoogre zĩis niynsi b sẽn dag n ka mi-a meng ye.

¹⁹Sẽn tũ bũmb ninga tɩ wa ya woto, yaa tɩ ra-pɛɛsã sẽn tʋlg n noog dĩma sũuri, modgame t'a sẽn peesã loog n ya neere n yɩɩd dĩma menga.

²⁰Neba sẽn yãe tɩ naanda yaa neere, b yikame n na n waoog wa wẽnde, b sẽn da waoogd a soaba wa ninsaalã.

²¹La woto la b lebg bẽdgo, n yõgd ninsaala, tɩ ninsaal basame tɩ b zu-beedo bɩ b nanams pãnga belg-ba tɩ b bool tɩ wẽnde, kugri bɩ raoog sẽn peese.

²²Ka Wẽnd bãngrẽ wã bala la ninsaal maan tudgr ye. B ka bãng b sẽn da zĩ yel-beed niynsa pʋg ye tɩ b tudg n bool rẽ fãa tɩ laafi.

²³B waa n yik n koota b kom-bõonego, n waoogd b wẽnda ne lika, n yeelg b fu gʋlem-gʋlem n gilgd b gilgri, la b saood b saooga ne pãnga.

²⁴B ka le mi vɩɩm korem, b ka le reegd yikãadma noy sõma wã ye, n soosd n kʋʋda taaba, n soosd n yood taab pagba.

²⁵Fãa lebga kalem-kalem: zɩɩm daagre la yõor yãkre, zãmb la wagdem, yiis ligd n paam bʋʋm, zirẽ yagbo, raas kaobo, kãabd n ka pidsdẽ.

²⁶Bõn-yõodo tekda ne sẽn ka yõodo, sõm-zɩtem reegda zĩig n yãmbe, sõmblem menesgo, rap ne taab wɩɩbgo, kãad-yaare, yoob la ra-taare.

²⁷Nin-naandsa waoogre la wẽng buud fãa sɩngre, a pak-n-taaga, la a baasgo.

²⁸Dẽ n wat ne sũ-nood yaals pʋgbo, n wat ne la-n-kaase, ne zirẽ-be-bãngr yiisgu, ne pãn-tõogo, ne wẽn-faado.

²⁹B miime tɩ b sẽn wẽen woto wã, bũmb kõn maan-b ye, tɩ b sẽn kãab ne a soaba yaa bõn-naande sẽn ka vʋʋsd ne yõore.

³⁰Mik b na n paama sɩbgre, sɩgbr buud a yiibu: tɩ b basa Wẽnd n pʋg bõn-naandse, tɩ b wẽena sẽn pa sɩda n paoog Sõmblem menga.

³¹Yaa Wẽnd sẽn mi zemsgã n na n paalg beegdã, ka fo sẽn teeg bũmb niynsa pãng n na n fãag-f ye.