Read SEBR SÕNGO, 1998 Yam vẽenem 16 Bible Online

Yam vẽenem 16 - SEBR SÕNGO, 1998 bible

Yam vẽenem 16

¹Da segdame tɩ Ezipt rãmba sẽn da waoogd rũms yoodã, bɩ b sɩbgra yi rũmsẽ wã, rũms sẽn ka tɛkã.

²Sã n ya yãmb buuda nebã, Soaala, y ka sɩbg-b woto ye, y maan-b-la neere, b sẽn waa n tʋlg n yiis b kom kẽengã ne rɩ-noogo, pɩtr-lʋɩɩs nemdo la y segl n kõ-ba.

³Rũms niynsi Wẽnd sẽn tool Ezipt rãmba yɩɩ rũms wẽnse, yaa rẽ yĩnga tɩ kom da tar-b me, b ra pa ne b sẽn na n dɩ a soab ye. Y buuda neba, Zʋɩf rãmba yãee kom wakat bilfri bala, n yaool n na n dɩ noogo.

⁴Da segdame tɩ kom kãsenga nams Ezipt rãmba, a Israyɛl koma yaa a bãng bilfri bala toog ninga sẽn wʋm b bɛɛba.

⁵Bõn-nindi wã sẽn waa n yik a Israyɛl sɩbgre, wag-toosa sẽn wa n kʋʋd a kamba, y ka bas y sũura t'a fũdg n taa a tɛk ye.

⁶Sɩbgra yɩɩ wala saglgo, yɩɩ yɛɛs-b bilf bala n ka kaoos ye, yɩɩ Wẽnnaam noya tẽegre.

⁷Sɩda ned ninga fãa sẽn da roogd a nenga ra paamd n põsame, la ka a sẽn ges zũuda yĩng ye, yaa a sẽn ges yãmba, dũni fãa Soaala.

⁸Woto yãmb wilga y bɛɛba tɩ yãmb n zãagd wẽng buud fãa.

⁹Sʋya la kãnenkãase n kʋ bɛɛba, tɩ b pa tol n yãend tɩɩm ye, la segdame tɩ rũm-yaalsa a woto buud kʋ-ba.

¹⁰Sã n ya yãmb kamba, wag-toosã yẽn meng ka tõog-b ye, tɩ yãmb nimbãan-zoeer waa n fãag-b lame.

¹¹B sɩbgrã yɩɩ wa b ra kõsd-b-la ne supĩim, kõsb sẽn wẽnegd n maage, sẽn na n yɩlẽ bala tɩ b tẽeg b koeesã, tɩ yĩmbu da wa lʋɩ sʋk ye, tɩ b kong Wẽnd yel-sõmd ye.

¹²La sɩda, ka weoogẽ bɩ yir tɩɩm n fãag-b ye, b ka to moogo n bɛ ye, ka bãn kaam ye, ayo! Yɩɩ bãmb Wẽnda gomna, n fãag-ba, tɩ b gomna n sãoogd bãas buud fãa.

¹³Yãmb n so vɩɩm la kũum, yãmb n kẽesd la y yiisd bʋg-tẽnga.

¹⁴Ninsaal ne a wẽnema tõeeme n kʋ, la a ka tõe n le vʋʋg ye, a ka tõe n fãag ned ninga sẽn lebga bʋg-tẽng pʋɩɩr ye.

¹⁵Paam n põs yãmb sɩbgre yaa toogo, Soaala.

¹⁶Wẽn-kɩɩsdba sẽn yet tɩ b ka mi yãmba, yãmb nug wẽ-b lame, sa-lugsi, sapɩlem, saas sẽn niid n ka yoogdẽ nams-b-la wʋsgo. Bugum rɩ-b lame.

¹⁷La ges-y bõn-bãnde: koom sẽn kiisd fãa wã, ra paasda bãmb bugma pãnga. Bãng-y tɩ dũni wã tõre naag n zabdame n sõngd nin-sõma.

¹⁸Bugma mi n wa maagame, sẽn na n yɩlẽ tɩ b sẽn tʋm rũms niynsa ra naag nin-wẽnsã n ki ye, la nin-wẽnsã me bãng tɩ Wẽnd n kao bʋʋdo n paalg-ba.

¹⁹Bugma mi n wa yɩka kooma sʋka n dɩt ne pãng n na n sãam tẽnga koodo, tẽnga sẽn lebg nin-wẽns tẽnga yĩnga.

²⁰Sã n ya yãmb buudã yãmb kõ-b-la malɛk rãmb rɩɩbo. Beoog sẽn vẽeg fãa yãmb segla rɩɩbo, yĩngri rɩ-sõngo, n tool-ba, tɩ b ka tol n nams ne seglg ye. La rɩɩbã ra kõta sũ-nood buud fãa, a ra tata ned kam fãa yam.

²¹Rɩɩba ra wilgda y neba yãmb sũ-bʋgsem ne-ba, tɩ b ra neeme t'a sẽn ta ned ninga fãa noorẽ, a teemdame n lebg a soaba sẽn dat t'a yɩ bũmb ninga.

²²Bãng-y tɩ bũmb sẽn da ya wa ko-gĩsdem, n ya wa sapɩlem, bugma tʋʋlem da ka boogd-b ye, woto paama kaseto tɩ Wẽnd sẽn wa n tʋlg n sãam bɛɛba koodo, bugum da rɩta a rɩɩbo, tɩ sapɩlem diga, tɩ saag niida.

²³Bugma ne a ya bugma ra yĩma a sẽn tar pãng ninga n bas Israyɛl kamba rɩɩbo t'a tõog n dɩlg a menga.

²⁴Dũni wã sura yãmb taoore, Soaala tɩ yãmb la a Naanda. A sakdame n sɩbg yãmb bɛɛba, n yaool n maand sugri ne sẽn teeg-b yãmba.

²⁵Yaa rẽ yĩnga la a teem zãnga n lebg yãmb sõmblema sõgne, n na n wa ne noosem buud fãa, n na n tɩgs kom sẽn tar b rãmba.

²⁶Yaa woto, Soaala, la y kamb sẽn nong yãmba na n bãng tɩ pa tɩɩsa biis toɛ-toɛ wã n dɩlgd ninsaal ye, yaa yamb gomna n dɩlgd sẽn tẽed-b yãmba.

²⁷Ade, bugma sẽn da ka rɩ bũmb ningã, sõor sã n puk bala, wĩnto-sull sẽn taa-a bala, la rɩɩba sẽn boogde.

²⁸Y tʋlg n wilg-b lame tɩ b tog n pʋʋsa yamb barka tɩ sõor nan pa yẽeg ye, tɩ b tog n waooga yãmba, n pẽg yãmba, Soaala, zĩig sẽn wat n yẽegdẽ.

²⁹Sẽn ka mi-a a zaame pʋʋsgo, yẽ soab me saagre boogda wa ko-gĩsdem, a loogda wa ko-rẽgdo b sẽn lobe.